1

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԵՐԵՎԱՆԻ ՔԱՂԱՔԱՅԻՆ ՀԱՄԱՅՆՔ

18 մարտի 2015 թվական

5-ՐԴ ՆՍՏԱՇՐՋԱՆԻ 2-ՐԴ ՆԻՍՏ

ԵՐԵՎԱՆԻ ԱՎԱԳԱՆՈՒ ԲԱՆԱՎՈՐ ՀԱՐՑԵՐԻ ՈՒ ԴՐԱՆՑ ՊԱՏԱՍԽԱՆՆԵՐԻ

ՍՂԱԳՐՈՒԹՅՈՒՆ

ժամը 14.00

Տարոն Մարգարյան

- Երևանի ավագանու անդամնե՛ր, հարց ու պատասխանի համար գրանցվել են

ավագանու 11 անդամ՝

Արթուր Գասպարյան՝ «Բարև Երևան» խմբակցություն,

Թամարա Պողոսյան ՝ «Բարգավաճ Հայաստան» խմբակցություն,

Արա Կետիկյան՝ «Հանրապետական կուսակցություն» խմբակցություն,

Անահիտ Բախշյան ՝ «Բարև Երևան» խմբակցություն,

Աննա Ասատրյան՝ «Հանրապետական կուսակցություն» խմբակցություն,

Դավիթ Սանասարյան՝ «Բարև Երևան» խմբակցություն,

Աստղիկ Գևորգյան ՝ «Հանրապետական կուսակցություն» խմբակցություն,

Գագիկ Բաղդասարյան «Բարև Երևան» խմբակցություն,

Ռուզաննա Սիրունյան՝ «Հանրապետական կուսակցություն» խմբակցություն,

Ստեփան Սաֆարյան ՝ «Բարև Երևան» խմբակցություն,

Կամո Հովհաննիսյան՝ «Հանրապետական կուսակցություն» խմբակցություն։

2

Հարցի համար ձայնը տրվում է «Բարև Երևան» խմբակցության անդամ պարոն

Գասպարյան, խնդրե՛մ,

Արթուր Գասպարյան

-Պարոն Մարգարյան, շնորհակալություն, հարցս վերաբերում է

ավտոկայանատեղիներին, մասնավորապես, Դավթաշեն վարչական շրջանում

կազմակերպված վճարովի ավտոկայանատեղիին, սակայն մի քանի րոպե առաջ մեր

անձնական շփման արդյունքում Տրանսպորտի վարչության պետ պարոն Նավասարդյանի

հետ, օպերատիվ ձևով ստացա հարցիս պատասխանը, այնպես որ հանում եմ հարցս։

Տարոն Մարգարյան

-Եղա՛վ, շնորհակալություն։

Հաջորդ հարցը՝ Թամարա Պողոսյան, խնդրե՛մ, տիկին Պողոսյան։

Թամարա Պողոսյան

-Շնորհակալություն հնարավորություն ընձեռելու համար։ Պարոն քաղաքապետ,

դեռևս 2014թ.՝ Երևան քաղաքի զարգացման տարեկան ծրագրի մշակման ժամանակ,

«Բարգավաճ Հայաստան» խմբակցության կողմից արվեց առաջարկություն մշակել Երևան

քաղաքի համաչափ զարգացման հայեցակարգ՝ երրորդ և չորրորդ կարգի վթարային շենքերի

դասակարգման առաջնահերթության, նաև զբոսաշրջության վերաբերյալ հայեցակարգ։

Ուզում եմ տեղյակ պահել իմ գործընկերներին, որ 2014թ. նոյեմբեր և դեկտեմբեր

ամիսներին խմբակցությունը ստացավ արդեն մշակված 2 հայեցակարգերի նախագիծ՝ Երևան

քաղաքի համաչափ զարգացման և վթարային շենքերի վերաբերյալ հայեցակարգը։ Մեր

կողմից շրջանառության մեջ էր դրված Երևան քաղաքում զբոսաշրջության զարգացման

վերաբերյալ հայեցակարգը։

Հարց. ի՞նչ վիճակում են այս երեք նախագծերը, ընդունվել են, թե չեն ընդունվել, սա

հարց առաջին, եթե ընդունվել են, ապա ի՞նչ ընթացքում են դրանք, որովհետև կարծում եմ, որ

առաջիկայում մենք նախատեսում ենք տարեկան ծրագրի հաշվետվությունը քննարկել, ապա

սրանք հիմք ընդունվելու՞ են այս նոր հաշվետվության մեջ՝ որպես չափորոշիչներ։ Ինչու եմ

այս հարցն այսպես մի քիչ սրացումով ուզում տալ, որովհետև հատկապես Երևան քաղաքի

վթարային շենքերի վերաբերյալ խնդիրը շատ առաջնահերթ է:

Եթե հաշվենք, որ չորրոդ կարգի վթարայնության շենքերի հարցը 2015թ. Երևան

քաղաքում լուծվելու է հիմնովին, ապա խնդիրը մնում է հրատապ՝ երրորդ կարգի

վթարայնություն ունեցող շենքերի վերաբերյալ, որոնք Երևան քաղաքում 93 են, ընդ որում,

3

Շենգավիթում՝ 35, Աջափնյակում՝ 22, այսինքն՝ բավականին հասունացած խնդիր է։ Ես

կարդացի ամբողջ հայեցակարգը, և հստակ չափորոշիչները մշակված են այնտեղ, առկա

իրավիճակի նկարագրություն կա:

Առաջիկայում՝ մինչև այս հայեցակարգի մշակելը, այսպիսի մոտեցում էր

ներկայացվում քաղաքապետարանի կողմից, որ դեռևս երրորդ կարգի վթարայնության

շենքերի ամրակայման, քանդման վերաբերյալ չկան հստակ սահմանված չափորոշիչներ: Այս

նոր հայեցակարգով արդեն կա՝ որ դեպքում դրանք պետք է քանդվեն, որ դեպքում`

ամրակայվեն: Այսպիսով, կարծես թե մենք մոտեցել ենք հանգուցալուծմանը, և ես ուզում եմ

իմանալ՝ կա՞ արդյոք որոշակի միջոցառումների ծրագիր այս խնդրի լուծման համար՝ և՛

վթարային, և՛ Երևան քաղաքի համաչափ զարգացման վերաբերյալ։ Երկու հարցը

միաժամանակ եմ տալիս, որ երկրոդ անգամ ելույթ չունենամ, շնորհակալություն։

Տարոն Մարգարյան

-Շնորհակալություն, Ձեր հարցին կպատասխանի քաղաքապետի տեղակալ Վահե

Նիկոյանը, բայց մինչ այդ ես պատասխանեմ: Տիկին Պողոսյան, ճիշտ եք նկատել, և այս

վերջին ամիսներին քննարկումներ էր տեղի ունենում՝ հայեցակարգի հետ կապված բոլոր Ձեր

նշած ուղություններով։

Անցյալ տարի ավագանու նիստերից մեկում բարձրացվեց այդ հարցը, և մենք

խնդրեցինք ավագանու անդամների մասնակցությունն այդ ծրագրի քննարկմանը։

Քննարկումներն արդեն ավարտական փուլում են։ Երկու հայեցակարգեր հաստատվել են,

բայց մի քանի ոլորտներում դեռ քննարկումները շարունակվում են, ավարտելուց հետո

արդյունքների մասին տեղեկատվությունը կտրամադրենք Ձեզ։ Հաստատվելուց հետո միայն

այդ ծրագիրը կյանքի կկոչենք։

Խնդրե՛մ, պարոն Նիկոյան։

Վահե Նիկոյան

-Պարոն քաղաքապետ, ընդհանուր առմամբ, ըստ էության, հարցին պատասխանվեց,

տեղյակ եք երկու հայեցակարգեր ուղարկել ենք, երրորդը մշակման, այսինքն՝ քննարկման

փուլում է՝ կուղարկվի։ Հայեցակարգերն այն խնդիրները, որոնք հստակ դրվել էր ծրագրով,

ներառում են։

Համաչափ զարգացման հայեցակարգի մասով մենք խնդիր ունենք, ըստ էության, դա

ուշացնելու խնդիր չէ: Խնդիր ունենք նաև՝ դիտարկելու մեր հետագա զարգացման ծրագրերի

կոնտեքստում, իսկ վթարային շենքերի մասով, ինչպես նշվեց, մանրամասն ուսումնասիրվել

են բոլոր վթարայնության շենքերը, գույքագրման արդյունքները, և հենց այն միջոցառումների

4

ծրագիրը, ինչի մասին խոսքը գնում է, հայեցակարգի հավելվածում նախատեսված է և

կիրականացվի։ Ըստ էության, կոմպլեքս կհաստատվի դրանք ու կներկայացվի Ձեզ։

Թամարա Պողոսյան

-Շնորհակալություն, ուզում եմ իմանալ՝ 2016թ. բյուջեի հաստատման ժամանակ,

արդյոք այդ ծրագրերն արդեն կընդունենք հիմք, և մենք որոշակի հատկացումներ կունենանք

այս խնդիրների լուծման համար։ Հասցնելու՞ ենք դա, թե սա այս տարվա շրջանակներում

իրականանալու խնդիր չի: Ինձ սա է հետաքրքրում։

Տարոն Մարգարյան

-Այո՛, միանշանակ հասցնելու ենք։

Թամարա Պողոսյան

-Շատ շնորհակալություն։

Տարոն Մարգարյան

-«Հանրապետական կուսակցություն» խմբակցության անդամ Արա Կետիկյան,

խնդրե՛մ, պարոն Կետիկյան։

Արա Կետիկյան

-Հարգելի՛ պարոն քաղաքապետ, բոլորիս է հայտնի, որ Երևանի քաղաքապետարանի

և Լեռնային Ղարաբաղի Հանրապետության պաշտպանության բանակի միջև ձեռք բերված

հստակ պայմանավորվածության համաձայն իրականացվել է շատ ողջունելի ծրագիր, որի

համաձայն՝ միայն 2014թ. ընթացքում ավելի քան 600 երևանաբնակ ժամկետային զինծառայող

խրախուսվել է 5-օրյա արձակուրդով և հնարավորություն ստացել այցելելու իրենց

ծնողներին:

Կարծում եմ՝ ոչ միայն իմ, նաև հասարակության կողմից շատ ողջունելի ծրագիր է

իրականացվել և բոլորին էլ հետաքրքրում է՝ արդյոք այդ ծրագիրն ունենալու է

շարունակություն նաև 2015թ. ընթացքում, շնորհակալություն։

Տարոն Մարգարյան

-Շնորհակալություն, պարոն Կետիկյան: Իրականում, շատ լավ հարց եք բարձրացրել,

և մեր քաղաքացիները բոլորն են հետաքրքրված։ Մենք դեռ անցած տարի հայտարարել ենք,

որ այս ծրագիրը լինելու է շարունակական, և տարին երկու անգամ պարտադիր մենք

զինծառայողների ծնողներին, սահմանամերձ գոտում և Լեռնային Ղարաբաղում ծառայող մեր

5

զինվորների, զորամասեր այցելելու հնարավորություն ենք տալու։

Երևանի քաղաքապետարանը Պաշտպանության նախարարության հետ միասին

կազմակերպելու ենք այդ այցելությունները։ Հիմա մենք Լեռնային Ղարաբաղի

պաշտպանության նախարարության պատասխանատուների հետ քննարկում ենք նաև այն

զինծառայողների հարցը, որոնք ծառայության ընթացքում աչքի են ընկել դրական առումով,

առաջարկելու ենք տրամադրել լրացուցիչ արձակուրդ։ Այս ծրագիրը իրականացվում է երկու

փուլով՝ մայիսին և հոկտեմբեր- նոյեմբերի ամիսներին: Այս տարի դեռ կոնկրետ ժամկետները

վերջնական հաստատված չեն, պատասխանատուները քաղաքապետի խորհրդական Վանո

Վարդանյանն է և վարչական շրջանների ղեկավարները, ովքեր պետք է, ծնողների հետ

խորհրդակցելով, ներկայացնեն առաջարկություն ժամկետների վերաբերյալ։ Երբ հստակեցվի

ժամկետները մենք անպայման հանրությանը կտեղեկացնենք։

Արա Կետիկյան

-Շնորհակալություն, ևս մեկ անգամ ողջունում եմ և, օգտվելով առիթից,

շնորհակալություն հայտնում և՛ Ձեզ, և՛ մեր վարչական շրջանների ղեկավարներին։

Տարոն Մարգարյան

-Շնորհակալություն։

Հաջորդ հարցը՝ «Բարև Երևան» խմբակցության անդամ Անահիտ Բախշյան, խնդրե՛մ։

Անահիտ Բախշյան

-Շնորհակալություն, պետական պաշտոնյաների կողմից պարբերաբար, հատկապես

մարտի 8-ի նախօրեին, դպրոցներում, մանկապարտեզներում դրամահավաքն արգելող

ահաբեկիչ հայտարարություններ են հնչում, որոնց հետևությունն այն է, որ հանկարծ ծաղիկ

չնվիրեք ձեր ուսուցիչներին, այն դեպքում, երբ այս օրերին եթերը ողողված էր բոլոր

մակարդակի պաշտոնյաների կողմից կանանց ծաղիկներ նվիրելու տեսանյութերով։

Ստացվում է, որ կնոջը ծաղիկ նվիրելը և այդպիսով նրան գնահատելը պաշտոնյայի

մենաշնո՞րհն է. ասելիքս այն է, որ պետք չէ այդպիսի հայտարարություններ անել,

մանավանդ, որ դրանք չեն օգնում դրամահավաք կոչվող վատ երևույթը վերացնելուն, այդ

երևույթի դեմ ընդամենն ահաբեկման իմիտացիա են ստեղծում և հեղինակազրկում են

դպրոցին և ուսուցչին։ Ավելին, դրամահավաքն արգելող նման հայտարարությունները

չափազանց բացասական են անդրադառնում դպրոցականների մշակութային կրթությանը։

Բավական չէ՝ կրթությունը չի ապահովում սովորողի մշակութային կրթությունը, որն այսօր

առանց ծնողի ներդրման հնարավոր չէ, դրամահավաք անվան տակ արգելվում է

6

դպրոցներում իրականացնել այն։

Հաճախ տնօրենն ամեն զանգից, փորձանքից հեռու մնալու համար ուսուցիչներին

արգելում է որևէ մշակութային միջոցառում, իսկ ԶԼՄ-ներն անխնա քննադատում են

ուսուցչին՝ սերնդին այդ կրթությունը չտալու համար, հետևաբար, որպես Երևանի

քաղաքապետ, չե՞ ք պատրաստվում արդյոք տարբերվել նման հայտարարություններ անող

պաշտոնյաներից, և հղում անելով հանրակրթության մասին օրենքով դպրոցի և ծնողի միջև

կնքված պայմանագրով սահմանված ծնողի պարտականությանը, որն ասում է. «Ծնողը

պարտավոր է ստեղծել համապատասխան պայմաններ երեխայի զարգացման համար»,

հստակ սահմանել, թե դպրոցներում և մանկապարտեզներում երեխաների մշակութային

կրթությունն ապահովելու նպատակով ինչ ներդրում է ակնկալվում ծնողից, մենք

առաջարկենք։

Այս հարցը քննարկվել է նաև Երևանի ավագանու մշակույթի, կրթության և

սոցիալական հարցերի մշտական հանձնաժողովում, և հանձնաժողովի բոլոր անդամներս,

անկախ կուսակցության պատկանելիությունից, պատրաստ ենք համատեղ պատրաստել

անհրաժեշտ փաստաթուղթը. սա մեկ հարց։

Տարոն Մարգարյան

-Պատասխանեմ, տիկին Բախշյան: Որպես Երևանի քաղաքապետ, միանշանակ, ես

դեմ եմ դպրոցներում դրամահավաքությանը, և արգելելու եմ օրենքով տրված բոլոր այն

լիազորություններով, որ ես ունեմ որպես Երևանի քաղաքապետ, Երևան քաղաքի

հանրակրթական դպրոցներում պետք է բացառել դրամահավաքությունը։

Ինչ վերաբերում է աշակերտների, կամ աշակերտների ծնողների կողմից

ուսուցիչներին ծաղիկներ տալուն, ինձ թվում է՝ դա գեղեցիկ երևույթ է, երբ որ ծաղիկներ են

նվիրում մեկը մյուսին, դա ողջունելի է և որևէ մեկը դա չի կարող արգելել, բայց եթե

դպրոցում փորձում են թե՛ մանկավարժի, թե՛ որոշ կազմակերպիչների կողմից

դրամահավաքություն իրականացնել այդ ծաղիկները գնելու համար, այո՛, ևս մեկ անգամ

հայտարարում եմ, որ ես դեմ եմ դրան։ Եթե իրենք իրենց կողմից ուզում են ծաղիկ նվիրել

իրենց ուսուցչին, դա նորմալ է, մենք էլ ենք դպրոցում սովորել, մեր ժամանակներում էլ էինք

ծաղիկ նվիրում և դա շատ ողջունելի է, երբ որ ուսուցչին գնահատում են և ինչ-որ առիթով, դա

կլինի մարտի 8, ապրիլի 7, ամանորյա և ծննդյան օրերին ծաղիկներ նվիրելը։

Դուք Ձեր հարցն այնպես ձևակերպեցիք, որ իբր դպրոցներում այն վիճակն է, թե

դրամահավաքություն չկա։ Ժամանակ առ ժամանակ, հատկապես տոնական օրերին որոշ

մարդիկ փորձում են առիթից օգտվելով դրամահավաքություն կազմակերպել: Մենք դրա

7

մասին տեղեկատվություն ստանում ենք ծնողներից և մեր կողմից համապատասխան քայլեր

են ձեռնարկվում։

Ե՛վ Կրթության վարչությանը, և՛ վարչական շրջանների աշխատակազմերի

պատասխանատուներին, և՛ դպրոցի տնօրեններին հանձնարարված է, որ զերծ մնան նման

բաներից. ովքեր դրամահավաքությամբ զբաղվեն օրենքի խախտման համար խիստ

պատժվելու են։ Դա վերաբերում է նաև մանկապարտեզներին, ինչպես նաև մյուս մեր

կրթական, մշակութային օջախներին։

Անահիտ Բախշյան

-Իմ հարցի ենթատեքստն ավելի շատ ուղված էր մշակութային կրթությանը. այս

դրամահավաքի տակ արգելում են երեխաներին կազմակերպել տանել մշակութային

օջախներ, տանել թանգարաններ, տանել ներկայացումներ։ Դպրոցն ինքը վախենում է

կազմակերպելուց, ասում է, որ ծնողներից մեկը մի հատ անանուն զանգ կանի, և ես հավես

չունեմ։

Տարոն Մարգարյան

-Ես էլի եմ կրկնում, մանկավարժն իրավունք չունի զբաղվի դրամահավաքությամբ,

գումար հավաքի և փորձի այդ ձևով աշակերտներին տանել թանգարաններ, մշակութային այլ

օջախներ։ Դրա համար կա ծնողական խորհուրդ և ծնողական խորհուրդն է որոշում թե՛

Երևանում, թե՛ Երևանից դուրս աշակերտներին ուր տանել, իսկ դպրոցի տնօրենին և դպրոցի

անձնակազմին ես արգելել եմ նման գործընթացներին մասնակցել։

Անահիտ Բախշյան

-Պարոն Մարգարյան, այդտեղ շատ վտանգավոր բան կա։

Տարոն Մարգարյան

-Այստեղ ես վտանգավոր բան չեմ տեսնում։

Անահիտ Բախշյան

-Երկրորդ հարցս. յուրաքանչյուր երկուշաբթի քաղաքապետի գործակարգավարական

խորհրդակցության ժամանակ 33-րդ հսկողականի վերաբերյալ Վերահսկողության

վարչության պետի կողմից ներկայացվում է տարբեր թեժ գծերով եղած հեռախոսազանգերի

թիվը։ Դրանցից քանիսի՞ն է ընթացք տրվել և լուծում ստացել, քանիսին՝ ոչ։ Ընդ որում,

հայտարարվում է, թե լուծում են ստացվել զանգերի մեծամասնությունը, սա ոչ այլ ինչ է, քան

աշխատանքի իմիտացիա, որովհետև ականատեսն ենք, թե որքանով են լուծվում

8

քաղաքացիների կողմից բարձրացված գրավոր հարցերը։ Այդ ներկայացման ժամանակ չի

ասվում, թե զանգերից քանիսն են անվանական, և քանիսն անանուն, այսինքն՝ չկա

դիմումատուն: Այս զանգերի հետքերով գնացող Վերահսկողության վարչությունը, ըստ իր

կանոնադրության, պետք է օժանդակի քաղաքապետին վերահսկողության բնագավառում

նրան վերապահված լիազորություններն իրականացնելիս և ղեկավարվի օրենսդրությամբ։

Ստացվում է անանուն թեժ զանգի հետևանքով իրականացվում է վարչարարություն առանց

դիմումատուի և վերահսկողության կողմից, ըստ իրենց կանոնադրության, առաջարկություն է

ներկայացվում Ձեզ՝ այս կամ այն տնօրենին պատասխանատվության ենթարկելու

վերաբերյալ։

Հարց. չե՞ք կարծում, որ նախ թեժ գծերով անանուն զանգերը պետք է ուշադրության

չարժանանան վերահսկողության կողմից, որը կբարձրացնի քաղաքացիների

պատասխանատվությունը. իրենք կասեն, որ ես այս ինչ մարդն եմ, այս ինչ բողոքն ունեմ, ոչ

թե անանուն կզանգեն և ում վրա ասես ինչ ցեխ չեն թափի։ Եվ երկրորդ.

գործակարգավարականի ժամանակ վերանայվի Վերահսկողության վարչության պետի

տեղեկանքի բովանդակությունը, օրինակ՝ տեղեկություն տրվի, թե տվյալ շաբաթ ամենից շատ

ինչի մասին են ահազանգել մեր քաղաքացիները, իհարկե, խոսքն անվանական զանգերի

մասին է։ Խնդրում եմ՝ այս հարցն է։

Տարոն Մարգարյան

-Շնորհակալություն, տիկին Բախշյան. այո՛, Դուք ճիշտ եք, եթե թեժ գծով անանուն

զանգ է լինում մենք ընթացք ենք տալիս միայն այն տեղեկատվությանը, որն այլ աղբյուրներից

ևս ստացվել է։ Ես համաձայն եմ, ըստ օրենքի, անանուն թե՛ դիմումները, թե՛ զանգերը

քննման ենթակա չեն։ Ես կարծում եմ, որ քաղաքապետարանի Վերահսկողության

վարչությունը, այդ ամենին տիրապետելով, իր գործողությունները, բնականաբար,

իրականացնում է օրենքով սհամանված կարգով։ Այն դիմումները, որոնց հետևից

վերահսկողությունը գնում է և ուսումնասիրություններ է կատարում, բոլոր տվյալները մեզ

համար հայտնի են։

Ինչ վերաբերում է գործակարգավարական խորհրդակցությանը՝ Դուք առաջարկում եք

թե ես ինչ հանձնարարականներ տամ գործակարգավարական խորհրդակցության ժամանակ։

Թույլ տվեք՝ ես այստեղ արդեն իմ իրավունքները պաշտպանեմ։ Գործակարգավարական

խորհրդակցություններին ես եմ որոշում՝ ինչ հանձնարարականներ տալ, իսկ որ Դուք իմ

համաձայնությամբ ներկա եք գտնվում այդ խորհրդակցություններին, դա ընդամենն իմ բարի

ցանկությունն է: Ըստ կարգի՝ Դուք լիազորություն չունեք այդ խորհրդակցություններին

9

ներկա գտնվելու, ընդամենը Ձեր խնդրանքով ներկա եք գտնվում այդ

խորհրդակցություններին որպես խմբակցության ղեկավար, ինչպես նաև տիկին Պողոսյանը։

Դուք ուզում էիք տեսնել, թե քաղաքապետարանում ինչ հարցերի շուրջ են քննարկումներ

անցկացվում: Այդ հնարավորությունը ես տվել եմ և դա իմ ցանկությունն է եղել, քանի որ մենք

որևէ գաղտնի բան չենք քննարկում, համեցե՛ք, նստե՛ք, լսե՛ք: Բայց դա չի նշանակում, որ Դուք

ինձ արդեն հուշեք, թե ես խորհրդակցություններն ինչպես անցկացնեմ և ում ինչ

հանձնարարականներ տամ։ Երբ քաղաքացիները Ձեզ կվստահեն, Դուք կգաք և Դուք էլ Ձեր

ցանկությունները կիրականացնեք։ Այստեղ արդեն էթիկայի կանոն եք խախտում, չի կարելի։

Անահիտ Բախշյան

-Պարոն Մարգարյան, ցավում եմ, որ Դուք այդ տեսակետից եք նայում հարցին,

որովհետև մի ընտրված անհատ Դուք եք, մեկն էլ ես։ Մենք ընտրել ենք Ձեզ որպես

քաղաքապետ, հետևաբար ես որպես ընտրված մարդ իրավունք ունեմ մասնակցելու նաև

գործակարգավարական խորհրդակցությանը, որը նույն կառավարությունն է, ինչ որ

Հայաստանի կառավարությունը։

Ես կարծում եմ, որ Դուք պետք է ողջունեք, որ լսում ենք, որովհետև ես

գործակարգավարական խորհրդակցության ժամանակ ավելի շատ տեղեկատվություն եմ

ստանում, քան մեր ավագանու նիստերից և հասկանում, թե ինչ է կատարվում Երևանում։

Տարոն Մարգարյան

-Կրկնում եմ ձեր մասնակցությունը խորհրդակցություններին դա իմ բարի կամքի

դրսևորումն է։ Մեր խորհրդակցությունները կառավարության նիստերի հետ համեմատելը

ճիշտ չի։ Կառավարության նիստերում կայացվում են որոշումներ, իսկ քաղաքապետարանի

գործակարգավարական խորհրդակցությունների ժամանակ որոշումներ չեն կայացվում.

տարբերությունը դրա մեջ է։ Խորհրդակցություններին մասնակցելը Ձեր իրավունքների մեջ չի

մտնում: Դուք ավագանու իրավունքներն ու պարտականությունները վերցրեք և լավ նայեք։

Տարոն Մարգարյան

-Հաջորդ հարցը՝ «Հանրապետական կուսակցություն» խմբակցության անդամ Աննա

Ասատրյան, խնդրե՛մ, տիկին Ասատրյան։

10

Աննա Ասատրյան

-Շնորհակալություն, մեծարգո պարոն քաղաքապետ, վերջին տարիներին գաղտնիք չէ,

որ մայրաքաղաքում մեծ ծավալի աշխատանքներ են իրականացվել և իրականացվում՝

բարեկարգման, կառուցապատման, ոռոգման նոր համակարգերի անցկացման ուղղությամբ։

Հարցս հետևյալն է՝ մայրաքաղաքի վարչական տարածքում քիչ չեն նաև անավարտ

շինարարական օբյեկտները, կատարվել են հողային աշխատանքներ, կամ կառուցապատվել

են թերի, անավարտ են մնացել։

Ի՞նչ միջոցներ են ձեռնարկվում քաղաքապետարանի համապատասխան

ստորաբաժանումների կողմից նշված օբյեկտների տնտեսվարող սուբյեկտների նկատմամբ,

շնորհակալություն։

Տարոն Մարգարյան

-Հարցին կպատասխանի Երևան քաղաքի գլխավոր ճարտարապետ Տիգրան

Բարսեղյանը, խնդրե՛մ։

Տիգրան Բարսեղյան

-Շնորհակալություն հարցի համար։ Այս գործընթացը միշտ գտնվում է

քաղաքապետարանի հոգածության ներքո, և տարիներ շարունակ կուտակված խնդիրները,

որոնք մասնավորապես քաղաքի կենտրոնում գրավում են քաղաքացիների ուշադրությունը և

իրենց շինարարական տեմպերով ցանկալին չեն մատուցում, դրանք հետևանք են, ինչպես

գիտենք, նախկինում ձեռնարկված խիզախ, առողջ մտածելակերպով նախագծային

գործընթացների իրականացման, որոնց շնորհիվ պետք է քաղաքն իր վերջնական տեսքին

գա։

Մենք, գաղտնիք չէ, որ ունեցել ենք տնտեսական անկումներ՝ կապված միջազգային

տնտեսական անկումներից ածանցված գործընթացների հետ, և դրանք այսօր իրենց

ազդեցությունն են ունենում նաև մեր մայրաքաղաքի վրա։ Այդ գործընթացի հետ կապված՝

մենք տարբեր բանակցական միջոցառումներ ենք իրականացրել կառուցապատողների հետ և

ունենք որոշակի տեղերում մեծ առաջընթացներ:

Ես, եթե հարկ համարեք, դրանք կանցնեմ հերթով, և դրանք իրենց ընթացքը կրում են,

մասնավորապես, վերջին երևույթների հետ կապված՝ Դվին հյուրանոցի կառուցման

ընթացքը։ Երեկ չէ առաջին օրը մենք ունեցել ենք հանդիպում երկու նախագծային խմբերի

ղեկավարների հետ, կառուցապատողների հետ միասին, և այդ քանդման ուժեղացման

աշխատանքները համատեղ արտասահմանյան նախագծային խմբի և տեղական

ճարտարապետների հետ, որոնք Դվին հյուրանոցի հեղինակային կոլեկտիվի անդամներն են,

11

կոնստրուկտորները, ճարտարապետները: Քննարկումներ ենք արել և եկել ենք ընդհանուրի,

որ նրանք, համատեղ աշխատանքը տանելով, գործընթացը չխոչընդոտեն։ Մեծ ներդրումներ

են անկնկալվում, և դրանք ընթացքի մեջ են։ Աշխատանքները տարիներ շարունակ, ինչպես

գիտեք, օբյեկտիվ պատճառներով ընդհատված էին, հիմա ընթացք են կրել և տարբեր

քննարկումների առիթ են եղել։

Ինչ վերաբերում է կրկեսին՝ մինչև տարվա վերջ կրկեսի շինարարությունը ձեռք կբերի

իր արգասային ավարտուն տեսքը, և հաջորդ երկու տարվա ընթացքում նա կունենա իր

ավարտական տեսքը։

Տարբեր գործընթացներ կան կապված Կասկադի իրականացման հետ. այն իրավական

խնդիրների դաշտում է գտնվում։ Արտասահմանյան կառուցապատողի իրավունքների

փոխանցման գործընթաց է, որը տևական ժամանակ է պահանջում, և դա էլ այդ փուլում է

գտնվում։

Մենք վերջերս ճարտարապետաշինարարական առաջադրանք և շինարարական

թույլտվություն, հաստատված նախագիծ ենք տվել Աբովյանի փողոցի վրա՝ Ազնավուրի

հրապարակում, կառուցվող հյուրանոցի, «Մուլտի Գրուպ» խմբի պատասխանատուներին

տվել ենք այդ առաջադրանքը, և նրանք շինարարությունը պետք է սկսեն, ոչ մի խոչընդոտ

չկա դրա համար։ Այլ հարցեր եթե կան, որոնք որ Ձեզ հուզում են այլ կետերում, ես կարող եմ

դրանց վրա սևեռվել՝ խնայելով մնացած կետերը, որոնք որ կարող են Ձեզ չհետաքրքրել։

Աննա Ասատրյան

-Շատ շնորհակալություն, ես լիովին բավարարված եմ։

Տարոն Մարգարյան

-Ես, ամեն դեպքում, տիկին Ասատրյան, ավելացնեմ գլխավոր ճարտարապետի

խոսքին. Երևանի Փոքր Կենտրոնի մասին, գիտեք որ օրենք է մշակվում և շուտով կընդունվի.

նախագիծն ավարտական փուլում է։ Քաղաքաշինության նախարարի, նախարարության

համապատասխան պատասխանատուների և քաղաքապետարանի պատասխանատուների

համատեղ մշակած Երևանի Փոքր Կենտրոնի մասին օրենքի նախագծի 90%-ը արդեն

պատրաստ է, մոտ ժամանակներս ավարտին կհասցնենք և կներկայացնենք

Կառավարություն, հետո էլ Ազգային ժողով։

Զուգահեռ նաև հետևյալ առաջարկն է եղել թե՛ մեր ճարտարապետների և թե՛ այն

քաղաքացիների կողմից, ովքեր կիսակառույցների հետ կապված մտահոգություններ են

հայտնում, դա նաև քաղաքապետարանի աշխատակազմի մտահոգությունն է։ Առաջարկել

ենք Քաղաքաշինության նախարարին, որ Փոքր Կենտրոնում այն կիսակառույցները, որոնց

12

սեփականատերերը տարիներ շարունակ չեն հասցնում կառուցել, այդ հարցերը կարգավորվի

օրենքով։ Հիմա մեր իրավաբանները և մասնագետները քննարկում են այդ հարցը, թե ինչ

ձևով կարողանանք պատժամիջոցներ կիրառել այն շինարարների և այն

կառուցապատողների նկատմամբ, ովքեր երկար տարիներ սկսած շինարարությունը կիսատ

են թողնում։ Սա մեր ուշադրության կենտրոնում է, և երբ որ ավարտին հասցնենք,

Կառավարությունն էլ հավանություն տա և ներկայացնենք Ազգային ժողով, անպայման Ձեզ

արդյունքների մասին կտեղեկացնենք։ Մեկ օր շուտ մեզ անհրաժեշտ է այս օրենքն ընդունվի,

որ մենք կարողանանք քայլեր ձեռնարկել։

Աննա Ասատրյան

-Շատ շնորհակալություն։

Տարոն Մարգարյան

- Հաջորդ հարցը՝ «Բարև Երևան» խմբակցություն, Դավիթ Սանասարյան, խնդրե՛մ,

պարոն Սանասարյան։

Դավիթ Սանասարյան

-Շնորհակալություն, պարոն Մարգարյան։ Բոլորս գիտենք, որ Մարկ Գրիգորյանի

նախագծած Աճառյանի դպրոցը նվիրվեց «ՀԱՊԿ» ակադեմիա կոչված կառույցին։ Ես

տեղեկություն ունեմ, ճարտարապետներն են հայտնել, որ նախագիծն արվել է

Երևաննախագծի կողմից, Երևանի քաղաքապետարանի պատվերով։

Արդյոք իրականությանը համապատասխանում է սա, իսկ եթե այո, ապա ինչու՞ է

Երևանը «ՀԱՊԿ»-ի համար նախագիծ պատվիրում և ի՞նչ բյուջեով, և ո՞վ է կառուցելու։ Սա մի

հարցս, պարոն Մարգարյան։

Տարոն Մարգարյան

-Այո՛, պարոն Սանասարյան, ճիշտ եք նկատել, Երևաննախագիծն է դա իրականացրել,

քանի որ դա համարվում է պետական սեփականություն և «ՀԱՊԿ»-ի սեփականությունը չի,

այլ մենք տվել են իրենց անհատույց օգտագործման և ամբողջ ֆինանսավորումը համոզված

եղեք չի կատարվում ո՛չ Երևան համայնքի, ո՛չ էլ պետական բյուջեներից։

Դավիթ Սանասարյան

-Պարոն քաղաքապետ, ճի՞շտ հասկացա, որ Երևաննախագիծն է անում, բայց ոչ

Երևանի պատվերով։

13

Տարոն Մարգարյան

-Մեր պատվերով է իրականացվել նախագիծը, գտել ենք ճիշտ, որ Երևաննախագծի և

մեր մասնագետների մասնակցությունը լինի այդ շենքի վերակառուցման գործում, և բացի այդ

ցանկանում ենք ապահովել շենքի պատմամշակութային մասի պահպանումը։ Տեղյակ եք, որ

փլուզում տեղի ունեցավ այնտեղ, ծավալները մեծացան, բայց դա չի խանգարում

պատմամշակութային դետալների պահպանմանը։ Դա ապահովելու համար

անհրաժեշտություն կար, որպես պետական գույք, պատվիրատուն լիներ Երևանի

քաղաքապետարանը, բայց հետագայում այն պետք է տրվի օգտագործման, և օգտագործողն էլ

պետք է այդ ներդրումներն իրականացնի:

Այսինքն, մենք այստեղ, պարոն Սանասարյան, ցանկությունն ենք հայտնել, որ

մասնակից լինենք պետական գույքի վերակառուցմանը և ընդլայնմանը։ Ֆինանսական որևէ

խնդիր չկա։

Դավիթ Սանասարյան

-Այս հարցի վերաբերյալ ես գրավոր ավելի մանրամասն հարցերս կձևակերպեմ։

Տեղեկացնեմ, որ Մշակույթի նախարարությունը եզրակացություն չի տվել դրա վերաբերյալ։

Տարոն Մարգարյան

-Ինչի՞ն չի տվել եզրակացություն։

Դավիթ Սանասարյան

-Դա, որպես մշակութային արժեք, Մշակույթի նախարարությունը եզրակացություն չի

տվել։ Այս ինֆորմացիան հստակ է։

Երկրորդ հարցը, պարոն Մարգարյան. վստահ եմ, որ բոլորս տեղյակ ենք

հանրապետությունում, մասնավորապես, Երևանում տարածված վիրուսների վերաբերյալ,

որի տուժողը, առավելապես, մանկահասակները, դեռահասներն են։ Ես փորձել եմ

ուսումնասիրել տարբեր մանկապարտեզներ և հասկացել եմ, որ երեխաների

հաճախելիությունը կտրուկ նվազել է երկու անգամ և ավելի։

Կցանկանայի իմանալ՝ ինֆորմացիա կա՞ վիճակագրության վերաբերյալ, թե ինչքան

երեխայի է վերաբերում, և ընդհանրապես, բայց հատկապես երեխաներին։

Երկրորդը՝ կանխարգելիչ ի՞նչ քայլեր են իրականացվում և արդյոք հնարավոր է

որոշակի ժամանակով դադարեցնել հաճախումները մանկապարտեզներ, որովհետև վիրուսը

բավականին բարդ վիրուս է և տարբերվում է նախորդ վիրուսներից։

14

Տարոն Մարգարյան

-Շնորհակալություն, պարոն Սանասարյան, ես անդրադառնամ Ձեր առաջին հարցին.

շենքի վերանորոգման վերաբերյալ Մշակույթի նախարարության կողմից եղել է

համաձայնություն։

Ինչ վերաբերում է երկրորդ հարցին. իրականում, շատ լավ հարց եք տալիս: Արդեն մի

քանի օր է՝ Առողջապահության և Կրթության վարչությունների կողմից ստեղծվել է

հանձնաժողով։ Ինչպես նաև, կրթության և գիտության նախարարի հետ անձամբ ես եմ խոսել,

կան Առողջապահության նախարարությունից ներկայացուցիչներ, ովքեր ամենօրյա

ուսումնասիրություններ են կատարում։

Քաղաքապետարանի Առողջապահության և Կրթության վարչություններն ստանում են

ամենօրյա տվյալներ և վերլուծում դրանք։ Վարչական շրջանների ղեկավարները

ներգրավված են այս ամենի մեջ։ Միևնույն ժամանակ պոլիկլինիկաներում սահմանել ենք

հերթապահություն, որ մեր քաղաքացիները շաբաթ-կիրակի օրերին կարողանան օգտվել

պոլիկլինիկաներից։ Իրավիճակն այսօրվա դրությամբ, հատկապես, մանկապարտեզներում

այդքան էլ մտահոգիչ չէ։

Ես կարող եմ հստակ թվեր հնչեցնել. Երևան քաղաքում ամսի 3-ի դրությամբ

մանկապարտեզներ են այցելել 25.000 երեխա, իսկ ամսի 17-ին՝ 23.000. ընդամենը 10%-ի

մասին է խոսքը գնում: Մեր ուսումնասիրությունների արդյունքում 10%-ից ընդամենը 5%-ն է,

որ հիվանդության պատճառով չեն այցելել։ Ամեն օր մենք թարմ տեղեկատվություն ենք

ստանում և այն մանկապարտեզներում, որտեղ կունենանք երեխաների բացակայության աճ,

պոլիկլինիկաներից կճշտենք այդ երեխաների բացակայությունների պատճառը:

Բնականաբար, անհրաժեշտության դեպքում մենք մի քանի օրով կարող ենք փակել

մանկապարտեզը, որ մյուս երեխաները չհիվանդանան։ Բայց այս պահին նման վտանգ չկա և

չի էլ սպասվում, որ Երևան քաղաքում մանկապարտեզները փակվեն։

Մենք դպրոցների խնդիրները լուծեցինք, արձակուրդները երկարաձգվեցին։

Մանկապարտեզները, ինչպես նշեցի, մեր հսկողության տակ են և հանձնարարական է

տրվել Կրթության վարչության պետին, վարչական շրջանների ղեկավարներին՝ այն

մանկապարտեզում, որտեղ բացակայությունների աճ կգրանցվի, հաջորդ օրը մի քանի օրով

փակել։ Պետք չէ խուճապի մատնվել, ամբողջությամբ իրավիճակը հսկողության տակ է, եթե

հանկարծ խնդիր լինի մենք հանրությանն անմիջապես կտեղեկացնենք։

Հաջորդ հարցը՝ «Հանրապետական կուսակցություն» խմբակցության անդամ Աստղիկ

Գևորգյան, խնդրե՛մ։

15

Աստղիկ Գևորգյան

-Շնորհակալություն, մեծարգո պարոն քաղաքապետ, հիանալի է, որ մենք ունենք

«Երևանի պատվավոր քաղաքացի» կոչում: Իրոք, պատվավոր է այդ կոչումը, հպարտանում

ենք մենք դրանով։ Շնորհակալության է արժանի այն, որ պետական և համազգային տոներին

Դուք հրավիրում եք Երևանի պատվավոր քաղաքացիներին, ովքեր մեզ հետ միասին լինում

են այդ մթնոլորտում։ Հարցս հետևյալն է. կա՞ որևէ արտոնություն Երևանի պատվավոր

քաղաքացիների համար, եթե ոչ, ապա կա՞ նման ծրագիր, որովհետև նրանք կենսագրություն

ունեցող, փառավոր ճանապարհ անցած մարդիկ են, հանրության համար ծանոթ։ Եթե լինի

ավելի լավ վերաբերմունք՝ ուղղակի ավելի կարժևորվեն նրանք։

Տարոն Մարգարյան

-Շնորհակալություն, տիկին Գևորգյան։

Սկսած 1983թ. Երևան քաղաքի զարգացման գործում նշանակալի ավանդ ունենալու

համար Հայաստանի Հանրապետության և օտարերկրյա քաղաքացիներին շնորհվում է

«Երևանի պատվավոր քաղաքացի» կոչում։ Կոչումը, քաղաքապետի առաջարկությամբ,

շնորհվում է Երևան քաղաքի ավագանու կողմից և ավանդույթի համաձայն «էրեբունի–

Երևան» տոնակատարության շրջանակներում, հանդիսավոր պայմաններում հանրահայտ

մարդկանց տրվում է պատվավոր քաղաքացի հուշամեդալ, վկայական և կրծքանշան։

1983-2015թթ. ընթացքում «Երևանի պատվավոր քաղաքացի» կոչում տրվել է 101

հայտնի անձանց, որոնցից 24–ը օտարերկրյա քաղաքացիներ են, 77-ը ՀՀ քաղաքացիներ։ 101

պատվավոր քաղաքացիներից 46-ը մահացել են, 55-ը ողջ են /46-ը ՀՀ քաղաքացիներ/։

Պատվավոր քաղաքացի կոչումն արդեն իսկ մեծ պատիվ է, նրանց անունները գրվում

են հատուկ մատյանում, գրանցվում Երևան քաղաքի պատմության թանգարանում։ Ամեն

տարի «Էրեբունի» թանգարանում կազմակերպվում է պատվավոր քաղաքացիների հավաք,

ուր քննարկվում են Երևանի խնդիրներն ու նվաճումները։

«Երևան քաղաքում տեղական ինքնակառավարման մասին» ՀՀ օրենքի ընդունումից

հետո առաջին և երկրորդ գումարման Երևան քաղաքի ավագանու կողմից «Երևանի

պատվավոր քաղաքացի» կոչում է շնորհվել Հայաստանի Հանրապետության 14 քաղաքացու։

Եթե դուք ունեք առաջարկություններ արտոնություններ սահմանելու մասին,

ներկայացրեք, կքննարկենք։

Հաջորդ հարցը՝ «Բարև Երևան» խմբակցության անդամ Գագիկ Բաղդասարյան։

16

Գագիկ Բաղդասարյան

–Շնորհակալություն, պարոն Մարգարյան։

Հարցը, որի մասին ես կխոսեմ, անհանգստացնում է հազարավոր երևանցիների, ըստ

էության, մասնավորապես այսօրվա, պարոն Նիկոյանի ներկայացնելուց հետո, որ 2014թ.

բյուջեով մենք ասֆալտապատման նպատակով Երևանում ծախսել ենք 10 միլիարդից ավելի

գումար։ Այս հարցն անհանգստացնում է երևի 100% մեր երևանցի վարորդներին.

ասֆալտապատման որակը և ճանապարհների վիճակը։

Կոնկրետ կցանկանայի լսել Ձեր դիրքորոշումը դիտահորերի վերաբերյալ, այն

տեխնիկական պայմանները, որոնցով որ իրականացվում են այդ ասֆալտապատման

աշխատանքները, շատ ժամանակ չեն պահպանվում և դիտահորերը, որոնք որ ունեն շուրջ

արդեն երևի թե 40-50 տարվա շահագործման ժամկետներ, դարձել են անօգտագործելի։

Գաղտնիք չէ ոչ մեկիս համար, որ այդ դիտահորերի վրայով երթևեկելու արդյունքում,

բավականին լուրջ ճանապարհատրանսպորտային վթարներ են տեղի ունենում դրանք

շրջանցելու և այլնի պարագայում։ Այսօրվա դրությամբ կան շատ հետաքրքիր տեխնիկական

լուծումներ այդ հարցի հետ կապված, նույնիսկ համացանցում կա տեսանյութ տեղադրված,

թե ինչպես կարելի է մասնակի այդ դիտահորերը և դրանց կափարիչները վերանորոգել։

Արդյոք մենք պլանավորում ենք հետագայում այդ վերանորոգումները, մասնակի, կոնկրետ

դիտահորերի վերաբերյալ իրականացնել և փոխել այդ հնամաշ դիտահորերը։

Կոնկրետ Աջափնյակում, ես ասեմ, որ Մարգարյան և Հալաբյան փողոցներում, ավելի

կոնկրետ Հալաբյան փողոցը մի տարի չկա որ վերանորոգել ենք, արդեն այդ դիտահորերն

այնքան են խարխլվել, որ ասֆալտի ծածկույթն է վնասվում և կարիք է առաջանում նորից

ընթացիկ վերանորոգման աշխատանքներ կատարել, իսկ եթե մենք կապիտալ

վերանորոգումների ժամանակ փոխենք և նորը տեղադրենք, հետևաբար ասֆալտապատ

տարածքն ավելի երկար կծառայի, և երևանցիները գոհ և շնորհակալ կլինեն մեզանից։

Հարցս. արդյոք մենք նախատեսում ենք այդ աշխատանքներն իրականացնել և

տեղյա՞կ են այդ նորամուծություններից։

Տարոն Մարգարյան

-Շնորհակալություն, պարոն Բաղդասարյան, բնականաբար, ավելի քան տեղյակ ենք

այդ նորամուծությունների մասին։ Քաղաքապետարանի պատասխանատուները

պարբերաբար ուսումնասիրում են նաև այլ երկրների փորձը։ Ինչ վերաբերում է

ասֆալտապատման աշխատանքներին՝ պարոն Նիկոյանն իր հաշվետվության ժամանակ

հնչեցրեց թվերը և տարբերակեց՝ ընթացիկ ասֆալտապատման, փողոցների կապիտալ

17

վերանորոգման, գրունտային ասֆալտապատման աշխատանքները: Բնականաբար, որտեղ

մենք ընդհանուր կապիտալ վերանորոգման աշխատանքներ ենք իրականացնում, այդ

դիտահորերը փորձում ենք վերականգնել կամ փոխարինել նորերով։ Ինչ վերաբերում է

որակին, մենք պայմանագրեր ունենք մրցույթում շահած բոլոր կազմակերպությունների հետ,

որոնք 3 տարի շարունակ պետք է շահագործեն այդ փողոցները, վերացնեն այն

թերությունները, որոնք հայտնաբերվել են։

Պարբերաբար մեր համապատասխան ծառայությունների կողմից աշխատանքներ են

տարվում թերությունները հայտնաբերելու ուղղությամբ և տվյալ աշխատանքներն

իրականացրած կազմակերպությանը մեր կողմից հանձնարարական է տրվում վերացնել

հայտնաբերված թերությունները։ Ես ուզում եմ ձեզ տեղեկացնել, որ այն մասնավոր

ընկերությունները, ովքեր վերջին 3 տարվա ընթացքում մրցույթը շահել են և որոշ

փողոցներում ասֆալտապատման աշխատանքներ են իրականացրել, գրեթե ամեն տարի

շուրջ 50.000քմ ասֆալտապատման աշխատանքներ են կատարում իրենց կազմակերպության

միջոցներով։ Երևանցիների կողմից հաճախ դժգոհություն է լինում, որ ընդամենը 6 ամիս

առաջ այս կամ այն փողոցն ասֆալտապատեցին ու հիմա կրկին քանդել ասֆալտապատում

են։

Առիթից օգտվելով ցանկանում եմ տեղեկացնել մեր հասարակությանը, որ դա

քաղաքապետարանի կողմից չի իրականացվում, ընդհակառակը, քաղաքապետարանն

արձանագրել է այդ բացթողումները և պահանջում է տվյալ կազմակերպությանն իր

բացթողումները վերացնել, որն իրականացվում է իրենց ֆինանսական միջոցներով։

Ինչ վերաբերում է դիտահորերին, այո՛, լուրջ խնդիր է մեզ համար։ Երևան քաղաքում

նախկինում այսքան ծանր և մեծ թվով մեքենաներ չեն եղել, ուստի այն դիտահորերը, որ դեռ

կառուցված են եղել 30-40, 50 տարի առաջ, նախատեսված չեն եղել ծանր մեքենաների

համար, և մենք քայլեր պետք է ձեռնարկենք այդ խնդիրը ժամանակի ընթացքում լուծելու

համար։ Դրանք մեծ ֆինանսական ծախսերի հետ են կապված։

Հիմնականում դիտահորերը «Երևան ջուր» ընկերության բալանսում են և նրանց հետ

համատեղ աշխատանքներ են տարվում այդ խնդրին լուծում տալու համար։ Կցանկանայի

ավելացնել, որ «Երևան ջուր» ընկերության հետ պայմանագրի ժամկետը ավարտվում է 2016թ.

և լինելու է նոր մրցույթ։ Կառավարության կողմից արդեն համապատասխան հանձնաժողով է

ստեղծվել, որը պատրաստում է նոր մրցույթի փաթեթ։ Մեր ներկայացուցիչը նույնպես

ընդգրկված է այդ գործում և այն բացթողումները, որոնք ժամանակին տեղ են գտել նախկին

պայմանագրերում, հնարավորություն կա շտկելու։

Անպայման հաշվի ենք առնելու ոչ միայն դիտահորերի, նաև բազմաբնակարան

18

շենքերի նկուղներում կատարվող աշխատանքների հարցերը։ Մենք կարծում ենք, ով

մատակարարում է, նա էլ պետք է սպասարկումն իրականացնի։ Քննարկումներն ընթացքի

մեջ են, ավարտելուց հետո արդյունքների մասին կտեղեկացնենք։

Տարոն Մարգարյան

-Հաջորդ հարցը՝ «Հանրապետական կուսակցություն» խմբակցության անդամ

Ռուզաննա Սիրունյան, խնդրե՛մ։

Ռուզաննա Սիրունյան

-Շնորհակալություն, մեծարգո պարոն քաղաքապետ 2014թ. մենք ականատես եղանք

Երևանի քաղաքապետարանը և անձամբ Դուք նախաձեռնեցիք մի շարք առողջապահական

միջոցառումներ և ծրագրեր։ Արդյոք 2015թ. շարունակական են լինելու այդ ծրագրերը և ի՞նչ

նոր ծրագրեր կան։

Տարոն Մարգարյան

-Շնորհակալություն տիկին Սիրունյան, թե՛ առողջապահական, թե՛ մշակութային, թե՛,

ինչպես նշեց մեր ավագանու անդամ պարոն Կետիկյանը, ծնողների այցելությունները

սահմանամերձ զորամասեր, բոլոր ծրագրերը շարունակական են լինելու։ Փորձելու ենք այս

ծրագրերը մեր բոլոր քաղաքացիների համար հասանելի դարձնել։ Այս տարի էլ ենք

իրականացնելու և հետագայում ոչ միայն մասնավոր առողջապահական հիմնարկներն են

ընգրկվելու, նաև՝ Առողջապահության նախարարության և Երևան համայնքի ենթակայության

տակ գտնվող բոլոր առողջապահական հիմնարկները։ Իրենք էլ իրենց հերթին

պատրաստակամությունն են հայտնել աջակցելու, օգնելու և բոլոր ծրագրերին մասնակից

դառնալու։

Օգտվելով առիթից՝ ցանկանում եմ շնորհակալություն հայտնել բոլոր այն մասնավոր

հիվանդանոցներին, բուժհաստատություններին և Առողջապահության նախարարության

ենթակայության հիմնարկներին, որոնք մասնակցել են քաղաքապետարանի կողմից

նախաձեռնած ծրագրերին։

Հիմա մեկամսյակն ենք հայտարարել, որը շարունակվելու է մինչև ապրլի 7-ը։ Ուզում

եմ տեղեկացնել մեր համաքաղաքացիներին, որ մինչև ապրիլիր 7-ը ով գրանցվեց նրան

հնարավորություն կտրվի օգտվելու նախատեսված արտոնություններից։

Ռուզաննա Սիրունյան

-Շնորհակալություն։

19

Տարոն Մարգարյան

-«Բարև Երևան» խմբակցության անդամ պարոն Սաֆարյան, խնդրե՛մ։

Ստեփան Սաֆարյան

-Շնորհակալություն, պարոն Մարգարյան։ Իմ հարցի մեջ արծարծվող խնդիրն

իրականում վաղուց է, ինչ չի գտնվում Երևանի քաղաքապետարանի իրավասության

դաշտում։ Հարցը վերաբերում է Երևան քաղաքում երթևեկության կարգավորմանը, և ես այն

բարձրացնում եմ, որովհետև մեր քաղաքացիները, անշուշտ, իրավացի են, որ Երևան քաղաքի

ցանկացած խնդրով նաև մեզ են դիմում, բայց նաև տեղյակ չեն, որ այս հարցը մեր

կարգավորման դաշտում չէ։

Մի հրաշալի երևանցի՝ Տիգրան Սարաֆյան, դիմել է նախ պարոն Նավասարդյանին,

առաջ քաշելով երկու խաչմերուկների կարգավորման խնդիր, այնուհետև, իհարկե

չիմանալով, կարծում եմ, որ հարցը Երևանի քաղաքապետարանի իրավասության ներքո չէ՝

գրել է նաև ինձ։ Քաղաքացին, ինչպես և մեզ հանդիպած շատ այլ մեր երևանցիներ իր

դիտարկումներն է կատարել Երևան քաղաքի խցանումների հետ կապված. Կոմիտաս

պողոտա Փափազյան խաչմերուկի կամ Բարեկամության հրապարակ Կիևյան այդ հատվածի

հետ կապված իր դիտարկումներն է արել և գտնում են, որ իրականում սխալ մոտեցումների և

սխալ գծանշումների արդյունքում է, որ այս խցանումները լինում են։

Կարծում եմ մեզանից շատերի կամ միգուցե մեր սեփական նմանատիպ

դիտարկումները Երևան քաղաքի այլ հատվածների հետ կապված, ես օրինակ շատ եմ լսել

նույնպիսի դիտարկումներ Մյասնիկյան պողոտայի վերաբերյալ, որով ըստ էության Նոր

Նորք և Ավան վարչական շրջաններ են կապվում։ Չեմ մտնելու այս դաշտ, որովհետև ես

հարցում պրոֆեսիոնալ չեմ, բայց նաև հարցը բարձրացնում եմ հետևյալ կտրվածքով. ի

նկատի ունենալով, որ սա մի հարց է, որը, իհարկե, չի մտնում Երևանի քաղաքային

իշխանությունների իրավասության ներքո, բայց այնուամենայնիվ, այս հարցում, կարծում եմ

Երևանի քաղաքապետարանի շահագրգռությունը չափազանց մեծ է, որովհետև իրեն են

վերագրում շատ հաճախ, սխալմամբ և այլն։ Չեք կարծում, որ խնդիրը մենք կարող ենք լուծել

ավելի համալիր մոտեցում ցուցաբերելու միջոցով։

Ես, անշուշտ, այս գրությունը, քաղաքացու կողմից առաջարկված լուծումներով,

ուղարկելու եմ ոստիկանությանը, որը զբաղվում է այս հարցով։ Քանի որ այսպիսի խնդիրներ

պարբերաբար բարձրացվում են և «Բարև Երևանն» ինքը գծանշումների և փողոցային

երթևեկության կանոնների հետ կապված հարց բարձրացրեց 2015թ. բյուջեի քննարկման

ծրագրի հետ կապված. լուսադիրների, բոլոր դեպքերում երթևեկության կարգավորման հետ

20

առնչվող մեկ այլ խնդրի հետ կապված, այսինքն մենք ունենք խնդիր, որտեղ մենք կարող ենք

շահագրգռություն ցույց տալ և համալիր լուծումներ փնտրել իրավասու գերատեսչության՝

տվյալ պարագայում Հայաստանի Հանրապետության ոստիկանության համապատասխան

ստորաբաժանման հետ։

Ինչպե՞ս կտեսնեք ինքներդ այս մոտեցումը, թե միգուցե, իսկապես այսպես մենք

նամակներն ստանաք և հասցեագրենք, բայց սա էլ կարծում եմ, լուծում չէ, շնորհակալություն։

Տարոն Մարգարյան

-Շատ շնորհակալություն, պարոն Սաֆարյան, ինչպես Դուք նշեցիք հարցը մեր

լիազորությունների շրջանակում չէ, բայց դա չի նշանակում, որ մենք մտահոգված չենք։ Մենք

բոլորս մտահոգված ենք Երևան քաղաքում երթևեկության խնդիրներով։ Այո՛, շատ

դեպքերում քաղաքացիները համարում են, որ դա Երևանի քաղաքապետարանի

աշխատակազմի պատասխանատուների լիազորությունների մեջ է մտնում և դիմում են մեզ։

Մենք մեր կողմից ամեն տարի որոշակի քայլեր ենք ձեռնարկում. ճանապարհային

ոստիկանության հետ և ստեղծել ենք համատեղ աշխատանքային խումբ։ Ես կխնդրեի նման

դիմումները տրամադրել մեր Տրանսպորտի վարչությանը, փորձենք ճանապարհային

ոստիկանության հետ քննարկել. թե՛ դրական, թե՛ բացասական արդյունքների մասին

կտեղեկացվի և՛ դիմողին, և՛ Ձեզ։

Բնականաբար, այդ խնդիրները հնարավորության սահմաններում փորձում ենք

լուծել, իսկ մեծ ծախսերի հետ կապված խնդիրները փորձում ենք ներառել մեր հետագա

ծրագրերում։ Ճանապարհային ոստիկանությունը նույնպես կարևորում է այդ խնդիրը։ Մեր

քաղաքացիների կողմից ներկայացված բոլոր առաջարկությունները պատրաստ ենք

քննարկել և հնարավորության դեպքում լուծում տալ։

Ստեփան Սաֆարյան

-Շնորհակալություն պատասխանի համար, շատ կարճ ասեմ, որ, անշուշտ, ինչպես

նշեցինք, մեր իրավասության դաշտում չէ, բայց մեր մեծ շահագրգռության դաշտում է

խնդիրը։ Եվ եթե կա արդեն այդ աշխատանքային խումբը, որ գործում է Երևանի

քաղաքապետարանի, ապա հենց այդտեղ մենք կարող ենք առաջարկություններ

ներկայացնել, շնորհակալ եմ։

Տարոն Մարգարյան

-Այո՛, պարոն Սաֆարյան, Տրանպորտի վարչության պետ պարոն Նավասարդյանի

հետ փորձեք քննարկել Ձեր բարձրացրած հարցը։ Ավելացնեմ, որ պարբերաբար,

21

ճանապարհային ոստիկանության հետ նման հարցեր քննարկվում են, ամիսը մեկ-երկու

անգամ հրավիրվում են նիստեր, և եթե անհարժեշտություն լինի, ու եթե պարոն Սաֆարյանը

ցանկություն ունի, թող մասնակցի այդ նիստերին և այդ առաջարկությունները ներկայացնի։

Այսքանը, «Հանրապետական կուսակցություն» խմբակցության անդամ Կամո

Հովհաննիսյանը հանել է իր հարցը։

Հարցերը ավարտվեցին, ավագանու հարգելի անդամնե՛ր Երևանի ավագանու 5-րդ

նստաշրջանի 2-րդ նիստը հայտարարում եմ փակված։

Շնորհակալություն, ցտեսություն:

ԵՐԵՎԱՆԻ ՔԱՂԱՔԱՊԵՏ Տ. ՄԱՐԳԱՐՅԱՆ

Կազմեց՝ Ա. Եփրիկյան