spreuke 12:10 nlv - the word for...

2017/04/01

Spreuke 12:10 NLV

Troeteldiere is ‘n gawe van God

‘n Man het aan ‘n hotel, waar hy vakansie wou gaan hou, geskryf en gevra, ‘Kan ek my

hond saambring? Hy is baie soet.’ Die hoteleienaar het geantwoord, ‘Ek bestuur hierdie

hotel nou al vir dertig jaar en in al daardie tyd het ‘n hond nog nooit die handdoeke,

beddegoed, eetgerei of skilderye gesteel nie. Ek moes nog nooit ‘n hond vra om die

hotel te verlaat omdat hy dronk was nie en geen hond het nog ooit die hotel verlaat

sonder om sy rekening te betaal nie. Jou hond is welkom. Verder, as jou hond vir jou kan

borg staan, is jy ook welkom.’ Salomo skryf, ‘Die regverdige gee om vir sy diere.’ Het jy al

ooit goddelikheid vanaf hierdie perspektief oorweeg? Miskien dink jy, ‘Dit klink nie baie

geestelik nie.’ Dink weer! ‘Van Bo af kom net goeie, ja, volmaakte gawes...’ (Jakobus 1:17

NLV). Baie mense wat rou, se verlies word draagliker gemaak deur ‘n troeteldier wie se

liefde en lojaliteit hulle help om aan te gaan. Het jy geweet dat mense met troeteldiere

langer lewe, gesonder is, vinniger herstel en minder depressie ervaar? Wie sal ooit die

honde gedurende 9/11 vergeet wat deur die verwoesting van die World Trade Center

gesoek het, al tjankend omdat hulle nie diegene wat gesterf het, kon red nie? En wat

van die opgeleide honde wat sig gee aan die blindes? Dit klink nogal geestelik! Toe God

ons troeteldiere geskep het, het Hy gesien dat dit goed is. Hoekom het Hy dit gesê?

Omdat troeteldiere die deugsaamheid van mense het, sonder enige van hulle foute.

Kom ons erken hulle dus as ‘n gawe van God, kom ons wees dankbaar vir hulle en kom

ons sorg goed vir hulle!

Sielskos: Jer 28-30; Luk 21:12-24; Ps 72:12-20; Spr 9:7-9

2017/04/02

Romeine 5:1 NLV

Vrede kom deur Christus te vertrou

Charles Stanley vertel dat hy vir sy kelnerin gevra het, ‘As jy enigiets van God kon vra, wat

sou dit wees?’ Onmiddellik het sy geantwoord, ‘Ek wil vrede hê.’ Deur haar trane het sy

vertel van hartseer verliese wat haar lewe intens emosioneel beïnvloed het. Baie mense,

soos hierdie jong vrou, wil innerlike vrede sonder ‘n verhouding met Jesus, die Prins van

Vrede, hê. Hulle soek dit deur maniere wat nie werk nie – oefening, finansiële sekuriteit,

sosiale status, alkohol, dwelms of menslike verhoudings. Geeneen van hierdie dinge kan

egter vrede in jou hart en gedagtes bring nie; net ‘n verhouding met Jesus kan dit doen.

Voordat ons Jesus ontmoet het, was ons slawe van die sonde, wat in opposisie met

God leef (sien Romeine 6:16). Ons sondes verwyder ons van God, sodat ons met skuld,

stres en skaamte saamleef. Hy het egter ‘n oplossing daarvoor gegee. ‘God laat blyk sý

liefde vir ons egter daarin dat Christus vir ons kom sterf het ten spyte daarvan dat ons

nog sondaars was’ (Romeine 5:8 NLV). Wanneer ons op Christus as ons Redder vertrou,

belowe Hy, ‘As mense wat deur God vrygespreek is omdat ons glo, is daar nou vrede

tussen God en ons op grond van wat Jesus Christus ons Here gedoen het’ (Romeine

5:1 NLV). As jy jou vertroue in Christus geplaas het, lees die volgende: ‘Moet oor niks

bekommerd wees nie, maar bid oor alles. Vra alles wat julle nodig het van God, terwyl

julle Hom ook dank vir alles wat Hy doen. As julle so bid, sal julle God se vrede beleef.

Hierdie vrede is wonderliker as wat ‘n mens ooit kan dink...’ (Filippense 4:6-7 NLV).

Sielskos: Jos 2:1-24; Hand 9:20-30

2017/04/03

Markus 14:8 NLV

Gebruik wat God jou gegee het

Jesus het een van sy grootste komplimente aan ‘n vrou gegee wat duur olie uit ‘n

albaste fles op sy kop uitgegiet het. ‘Sy het haar allerbeste vir My gedoen.’ God verwag

niks meer van ons nie en is waardig tot niks minder nie. Een nag in 1837, het ‘n vrou

genaamd Florence die stem van God gehoor wat aan haar gesê het dat sy ‘n spesiale

doel in die lewe het. Nege jaar later het haar missie begin vorm aanneem toe ‘n vriend

vir haar inligting oor ‘n inrigting in Duitsland gestuur het wat diakonesse oplei om vir

die siekes te sorg. In 1853 het sy die superintendent van ‘n vrouehospitaal in Londen

geword. Toe die Krim-oorlog in 1853 uitbreek, het sy aangebied om na die Britse soldate

om te sien, en na Konstantinopel vertrek. In Turkye was sy in beheer van ‘n militêre

hospitaal. Dit was ‘n omgewing wat deur mans gedomineer is en die dokters was haar

vyandiggesind. Die hospitaal was vieslik vuil, dus het sy haar moue opgerol en begin om

na haar pasiënte om te sien, eers met die voorraad wat sy saamgebring het en toe deur

‘n korrespondensie-veldtog van stapel te stuur om nog voorraad vir die hospitaal te kry.

Sy het ure elke dag in die sale deurgebring en omtrent elke soldaat, wat die hospitaal

binnegekom het, aangeraak. Die vertroosting wat sy op haar nagtelike rondtes aan

hulle gegee het, het aan haar die bynaam, ‘die suster met die lamp’ besorg. Wie was sy?

Florence Nightingale. Een van haar bekendste aanhalings is, ‘Ek het nooit ‘n verskoning

gemaak, of ‘n verskoning aanvaar nie.’ In plaas daarvan om op die talente en hulpbronne

wat jy nie het nie te fokus, gebruik wat God jou gegee het.

Sielskos: Jer 31-32; Luk 21:25-38; Ps 32; Spr 9:10-16

2017/04/04

Judas vers 16 NLV

Moenie kla nie (1)

John Gordon sê: ‘My vrou se vriendin, Rachel, wou nie ophou kla oor haar werk nie...

die maatskappy, die ekonomie, haar gebrek aan verkope... Ek het haar uiteindelik

gestop en gesê, ‘Dis eenvoudig. Jy kan jou maatskappy se nuwe beleide aanvaar, met

‘n positiewe houding gaan werk en jou beste elke dag doen, of jy kan ‘n ander werk

soek. Wat jy egter ook al doen, hou op kla, want dit help niks. Verander jou werk, of

verander jou houding.’ Na die gesprek het Rachel vir maande nie met my gepraat nie.

Toe ek haar later op ‘n partytjie raakloop, het sy vir my gesê dat sy besluit het om

my raad te volg. Sy het by haar werk aangebly, ophou kla en meer produkte begin

verkoop. Die ander dag, drie jaar na ons oorspronklike gesprek, het ek Rachel weer

raakgeloop en gevra hoe dit met haar gaan. Sy het vertel dat haar verkope die vorige

twee jaar bly groei het. Sy is twee keer bevorder en het nou haar droomwerk gehad.

Dit is die werk wat sy altyd wou gehad het en sy was meer opgewonde en passievol

daaroor as ooit vantevore. Saboteer jy jouself en/of jou span deur aanhoudend te

kla? Ek was in ‘n soortgelyke situasie tien jaar terug. Ek het egter geleer dat wanneer

ek ophou kla en positiewe aksie neem, begin ek wen.’ Die Bybel plaas klakouse en

brompotte in dieselfde klas as ‘...die goddeloses [wat] skuldig bevind [word] oor al die

skelwoorde wat die goddelose sondaars teen Hom uitgespreek het... Hulle rig hulle

lewe in volgens hulle natuurlike drange... ter wille van hulle eie voordeel’ (verse 15-16

NLV). Jy moet eerder vol geloof wees, God vir Sy seëninge dank en op Hom vir die

toekoms vertrou.

Sielskos: Jer 33:1-36:26; Luk 22:1-13; Ps 25:1-7; Spr 9:17-18

2017/04/05

Eksodus 16:7 NLV

Moenie kla nie (2)

Wanneer jy kla, neem God dit persoonlik op. Dit wys ‘n gebrek aan geloof in sy Woord

wat sê, ‘... God [laat] alles ten goede saamwerk vir hulle wat Hom liefhet...’ (Romeine

8:28 NLV). Die Bybel sê ‘Toe die farao uiteindelik die volk laat gaan het, het God hulle

nie kortpad deur die Filistynse gebied laat trek nie. Die Here het gesê: ‘As die volk nou

met oorlog moet te doen kry, gaan hulle van plan verander en omvlieg terug Egipte

toe.’ Daarom het God hulle eerder met die woestynpad in die rigting van die Rietsee

laat trek...’ (Eksodus 13:17-18 NLV). God sien die einde reeds van die begin af en Hy

lei jou nie noodwendig op die kortste pad nie. Wanneer jy dit aanvaar, kan jy ophou

kla. Toe Israel gemor het, ‘...het die Here kwaad geword. Vuur wat van die Here af kom

het onder hulle uitgebreek...’ (Numeri 1:11 NLV). Dr Dale A Robbins skryf: ‘Hulle het

geweier om op Hom te vertrou om te voorsien, te beskerm en hulle lewens te rig. Die

hele beginsel van Christenwees is dat Jesus die ‘baas’ van ons omstandighede word. As

gelowiges kla, is dit ‘n aanklag teen die Here wat ons met ons lewens vertrou.’ Wanneer

jy deur moeilike tye gaan, moenie kla nie. Loof God ten spyte van die omstandighede.

‘Wees in alle omstandighede dankbaar...’ (1 Tessalonisense 5:18 NLV). Dankbaarheid

wys waardering vir alles wat God reeds gedoen het en vir dit wat Hy beloof om te

doen. Die Psalmdigter sê, ‘Offer jou dankoffers aan God... Roep na My in die dag van

nood. Ek sal jou verlos en jy sal My eer’ (Psalm 50:14-15 NLV). Dankbaarheid – nie ‘n

geklaery nie – motiveer God om namens jou te werk.

Sielskos: Jer 36:27- 40:16; Luk 22:14-23; Ps 25:8-15; Spr 10:1-3

2017/04/06

Jesaja 43:18 NLV

Kom slegte herinneringe te bowe

Om slegte herinneringe te bowe te kom, moet jy: 1) Jou verwysingsraamwerk verander.

Josef het, toe hy terugkyk, gesê, ‘Wat my betref, het God die kwaad wat julle gedoen

het, omgekeer in iets wat goed is...’ (Genesis 50:20 NLV). 2) Die herinneringe verwerp.

Die volgende keer wat ‘n slegte herinnering sy opwagting maak, weier om daaraan

aandag te gee. ‘Vergeet al die dinge wat in die verlede gebeur het.’ 3) Jou gedagtes

herfokus. ‘...ek vergeet dit wat agter my lê, en strek my uit na dit wat voorlê’ (Filippense

3:13 NLV). Jy sê, ‘Ek kan nie help om dit te onthou nie.’ As jy egter jou moeilikhede

kan onthou, kan jy ook jou seëninge onthou. Die effektiefste manier om slegte

herinneringe te bowe te kom, is om hulle met goeie herinneringe te vervang! Elke

belofte wat God jou gee, het die krag om vervul te word. Mediteer oor hierdie woorde:

‘Moenie bang wees nie. Jy sal nie weer verneder word nie. Moenie bang wees vir die

skande van voorheen nie. Jy sal die skande van jou jeug vergeet...’ (Jesaja 54:4 NLV). ‘...

Die vorige dinge sal nie meer onthou word nie en nie in die gedagte opkom nie. Wees

bly en jubel oor wat Ek gaan skep...’ (Jesaja 65:17-18 NLV). God kan skoonheid uit die

as en orde uit chaos skep – maar dit gebeur nie oornag nie. Jy sal oppad baie groei

en vergewe. In sommige gevalle sal jy ander mense vergewe; in ander gevalle jouself.

Jy sê, ‘Maar al hierdie beloftes kom uit die Ou Testament!’ Ja, maar die Bybel sê, ‘Want

alles wat God belowe het, het waar geword toe Christus gekom het...’ (2 Korintiërs 1:20

ABA). Bring dus jou slegte herinneringe na God toe en laat Hy hulle gesond maak.


2017/04/07

Psalm 133:1 NLV

Wees eensgesind, nie verdeeld nie

Dawid het gesê, ‘Hoe goed, hoe mooi is dit as broers eensgesind saamwoon!.. Want daar

gee die Here sy seën...’ (vers 1,3 NLV). Wanneer ons daarna streef om ten spyte van ons

verskille, saam te werk, gee die Here sy seën. Satan weet dit, dus is sy hoofstrategie om

te verdeel en te oorwin. Hy ken die krag, sinergie en seëninge wat uit eensgesindheid

voortspruit, dus doen hy sy bes om verdeeldheid te saai. Die sesde hoofstuk van Spreuke

lys sewe dinge wat die Here haat, onder andere ‘...iemand wat rusie veroorsaak tussen

broers’ (Spreuke 6:19 NLV). Paulus sê, ‘Deur in vrede met mekaar te lewe, moet julle

die eenheid wat die Gees bewerk het, bewaar’ (Efesiërs 4:3 NLV). Ons kan nie bekostig

om oningelig oor Satan se taktiek om ons teen mekaar op te sweep, wees nie. Hy sal

veroorsaak dat jy jouself oor ‘n onskuldige opmerking vererg, of meer in ‘n opmerking

lees as wat die spreker daarmee bedoel het, of onrein bedoelings aan iemand anders se

optrede toeskryf, of ‘n leuen glo. Wanneer jy egter bid en God soek, sal Hy die waarheid

van die situasie aan jou openbaar. ‘Christus het inderdaad vrede tussen ons gebring...’

(Efesiërs 2:14 NLV) en wanneer ons Hom vertrou, lei Hy ons na ‘n vreedsame oplossing.

Ons konflikte kan inderdaad tot hegter verhoudings lei, wanneer ons ons daartoe

verbind om mekaar te verstaan en nie verdeeld te raak nie. Dit is hoekom Paulus skryf,

‘En nou... pleit ek by julle in die Naam van ons Here Jesus Christus om eendragtig saam

te staan – één in julle oortuigings... Julle moet van harte saamstem in julle denke en in

julle visie’ (1 Korintiërs 1:10 NLV).


2017/04/08

Matteus 6:25 NLV

Vereenvoudiging hoef nie gekompliseerd te wees nie

Thoreau het gesê, ‘Ons lewens word op detail verspil... vereenvoudig, vereenvoudig.’

Jesus het dit op ‘n ander manier gestel: ‘...Hou op om julle te bekommer oor julle

daaglikse lewe... Hou die voëls in die lug dop. Hulle saai nie, hulle oes nie, en hulle maak

nie in skure bymekaar nie. Dit is onnodig, want julle hemelse Vader gee aan hulle hulle

kos...’ (verse 25-26 NLV). Charlie Shedd was die pastoor van ‘n groot kerk met baie eise.

Hy en sy vrou het ‘n vereenvoudigingslys opgestel: Maak seker dat vereenvoudiging

nodig is. Jou probleem mag dalk traagheid wees, omdat jy nie genoeg doen nie.

Onthou hoekom jy hier is. Stel God se wil eerste. Jy sal eenvoudiger lewe wanneer jy ‘n

noodsaaklike doel het waarnatoe jy moet werk. Laat vaar nuttelose doelwitte. Moenie

jouself moeg maak met onbelangrike take nie. Jy kan nie alles doen nie. Lewe een dag

op ‘n slag. Beplan en hoop vir die toekoms – maar moenie daar lewe nie. ‘...Môre sal

sy eie bekommernisse bring...’ (vers 34 NLV). Lewe goed vandag, en more se krag sal

vanself kom. Waar jy ook al is – wees dáár. Hou op om te dink dat vreugde vyfuur in die

middag, of by vanaand se partytjie, of wanneer jy aan die slaap raak, opdaag. Lewe in

die oomblik. Ontwikkel ‘n stokperdjie. ‘n Verandering van aktiwiteit hou jou vars. Tyd

wat gebruik word om te speel is tyd wat goed gebruik word. Jy kan nie die wêreld laat

stilstaan nie, maar jy kan jouself laat stilstaan. Leer om af te skakel. As jy nie die pas kan

verander nie, gaan na jou binnekamer en verander jouself. Kies die perfekte voorbeeld:

Christus. ‘Julle gesindheid moet soos Jesus Christus s’n wees...’ (Filippense 2:5 NLV).


2017/04/09

1 Korintiërs 1:27 NLV

Jy is gekwalifiseerd vir die werk

Moenie die dinge wat God aan jou gegee het, wat jou kwalifiseer om aan ander se

behoeftes te voldoen, afmaak nie. Die dissipels het nie in die skare verdwyn nie, hulle

het uitgestaan en die wêreld het hulle ‘...herken as mense wat saam met Jesus was’

(Handelinge 11:26 NLV). Hulle het sy boodskap gepreek, sy metodes gebruik, en sy

wonderwerke gedemonstreer. In Antiogië is hulle vir die eerste keer ‘Christene’ genoem

(sien Handelinge 11:26). Dit was omdat hulle so baie soos Christus gepraat en opgetree

het. Wat ‘n kompliment! Wat ‘n roeping! Wat ‘n uitdaging! Omdat ‘n diensmeisie ‘n

Aramese bevelvoerder van haar God vertel het, is hy van melaatsheid genees (sien 2

Konings 5). Omdat Josef Farao se drome uitgelê het toe niemand anders kon nie, het

hy die wêreld van hongersnood gered (sien Genesis 41). Omdat ‘n seuntjie dit wat hy

gehad het aan Jesus gebied het – vyf broodjies en twee vissies – is ‘n skare honger

mense wonderbaarlik gevoed (sien Markus 6:34-44). Wanneer mense aangestel moet

word, is persoonlikheidstoetse ‘n hulpmiddel om iemand se geskiktheid vir die werk

te ontdek. Dit is egter anders in God se koninkryk. Wanneer God jou roep, rus Hy jou

toe. Sy Woord sê: ‘Nietemin het God doelbewus dit wat vir die wêreld na dommigheid

gelyk het, uitgekies om die slim mense skaam te maak en dit wat vir die wêreld na totale

swakheid gelyk het, het Hy uitgekies om die magtiges te laat skaam kry. Inderdaad, wat

vir die wêreld onaansienlik en gering lyk... het God uitgekies om wat vir die wêreld wel

belangrik is, totaal af te skryf. Gevolglik het niemand enige grond om sy bors voor God uit

te stoot nie’ (1 Korintiërs 1:27-29 NLV). Die woord vir jou vandag is – jy is gekwalifiseerd

vir die werk!

Sielskos: Matt 21:1-16; Mark 11:1-11; Ps 118:19-29

2017/04/10

Psalm 51:5 NLV

Is jy regtig so gebore?

Of jou stryd nou met alkohol, dwelms, seks, woede, skinder, onvergifnis, steel, lieg of

dobbel is, een ding is seker – ons word almal met ‘n geneigdheid tot sekere gedrag

gebore. Dit is dus nie ‘n genetiese kwessie nie, maar ‘n geestelike kwessie. Dit gaan

nie oor die wetenskap nie, maar oor sonde. Enigeen van ons kan vind dat ons met

hierdie kwessies sukkel – nie omdat ons ‘n geen daarvoor geërf het nie, maar omdat

ons Adam se sondige natuur geërf het die dag wat ons gebore is. Dawid sê, ‘Want

ek is as sondaar gebore, en was dit voor my geboorte.’ Salomo sê dat daar geen

uitsonderings is nie: ‘Want daar is niemand op aarde wat regverdig is nie, niemand wat

net goeddoen en nooit sondig nie’ (Predikeer 7:20 NLV). So ja, ons is almal so gebore.

Die rede dat hierdie tipe gedrag natuurlik is vir ons, is nie omdat ons nie kan help

hoe ons is nie, maar omdat ons sondige natuur sterker is as ons begeerte om God te

behaag. Selfs wanneer ons probeer, verloor ons soms die stryd. Paulus, die grootste

van Christene, het erken dat hy misluk het toe hy die regte ding probeer doen het. ‘...

Want die begeerte tot die goeie is daar, maar ek kry dit nie uitgevoer nie’ (Romeine

7:18 NLV). As ons dus so gebore is, wat is die goeie nuus dan? Paulus sê vir ons: ‘...

Wie sal my uit hierdie doodstoestand red? Die antwoord hierop is: Jesus Christus en

daarvoor dank ek God!..’ (Romeine 7:24-25). Toe jy gebore is, het jy Adam se korrupte

natuur ontvang, maar deur die nuwe geboorte het jy Christus se natuur, wat sonde

oorwin, lewensveranderend en geregtig is, ontvang!

Sielskos: Jer 51-52; Luk 22:63-71; Ps 56; Spr 10:14-16

2017/04/11

Spreuke 3:13 NLV

Wees bereid om by ander mense te leer

Sekere mense laat ons minderwaardig voel wanneer ons in hulle geselskap is, maar

mense wat waarlik wys en volwasse is, probeer om dit nooit te doen nie. As jy al ooit

so ‘n slegte ervaring gehad het, moenie dat dit jou pla nie. As jy nie naby ‘n leier staan

nie, sal jy nie in staat wees om jou groei te meet, of te monitor hoeveel jy al ontwikkel

het nie. Suksesvolle mense het nie altyd geweet wat hulle nou weet nie – hulle moes

ook leer en groei. Moenie voorgee asof jy dinge weet wat jy nie weet nie. Dit is die

beste om opreg te wees en vrae te vra wanneer die tyd reg is. Die meeste suksesvolle

mense geniet dit om dit wat hulle weet te bespreek en te deel, so trek voordeel daaruit.

Vrees vir verwerping weerhou ons daarvan om vooruit in die lewe en verhoudings te

beweeg. Jy sal verbaas wees hoeveel mense hulleself beperk deur net met mense

wat op dieselfde vlak as hulle is, te sosialiseer. ‘n Belangrike deel van jou ontwikkeling

vind plaas wanneer jy besluit om oor die spoor te stap en met mense in aanraking te

kom wat al verder as jy beweeg het. Hierdie verhoudings skep ‘n geleentheid vir jou

om te groei. Dit is nie verkeerd om ‘n tekort aan kennis te hê nie, maar dit is verkeerd

om onwillig te wees om te leer. Josua het die beginsels van goeie leierskap by Moses

geleer. Rut het geleer hoe om die regte verhouding te vind deur na Naomi te luister.

Maak hierdie Skrifgedeelte ‘n leidende beginsel in jou lewe: ‘Die mens wat wysheid

kry, is gelukkig. Dit gaan goed met die mens wat insig kry.’

Sielskos: Eks 12:1-14; Mark 14:12-26; Ps 69:7-21

2017/04/12

Efesiërs 3:20 NLV

God werk aan jou omstandighede

‘n Skrywer sê: ‘Ons bestuur tyd, mors tyd, spandeer tyd en spaar tyd. Ons wens die

tyd wil kom, ons wens die tyd wil verbygaan, ons sien hoe die tyd vlieg, ons voel hoe

tyd stilstaan. Ons hou horlosies dop en dra kalenders rond en tog beheer God tyd. Hy

het tyd geskep en sy skeppings word in sy tyd gelei en deur sy liefdevolle hand gerig.

Ons word deur onverwagte ontwikkelinge verras, maar God word nooit, selfs deur die

mees rampspoedige gebeurtenisse, verras nie. Jou lewensuitkyk verander dramaties

wanneer jy weet dat God op hierdie presiese oomblik binne in jou werk om sy doel vir

jou uit te leef. Dink hoe jy sou gelewe het as jy verseker was dat God aan die einde van

jou sperdatum vir jou wag. Dat selfs met sekondes oor, jy met sekerheid geglo het dat

God in jou omstandighede aan die werk is. Die kern van geloof is om te glo dat God

daar is en op die punt is om die noodsaaklike te voorsien. ‘Jesus Christus bly steeds

dieselfde – gister, vandag en vir altyd!’ (Hebreërs 13:8 NLV). Tyd kan nie sy liefde of sy

krag om in jou lewe te werk, verminder nie. Hy was in die verlede daar, Hy is hier in die

hede en Hy sal in die toekoms daar wees. Vir Hom ‘...is ‘n duisend jaar soos gister, soos

‘n nagwaak wat gou verby is!’ (Psalm 90:4 NLV). Sy uiteindelike doel is om jou in die

ewigheid in te bring, nie net om jou deur hierdie week te kry nie.’ Herinner jouself in

elke situasie, dat ‘...Hy wat mag het om deur die krag wat in ons werk, oneindig meer

te doen as wat ons vra of dink om te vra.’

Sielskos: Joël 1-3; Luk 23:1-12; Ps 43; Spr 10:17-18

2017/04/13

Johannes 8:11 NLV

Jesus veroordeel nie, Hy verontskuldig

Die Bybel sê: ‘Die skrifkenners en die Fariseërs bring toe ‘n vrou wat op die daad

van owerspel betrap is.... Hulle sê vir [Jesus]: ...‘Moses het in die wet aan ons opdrag

gegee om sulke vroue te stenig’... Jesus... het vir hulle gesê: ‘Laat die een onder julle

wat sondeloos is, die eerste een wees wat ‘n klip na haar gooi’...Nadat hulle dit gehoor

het, het hulle een vir een begin weggaan... Toe...het [Jesus] vir haar gesê: ‘Dame, waar

is hulle heen? Het niemand jou veroordeel nie?’ Sy het geantwoord: ‘Niemand nie,

Meneer.’ Jesus sê toe vir haar: ‘Ook Ek veroordeel jou nie. Gaan maar, en moet van nou

af nie meer sonde doen nie’ (verse 3-11 NLV). Let twee dinge op: 1) Die mense wat die

minste gekwalifiseerd is om jou te veroordeel, sal dit doen. Jesus het die harte van

die Fariseërs geken. Hulle doel daardie dag was om Jesus uit te daag deur die vrou se

sondes te openbaar, sodat hulle iets kon kry om Hom oor aan te kla. Vermy vandag se

Fariseërs! Vind jou vriende tussen diegene wat deur genade verlos is en bewys genade

teenoor ander mense. 2) Die Een wat gekwalifiseerd is om jou te veroordeel, sal dit nie

doen nie. Bly naby aan Hom. Wanneer jy dit doen, sal jy ontdek dat jou littekens nie

permanent is nie en sal jy baie vinniger herstel. Christus sal jou in jou donker plekke

ontmoet en die wonde van jou verlede gesond maak, omdat Sy genade groter as jou

skande is. As jy vandag onder die gewig van jou sondige verlede en gewoontes steier,

kom na Jesus toe. Hy is gereed om jou te vergewe en jou vry te maak.

Sielskos: Hand 1:1-3:10; Luk 23:13-25; Ps 127; Spr 10:19-21

2017/04/14

Jesaja 53:10 NLV

Golgota was altyd deel van God se plan

Die Psalmdigter het geskryf: ‘My God, my God! Waarom het U my verlaat?.. Maar ek is

net ‘n wurm, en nie ‘n man nie; ek word bespot deur die mensdom... Elkeen wat my

sien...skud die kop en sê: ‘Hy het op die Here vertrou, laat Hý hom dan red!..’ My lewe is

uitgestort soos water, al my bene val uitmekaar... My tong kleef aan my verhemelte...

My hande en voete is vasgemaak... deur die lot te werp deel hulle my kledingstukke’

(Psalm 22:1-18 NLV). Dink daaroor: Dawid kon besig wees om Jesus se kruisiging

in detail te beskryf. Tog, toe hy hierdie woorde geskryf het, was kruisiging nog nie

as ‘n metode van die doodstraf ingestel nie. Dit is eers eeue later deur die Feniciërs

ingestel en lank daarna is dit eers deur die Romeinse Ryk begin gebruik. Dr Charles

Augustus Briggs sê: ‘Jy kan hierdie Psalm neem en dit langs die Nuwe Testamentiese

weergawes van die kruisiging plaas en sien hoe dit bymekaar pas. Dit is verstommend

hoe iemand iets wat eers ‘n duisend jaar later sou plaasvind so intiem en ingewikkeld

kon beskryf.’ Golgota het nie toevallig gebeur nie. Lank voordat Jesus gebore is, het

God ‘n plan gehad om ons deur Christus met Homself te versoen (sien 2 Korintiërs 5:18

NLV). Die historikus Paul L Maier sê: ‘In Jesaja hoofstuk 53 vind ons amper ‘n lopende

kommentaar van wat op Goeie Vrydag plaasgevind het. Dit sou wiskundig onmoontlik

wees vir enigiemand anders as Jesus om hierdie profesie in die Ou Testament te vervul.’

Die punt is: ‘Maar dit was die Here se wil om hom te vermorsel en te laat ly...’ Dit beteken

dat lank voor daar ‘n Paasfees was, was God reeds besig om aan jou te dink!

Sielskos: Jes 53; Luk 23:26-49; Ps 22; Spr 21:22-23

2017/04/15

Lukas 24:32 NLV

Hou die vuur aan die brand

Na die opstanding het Jesus twee van sy dissipels ontmoet wat gesien het hoe Hy

gekruisig is en nie geweet het dat Hy uit die dood opgestaan het nie. Later, toe Hy

saam met hulle aandete by hul huis eet, het ‘n interessante ding gebeur: ‘Toe het

hulle oë oopgegaan het hulle het Hom herken... Hulle sê toe vir mekaar: ‘Was ons

harte nie vuur en vlam in ons toe Hy met ons op pad gepraat het en die Skrif vir ons

geïnterpreteer het nie?’’ (verse 31-32 NLV). Hierdie verhaal leer ons baie oor hoe om

die vuur van liefde en toewyding aan Christus in ons harte aan die brand te hou.

Soos jy saam met Jesus stap en tyd in sy teenwoordigheid spandeer, praat Hy met

jou en openbaar Hy Homself deur die Skrif. Ons almal weet dat om ‘n vuur aan die

gang te hou, moet jy dit dophou, dit aanhou stook en aanhou voed. Hoekom beweeg

sommige van ons na hoër hoogtes en dieper dieptes in ons reis met God, terwyl

dit vir ander van ons lyk asof ons in sirkels loop sonder om êrens te kom? Omdat

een groep hulleself daaraan toewy om God na te jaag totdat sy teenwoordigheid ‘n

daaglikse realiteit in hulle lewens word, terwyl die ander groep dit nie doen nie. Dit is

so eenvoudig. Die vraag is, aan watter groep behoort jy? As jy louwarm en halfhartig

in jou reis met God is, sê Hy vandag vir jou, ‘...Draai om na My toe en Ek sal na julle toe

omdraai...’ (Sagaria 1:3 NLV). Anders gestel: ‘Draai om en kom terug. Jy sal My kry waar

jy My gelos het.’ Hou dus vandag die vuur aan die brand.

Sielskos: Hand 3:11-5:42; Luk 23:50-56; Ps 75; Spr 10:22-23

2017/04/16

Johannes 11:25-26 NLV

Glo jy dit?

Ons sukkel met die idee van ons eie mortaliteit. Daar word vertel dat Florence

Nightingale die dood soveel gevrees het, dat sy na die Krim-oorlog bed toe gegaan

het en tot haar dood in 1910 daar gebly het. Chuck Swindoll sê dat ons die onderwerp

op die volgende maniere hanteer: 1) Humor. Deur ‘n grap daarvan te maak, hou ons

die dood op ‘n veilige afstand sodat ons nie die realiteit daarvan in die gesig hoef

te staar nie. 2) Ontkenning. Koning Louis XIV van Frankryk het nie toegelaat dat die

woord ‘dood’ in sy teenwoordigheid geuiter word nie. Op 1 September 1715, het hy

egter ontdek dat mens nie die dood kan wegwens nie. 3) Romantiek. ‘n Man het ‘n

spesiale kamer gebou waar hy saam met sy dooie vrou kon wees. Sy bed was langs

haar kis. Hy het die kamer met blomme en kerse versier. Hy het elke dag vir haar

gedigte geskryf in ‘n romantiese poging om die pyn van haar heengaan te vermy. 4)

Vrees. Observeer jou mede-passasiers in die vliegtuig wanneer onstuimige weer die

vliegtuig laat skud en vibreer. Oud en jonk raak vreesbevange en gil.’ Die goeie nuus

is dat jy nie die dood hoef te vrees nie! Die Een wat dit oorwin het, het gesê, ‘...Ek lewe

en julle sal lewe’ (Johannes 14:19 NLV). Wanneer jy berou het en jou lewe aan Christus

wy, het jy Sy persoonlike waarborg van ‘n ewige lewe. Nadat Lasarus gesterf het, het

Jesus vir sy suster Marta gesê: ‘...Ek is die opstanding en die lewe. Wie in My glo, sal

lewe, al sterf hy ook... Glo jy dit, Marta?’ As jy dit glo, sal jy vir ewig saam met Christus

lewe.

Sielskos: 1 Kor 15; Luk 24:1-12; Matt 28:1-10

2017/04/17

1 Johannes 4:4 NLV

Ontwikkel ‘n oorwinnende houding

Die teleurstellings van die lewe kan veroorsaak dat jy niks behalwe negatiwiteit in jou

toekoms sien nie. Jy voel hopeloos, verkleineer jou eie vaardighede, weier om enige

risiko’s te neem, sê nee vir geleenthede van persoonlike groei, kla oor die onregverdigheid

van die lewe en sê dat niks ‘n verskil aan die omstandighede kan maak nie. Herken jy

hierdie houding in jouself? Indien so, is daar goeie nuus. Dr Paul Meier, ‘n Christelike

psigiater, het gesê, ‘’n Houding is niks meer as die gewoonte van sekere gedagtes nie.

Wanneer jy ‘n aksie herhaal, word dit ‘n houding.’ Dit beteken dat jy met oefening ‘n

oorwinnende houding kan kry. Jy doen dit so: 1) Wees eerlik oor jou poging om jou

pessimisme te oorkom. Gee iemand wat jy respekteer die toestemming om uit te wys

wanneer jy negatief is. 2) Beperk jou blootstelling aan negatiewe insette. Jy word soos

die geselskap waarin jy jou bevind, kyk dus uit vir mense wat jou geloof versterk en nie

jou vrese voed nie. ‘Hy wat met wyse mense meng, verkry self ook wysheid...’ (Spreuke

13:20 NLV). 3) Bied aan om ander wat minder bevoorreg is as jy, te dien. Wanneer jy

iemand dien, voel jy positief en gee dit aan jou ‘n gevoel van waarde. Dit is ook die regte

ding om te doen. 4) Soek die goeie in elke situasie en glo dat dit daar is! President Harry

Truman het gesê, ‘’n Pessimis is iemand wat moeilikhede van sy geleenthede maak, ‘n

optimis is iemand wat geleenthede van sy moeilikhede maak.’ Wanneer jy vandag voor

‘n moeilike situasie te staan kom, sien dit as ‘n geleentheid, want ‘...die Gees wat in julle

woon, [is] magtiger as die gees wat in die wêreld woon.’

Sielskos: Hand 6-7; Luk 24:13-24; Ps 130; Spr 10:24-26

2017/04/18

1 Petrus 4:10 NLV

Die probleem met jaloesie

n Berader merk op: ‘Wanneer ons op die wipplank van jaloesie klim, sink ons dadelik tot

onder terwyl die fokus van ons misnoeë ver bo ons uitrys. In hierdie ongebalanseerde

vergelyking vind ons dat ons altyd gebrekkig daar uitsien. Jaloesie lei tot selfbejammering

en ondankbaarheid. Ons is so gefokus op ons onvergenoegdheid dat

dit onmoontlik is om dit wat ons het en dit wat ons doen, te geniet. Jaloesie lei tot

bitterheid, onvergenoegdheid en vyandigheid. Die Engelse woord ‘envy’ kom van die

Latynse woord ‘invidere’, wat beteken ‘om met kwaadwilligheid te kyk.’ Jy is ‘n unieke

skepsel met jou eie spesiale vermoë, tydsberekening en doelwit. Dit maak nie sin om

jouself met ander mense te vergelyk nie. ‘n Eerlike, dankbare ondersoek van die gawes

wat God aan jou gegee het, sal jou tevrede laat voel met wat jy het en wie jy is.’ Moenie

dat jaloesie ‘n sekonde van jou blydskap steel nie. Wanneer dit jou motiveer om jou

met ander mense te vergelyk, sal jy altyd tekort skiet. Dit maak jou sinies. Niks wat jy

doen, bevredig jou nie. Jaloesie maak jou agterdogtig oor ander mense se motiewe,

selfs wanneer hulle waarlik vir jou omgee. Jy sukkel om te aanvaar dat hulle vriendskap

opreg is, dus distansieer jy jouself van hulle en eindig met baie min vriende op. Wat

is die antwoord? Aanvaarding en dankbaarheid is die teengif vir jaloesie. Dit is om te

aanvaar dat God in beheer is en om te leer om dankbaar te wees vir al jou seëninge.

Onthou, ‘...God het aan elkeen van julle ‘n genadegawe gegee. Met hierdie gawes moet

julle mekaar dien...’

Sielskos: Hand8-9; Luk 24:25-35; Ps 103:1-12; Spr 10:27-29

2017/04/19

Lukas 23:34 NLV

Woede

Max Lucado skryf: ‘Dit begin soos ‘n druppeltjie water. Iemand steel jou parkeerplek,

sny jou af op die hoofweg, ‘n kelnerin is stadig terwyl jy haastig is, die roosterbrood

brand. As jy genoeg van hierdie onskuldige druppels bymekaar maak, sit jy later met ‘n

emmer vol woede. Jy vertrou niemand nie, wys jou tande vir enigiemand wat probeer

nader kom, en word ‘n tikkende bom wat, met die regte hoeveelheid spanning en

vrees, kan ontplof. Ons kan dit nie ontken nie, woede bestaan. Hoe hou ons dit in

toom? Jesus het van die woedende skare wat hom doodgemaak het, gesê, ‘...Vader,

vergewe hulle, want hulle besef nie wat hulle doen nie!..’ Hy het hierdie bloeddorstige

skare nie as moordenaars gesien nie, maar as slagoffers. Hy het in hulle gesigte nie haat

gesien nie, maar verwarring. Hy het hulle nie as ‘n strydlustige bende gesien nie, maar

as ‘...skape sonder ‘n wagter...’ (Markus 6:34 NLV). Hulle is deur die skare opgesweep,

kwaad vir iets wat hulle nie kon sien, dus het hulle dit op God uitgehaal. Ons besef

grotendeels ook nie wat ons doen nie. Ons wil dit nie erken nie, maar ons is soos skape

sonder ‘n wagter. Ons kan nie ons eie vrae oor liefde en seerkry beantwoord nie. Ons

kan nie die raaisel van veroudering oplos nie. Ons weet nie wat om te doen om ons

eie liggame gesond te maak en oor die weg met ons naaste te kom nie. Die punt is:

Onbeheerste woede sal nie ons wêreld beter maak nie, maar simpatieke begrip sal

wel. As ons uit ‘n standpunt van medelye in plaas van woede begin optree, sal ons

agterkom dat die meeste mense in die donker rondstruikel. Dis ons werk om die kerse

aan te steek.’


2017/04/20

Josua 18:3 NLV

Wees pro-aktief

Wanneer dit by die bou van goeie verhoudings kom, moet jy pro-aktief wees. Dit

beteken dat jy moet weet wie jy as persoon is en wat jy uit die verhouding wil hê.

Terwyl dit verkeerd klink om te fokus op wie jy as individu is, eerder op wie die twee

van julle as ‘n paartjie is, is die geheel net so sterk soos die afsonderlike dele. Goeie

verhoudings word daarop gebaseer dat elke party eerlik is oor hul ware behoeftes,

begeertes, gevoelens en waardes. Terwyl julle as ‘n paartjie saam besluite moet maak,

is besluite oor wie jy as persoon is en hoe jy wil hê jou lewe moet wees, alleenlik joune

om te maak. Wanneer jy iemand anders toelaat om te besluit wie jy is en wat jy wil hê,

gee jy die krag wat God aan jou gegee het, weg. Verstaan mooi: 1) Deur niks te doen

nie, beteken dit nie dat jy ‘n besluit maak nie. 2) Deur terug te sit en te maak asof jy

nie die situasie sien vir wat dit is nie, is nie ‘n besluit nie. 3) Om uit te stel totdat iets

jou in ‘n rigting indwing, is nie ‘n besluit nie. Dis passiwiteit en dit sal op die ou einde

nie goed vir jou uitwerk nie. Soms moet jy omstandighede wat nie verander kan word

nie, aanvaar, maar jy het altyd die keuse om te besluit wie jy in die omstandighede wil

wees. Hierdie beginsel word duidelik deur God uitgewys in wat hy vir sy volk op die

grens van die Beloofde Land gesê het: ‘...Hoe lank gaan julle nog uitstel voor julle die

land wat die Here, die God van julle voorvaders, aan julle gegee het, in besit neem?’

Wees dus pro-aktief.

Sielskos: Hand12-13; Luk 24:45-49; Ps 16; Spr 11:1-2

2017/04/21

Jesaja 48:10, 11 NLV

Jy moet deur vuur gaan

Undercover Boss is ‘n populêre televisiereeks waar die eienaars van maatskappye

hulself as gewone personeellede vermom en dan langs hulle werkers ‘n tyd lank

werk. Sommige van die ontdekkings wat hulle maak, is verstommend – en dit lei tot

veranderinge wat die maatskappy meer effektief, winsgewend en plesierig vir almal

wat daar werk, maak. Om mense te kan verstaan, moet jy ‘n ent in hulle skoene loop.

Esegiël het gesê, ‘Ek het by die Judese ballinge gekom... Ontsteld en verstom het

ek sewe dae lank tussen hulle gesit. Toe die sewe dae verby is, het die Here vir my

‘n boodskap gegee...’ (Esegiël 3:15,16 NLV). Jy moet pyn eers voel, om sodoende pyn

te kan genees. Die Bybel sê dat Jesus ‘...ten volle met ons swakhede [kan] saamvoel...’

omdat Hy ‘n ent in ons skoene geloop het (sien Hebreërs 4:15 NLV). Hy het konflik

in die familie, verwerping, verraad, eensaamheid en honger ervaar. Hy het die pad

geloop waarop jy is en Hy weet hoe jy voel; dus kan jy na Hom toe draai wanneer jy in

die moeilikheid is en die hulp kry wat jy nodig het. ‘Omdat Hy self versoekings verduur

het, kan Hy dié help wat onder versoeking swaarkry’ (Hebreërs 2:18 NLV). Wanneer jy

raad gee, wil mense weet of jy uit eie ervaring praat. God sal dus toelaat dat jy deur

ervarings gaan wat jy nie geniet of verstaan nie, om jou toe te rus en effektief te maak

om ander mense te bedien. Job het gesê, ‘...Wanneer Hy my toets soos goud in ‘n vuur

sal Hy my onskuldig verklaar’ (Job 23:10 NLV). As jy vandag deur vuur gelouter word, is

dit omdat God ‘n plan het wat Hy vir jou en deur jou wil doen.


2017/04/22

Spreuke 12:25 NLV

Wees bemoedigend

Nadat Enrico sy eerste sangles op tien gehad het, het die onderwyser gesê, ‘Jy het glad

nie ‘n stem nie.’ Enrico se ma het egter iets wonderliks in haar seun se stem gehoor. Sy

het in sy talent geglo. En selfs al was hulle baie arm, het sy haar arms om hom gesit

en gesê, ‘My seun, ek gaan elke opoffering maak om vir jou sanglesse te betaal.’ Haar

vertroue in hom en haar konstante aanmoediging het vrugte afgewerp, want hy het

een van die geliefste en beroemdste sangers van alle tye geword. Sy naam? Enrico

Caruso. Wanneer die wêreld jou probeer afbreek, het jy mense nodig wat jou opbou,

jou talente herken en jou help om die beste daarvan te maak. Dink na oor hierdie

‘gebooie’ vir ouers wat uit ‘n kind se oogpunt geskryf is: 1) My hande is klein, moet asb.

nie perfeksie verwag wanneer ek die bed opmaak, ‘n prentjie teken of ‘n bal gooi nie. 2)

My bene is kort; beweeg asseblief stadiger sodat ek kan byhou. 3) My oë het nog nie die

wêreld soos joune gesien nie; laat my toe om dit op ‘n veilige manier te ontdek en moet

my nie onnodig beperk nie. 4) Huiswerk sal altyd daar wees; ek is net vir ‘n kort rukkie

klein. Neem die tyd om dinge in hierdie wonderlike wêreld vir my te verduidelik. 5) My

gevoelens is sag, moet nie heeldag aan my karring nie. Behandel my soos jy behandel

wil word. 6) Ek is ‘n spesiale geskenk van God; bewaar my soos God se bedoeling was

– deur my verantwoordelik vir my aksies te hou, deur my riglyne te gee om volgens te

lewe en deur my op ‘n liefdevolle manier te dissiplineer. Wees vandag bemoedigend!

Sielskos: Hand16-17; Matt 1:1-17; Ps 7:10-17; Spr 11:7-9

2017/04/23

Psalm 125:1 NLV

Onbeweeglik deur omstandighede

Teen die ouderdom van nege-en-twintig jaar, het die skrywer Carsom McCullers al drie

beroertes gehad. Toe sy nog gedeeltelik verlam en aan die herstel was, het haar man

selfmoord gepleeg. Ten spyte van haar probleme het sy haarself geforseer om elke dag

te skryf en het gevolglik ‘n voortreflike skrywer geword. Die Engelse digter, John Milton,

was blind. Die wêreldberoemde violis, Istzhak Perlman, het polio gehad. Die voormalige

mej. Amerika, Heather Whitestone, is doof. Stephen Hawking, fisikus en lektor by die

Universiteit van Cambridge, het Lou Gehrig se siekte. G’n wonder dat Thomas Edison

gesê het dat as ons al die dinge doen waartoe ons in staat is, sou ons verstom wees! Wat

is die geheim om die lewe te geniet? Dis die volgende: ‘Hulle wat op die Here vertrou...

is onbeweeglik en sal vir altyd bly bestaan.’ Ten spyte van hoe jy vandag voel, is jou

probleme nie onoorkombaar nie. Die Bybel sê, ‘...Dié dinge wat by mense onmoontlik is,

is juis by God moontlik’ (Lukas 18:27 NLV). Wat nog meer is, Hy luister na ‘...behoeftiges

se gebede, en [Hy sal] hulle pleidooi nie verwerp nie’ (Psalm 102:18 NLV). Einstein het

gesê, ‘In die middel van elke moeilikheid, lê daar ‘n geleentheid.’ Dieselfde God wat vir

Abraham gelei het toe hy nie ‘n idee gehad het waarheen hy gaan nie, wat vir Sara ‘n

kind in haar latere jare gegee het, wat die Rooi See verdeel het en Jesus uit die dood

opgewek het, is lewendig en werkend in jou lewe. Dus, ‘...Vind krag in julle verhouding

met die Here, ja, in die krag van Sý sterkte!’ (Efesiërs 6:10 NLV). Hou moed vandag! ‘Die

ewige God is jou skuilplek en onder jou is Sy ewige arms...’ (Deuteronomium 33:27 NLV).

Sielskos: 2 Kron 7:12-16; Matt 6:5-15; Luk 18:1-8

2017/04/24

Efesiërs 2:7 DB

Die wonder van genade

Sommige van ons lewe asof God ‘n lysie met ons naam op het en aan die einde van

die dag gee Hy ons ‘n punt om te bepaal hoe goed ons gedoen het en of Hy ons meer

of minder moet liefhet. God red ons egter nie uit genade en baseer dan sy gevoelens

oor ons op ons geestelike optrede nie. Die Bybel sê, ‘...Hy het ons baie lief en Hy loop

oor van goedheid. Toe ons nog in die sonde geleef het asof God nie eens bestaan nie,

het God ons kom haal. Saam met Christus het Hy vir ons ’n nuwe lewe gegee... omdat

God so goed is, sonder dat julle iets daarvan verdien, is julle uit die kloue van die sonde

gered...’ (verse 4-5 DB). Die wonder van genade is dat jy gekies is, dat God jou wil hê en

dat God begeer dat jy deel van sy familie moet wees. Deur genade is jy lewendig vir

God gemaak. Jy het die krag om te volhard, die krag om te dien, ‘n rede om te hoop en

die wete dat die dood geen houvas op jou het nie. God het jou skuld gevat en dit aan

die kruis vasgespyker. Hy het die rekening uitgewis en jou vry gemaak. Vandag kan

jy met ‘n hart wat so lig soos ‘n veertjie is, lewe – maak nie saak wat jy gister gedoen

het nie. Die waarheid is dat niemand in die hemel eendag sal spog, ‘Kyk wat het ek en

Jesus gedoen’ nie. Nee, toe Jesus aan die kruis uitgeroep het, ‘...Dit is nou afgehandel!..’

(Johannes 19:30 NLV), het God ‘ten volle betaal’ oor elke sonde wat jy sal pleeg, geskryf

– van jou geboorte af tot by die graf. Dit is die wonder van genade.

Sielskos: Hand 18-19; Matt 1:18-25; Ps 144:1-8; Spr 11:10-11

2017/04/25

Job 32:21 NLV

Vleitaal sal jou niks in die sak bring nie

Toe Stephen Spielberg ‘n tingerige tiener was, het ‘n boelie sy visier op hom ingestel.

Moeg vir die aanhoudende teistering wat hy later as ‘hel op aarde’ sou beskryf, het hy

besluit om die boelie te vlei deur hom te vertel dat hy soos John Wayne lyk en dat die

boelie dit moet oorweeg om die held in ‘n fliek oor die Tweede Wêreldoorlog wat hy

beplan het om te maak, te speel. Nadat Spielberg die boelie in ‘n kostuum gekry het

en hom in die rol van die heroïese bendeleier aangestel het, het die boelie klei in sy

hande geword. Anders as Spielberg se boelie, waardeer emosioneel gesonde mense

net lof wanneer hulle dit verdien. Hulle kan ook ‘n kompliment wat met bymotiewe of

om te vlei gegee is, raaksien. Die paradoks is dat die meeste mense, sonder goeie rede,

vir bymotiewe op die uitkyk is wanneer iemand vir hulle ‘n kompliment gee. Elihu, die

patriarg en Job se vriend, het gesê, ‘Ek sal niemand voortrek nie, en ek sal niemand vlei

nie. As ek dit sou probeer doen, sou my Maker ‘n einde aan my maak’ (verse 21-22 NLV).

Die Psalmdigter sê vir ons, ‘Die Here sny hulle vleiende lippe af...’ (Psalm 12:4 NLV).

Hier is die vraag: Is vleitaal dit werd om van God se seën afgesny te word? Wanneer jy

iemand vlei of ontvanklik raak vir vleitaal, is dit ‘n duidelike bewys van jou gebrek aan

geloof in God se vermoë om jou guns by ander mense te gee. Guns is ‘n byvoordeel

wanneer jy in ‘n verhouding met Hom is. ‘Want U seën die vromes, Here, u genade is vir

hulle soos ‘n skild’ (Psalm 5:13 NLV).


2017/04/26

Joël 2:25

God sal dit opmaak teenoor jou

Kristine Steakly skryf: ‘Verlies kan maak dat ons heeltemal alleen en vernietig voel. Vir baie

van ons het ons ouers se skeisaak beteken dat ons die huis waarin ons grootgeword het,

ons buurt, ons vriende, ons skool en selfs ons kerk moes verlaat, omdat ons skaam was en

die oordeel gehoor het van diegene wat eintlik oor ons geestelike welstand bekommerd

moes wees. Om Joël se metafoor te gebruik, sprinkane het ons familie, vriendskappe en

kerk opgeëet, maar God het egter belowe, ‘...My volk sal nooit weer so in die skande kom

nie’ (vers 26 NLV). Ek kan nie vir jou sê hoe herstel gaan lyk of wanneer dit gaan gebeur

nie. Sommige van ons sal sien hoe verhoudings tussen gesinslede weer regkom, ander

van ons sal sien hoe wonderlike huwelike en liefdevolle families gebou word. Sommige

van ons sal moet wag tot ons in die hemel kom, waar alle seerplekke gesond sal word

en waar alle trane afgevee sal word.’ ‘n Bybelonderwyser sê: ‘Weerstaan die versoeking

om moedeloos te raak. Jy mag dalk voel dat jy jare, geleenthede, finansies en ‘n deel van

jouself gemors het. Hoor egter hierdie fantastiese belofte van bevryding: ‘...Ek sal herstel

wat julle deur die stropersprinkane... verloor het...’ Niemand op aarde kan dit teenoor

jou opmaak nie. Niemand kan daarvoor betaal nie. Niemand kan dinge regmaak en dit

regverdig maak nie. Druk en manipulasie sal nie geregtigheid meebring nie. Laat dit dus

gaan en laat God toe om jou lewe met nuwe seëninge te vul. As jy vol wrokke en haat

is, sal Hy nie plek vir sy nuwe gawes kan kry nie. God sal dit teenoor jou opmaak as jy ‘n

verwagtende houding van geloof het en Hom dank dat sy beloftes ook joune is.’


2017/04/27

Hebreërs 10:35 NLV

Doen dit volgens die boek

Hoe lank moet jy bid en op God vir die antwoord vertrou? Totdat Hy vir jou anders sê.

Met ander woorde, doen dit volgens die boek! ‘Moenie hierdie vertroue in God deur

julle vingers laat glip nie. Dit hou vir julle ‘n groot beloning in. Wat julle nodig het, is

om te volhard sodat julle kan voortgaan om God se wil te gehoorsaam. Dan sal julle

ontvang wat God beloof het’ (verse 35-36 NLV). Jy sê, ‘Maar ek is nie seker wat God

se wil is nie.’ Sy wil word in sy Woord geopenbaar en dit is wat jy moet glo en oor jou

situasie moet spreek. Om andersins te glo, is om God te weerspreek. Abraham het op

God se belofte dat hy die vader van ‘n menigte nasies sou wees, gestaan, terwyl daar

nie ‘n greintjie bewyse was dat dit sou gebeur nie. Vir twintig jaar lank het hy na die

naghemel gekyk en geglo, ‘Here, U het gesê dat my kinders so baie soos die sterre in

die hemel sal wees. Ek weet nie hoe U dit gaan doen nie, want ek is ‘n honderd jaar oud

en my vrou, Sara, is negentig. Ek gaan U egter in elk geval glo.’ Wanneer jy so bid, mag

jy dalk vir ander mense dwaas lyk. Om wonderwerke te ontvang, moet jy egter soms

belaglik lyk, soos Jesus wat vir sy dissipels gesê het om die wynkanne met water te vul

en klei op ‘n blinde man se oë gevryf het. Die trougaste in Kana het egter die beste wyn

gedrink en die blinde man kon sien. Hoekom? Omdat hulle gehoorsaam aan Jesus se

woord was. Doen dit dus vandag volgens die boek.


2017/04/28

Lukas 6:27 NLV

Praat mooi van hulle

Toe generaal Robert E Lee deur president Jefferson Davis gevra is om sy opinie oor ‘n

sekere offisier te gee, het hy ‘n uitstekende verslag geskryf. Een van die offisiere wat

die verslag gelees het, was verstom en het vir Lee gevra, ‘Generaal, weet jy dat die man

van wie jy so mooi teenoor die president verslag lewer een van jou grootste vyande is,

wat nooit ‘n geleentheid laat verbygaan om jou te kritiseer nie?’ Lee het geantwoord,

‘Ja, maar die president het my vir my opinie van hom gevra. Hy het my nie gevra vir sy

opinie van my nie.’ Dit vat karakter, medelye en moed om mooi van jou kritici te praat.

Wanneer jy dit egter doen, gebeur drie goeie dinge: 1) Jy verhoog jou eie waarde. Jy

wys dat jy bo kritiek uitstyg deur lof aan ander toe te ken. 2) Jy ontlont jou vyand se

kritiek van jou. Wanneer mense hoor dat jy mooi van ‘n vyand praat, sal hulle meer

respek vir jou hê en jou in ‘n ander lig sien. 3) Mense sien jou as regverdig en vrygewig.

Dit neem min inspanning om terug lelik te wees, maar ‘n Christelike karakter is nodig

om die ander wang te draai en hulle te seën. Jesus het gesê: ‘...Doen goed aan dié

wat julle haat. Seën die wat julle vervloek. Bid vir hulle wat julle seermaak. As iemand

jou op die wang klap, draai ook die ander wang... Doen aan ander wat jy wil hê hulle

aan jou moet doen’ (verse 27-31 NLV). Dis ‘n baie hoë standaard om te volg, een wat

Jesus daar gestel het en dwarsdeur sy lewe beoefen het. Hy roep jou vandag om ook

daarvolgens te lewe.

Sielskos: Hand 27-28; Matt 4:1-11; Ps 35; Spr 11:19-21

2017/04/29

Kolossense 3:9 NLV

Vertroue vereis eerlikheid

Bedrog in ‘n verhouding vernietig vertroue en respek. Een leuen of een daad van

verraad, kan ‘n wond veroorsaak wat jare neem om gesond te word en in sommige

gevalle nooit gesond word nie. Die persoon wat iets wegsteek is basies selfsugtig en

beskerm net sy/haar eie belange. Hulle gee min om vir die ander persoon se gevoelens.

Daar is niks vlakker as leë woorde en clichés wat geen ware betekenis het nie. Daar is

mans wat vrouens in ‘n seksuele verhouding indwing deur te maak asof hulle vir hulle

lief is. Verraad op hierdie vlak is emosionele verkragting! Dit is ‘n aaklige gevoel om deur

iemand gebruik te word. Die verraaier mag dalk aanhoudend belowe dat hy sy vrou

gaan verlaat en sy minnares so laat aanhou hoop. Dit gebeur egter nie. Hy maak elke

verskoning onder die son om aan te hou om haar te misbruik. Omdat sy kwesbaar is,

volg sy hom blindelings totdat die verhouding so ver gevorder het, dat sy vasgevang

is. As ‘n sondaar mag jy dalk ‘n verskoning vir hierdie tipe gedrag hê, maar definitief

nie as ‘n verloste kind van God nie. ‘Moenie vir mekaar lieg nie...’ Wanneer iemand hulle

vertroue aan jou gegee het, het hulle vir jou ‘n kosbare geskenk gegee; moet dit nie

misbruik nie. As iemand jou vertroue misbruik het, konfronteer hom/haar van aangesig

tot aangesig. Alhoewel jy vir die persoon mag lief wees, moet jy terugstaan totdat hulle

duidelike tekens van berou en ‘n gewilligheid om die saak reg te maak, toon. Moenie

hoop opgee nie. Soms maak goeie mense slegte foute. As jy daaraan werk en God se

hulp vra, is dit moontlik om die vertroue wat jy verloor het, te herstel, wat selfs tot ‘n

beter verhouding kan lei.

Sielskos: Deut 1-2; Matt 4:12-25; Ps 2; Spr 11:22-23

2017/04/30

Efesiërs 4:23 NLV

Jy kan verander

Denkwyses is patrone waarvolgens jou gedagtes outomaties op ‘n sekere manier

werk. Dit beteken dat jy jouself baie smart op die hals kan haal wanneer jy telkens op

dieselfde manier in dieselfde situasies en met dieselfde mense reageer, maar ander

resultate verwag. Miskien sê jy: ‘Na al hierdie jare het ek gedink hy sal verander... Maak

nie saak hoe hard ek probeer nie, my familie waardeer my nie... Hoekom is ek die

enigste een wat moeite doen om in kontak te bly?’ Dis maklik om jou probleem op

ander te blameer – ‘Kyk waarmee is hy besig. Kyk hoe lank wag ek al. Hoekom bel sy

nie?’ Ons dink die antwoord lê daarin om die ander persoon sover te kry om te doen

wat ons wil hê. Dit sal egter misluk, omdat jy dan die beheer aan die ander persoon gee.

Jou geluk word nie deur ander mense bepaal nie, selfs al het jy jouself oortuig dat dit

doen. ‘n Ervare berader skryf: ‘As jy nie van dieselfde resultate hou nie, moet jy ‘n ander

knoppie probeer druk. Kyk na jou verhoudings. Is daar ‘n situasie wat op die afdraande

pad is, ten spyte van jou beste pogings? Wag jy vir iets om te verander, in plaas van om

iets anders te doen? Hou op om dieselfde knoppie te druk, vra God vir helderheid om

die situasie eerlik te beskou en tree dan met wysheid en verantwoordelikheid op.’ Jy

is nie ‘n slagoffer van jou omstandighede nie, jy hoef nie vas te val of aanhoudend in

sirkels te beweeg nie. Paulus sê, ‘Julle moet op ‘n nuwe, geestelike manier leer dink.’ Die

woord vir jou vandag is: Jy kan verander!

Sielskos: Gen 6:9-8:4; Matt 24:37-51

2017/05/01

Jeremia 18:6 NLV

God kan jou herstel

Die profeet Jeremia skryf: ‘Ek het toe na die werkplek van die pottebakker gegaan

en hom gekry waar hy besig was om op die pottebakkerswiel te werk. Maar die pot

waarmee hy besig was, was nie ‘n sukses nie. Hy het toe die klei inmekaargedruk en

weer begin om ‘n nuwe pot te vorm soos hy dit wou hê. Die Here het toe... gevra: ‘O

Israel, kan Ek nie met julle net so maak soos die pottebakker met die klei maak nie? Kyk,

soos die klei in die hande van die pottebakker, so is julle in my hande’’ (verse 3-6 NLV).

Daar is drie belangrike lesse uit hierdie verhaal te leer: 1) So lank as wat jy buigbaar is

en op God reageer, sal Hy jou nooit weggooi nie. Hy sal jou eerder in iets wat Hy kan

gebruik, vorm. 2) Wanneer ander mense jou af druk, sal God jou oplig. ‘n Pottebakker

druk nie die klei plat nie, hy lig dit aanhoudend op en vorm die klei soos dit op die

wiel draai. God sal dit ook vir jou doen. Dawid het gesê, ‘...Hy... het my opgetel uit die

afgrond van die dood, uit die modder en die slym. Hy het my voete op ‘n rots laat staan

en my op vaste grond laat loop’ (Psalm 40:2-3 NLV). 3) Let op wie se voet op die wiel is.

As hy kon, sou Satan jou lankal van die wiel afgegooi het, maar hy kan nie. Kyk onder

die tafel wie se voet op die wiel is: die Pottebakker s’n! Niks kan jou van God se liefde

skei nie (sien Romeine 8:39). Die woord vir jou vandag is: ‘Kyk, soos die klei in die hande

van die pottebakker, so is julle in my hande.’

Sielskos: Deut 3-4; Matt 5:1-12; Ps 37:1-7; Spr 11:24-26

2017/05/02

Jesaja 26:3 NLV

Lewe met vrede

Wie vertrou jy om jou probleme op te los, God of jouself? Voor jy antwoord, lees die

volgende: ‘U bewaar elkeen wat op U vertrou in vrede, die mense wie se gedagtes

op U gerig is... Die pad van die regverdige is reguit. Opregte, U maak die pad van

die regverdige gelyk’ (verse 3,7 NLV). Wat ‘n wonderlike belofte! As jy jou vrede wil

behou, lewe volgens hierdie beginsel: ‘Doen jou bes, en God doen die res.’ Party van

ons het grootgeword met die idee dat dit verkeerd is om jouself te geniet wanneer jy

probleme het. Ons is gekondisioneer om te dink dat as ons nie iets aan die saak kan

doen nie, kan ons ten minste bekommerd wees en ellendig voel. Paulus spreek dit

aan: ‘Julle moet glad nie bang wees vir julle vyande nie. As julle nie vir hulle bang is

nie, dan sal dit vir hulle wys dat God hulle sal straf, maar dat Hy julle sal red’ (Filippense

1:28 ABA). Satan weet nie wat om te doen as hy jou nie kan ontstel nie; jy neem dan ‘n

kragtige wapen uit sy hande. Deur volkome op God te vertrou, is jy nie langer aan die

lot van jou omstandighede, ander mense, of jou eie emosies en beperkinge oorgelaat

nie. Die vraag is nie, ‘Is daar moeilikheid oppad nie?’ nie. Die vraag is, ‘Hoe gaan jy dit

hanteer?’ Die Bybel sê, ‘Want net as ons glo, kan ons die rus binnegaan...’ (Hebreërs 4:3

NLV). Wanneer dinge verkeerd gaan – moenie daarmee saam verkeerd gaan nie. Volg

God se leiding, staan op sy Woord, en rus dan in Hom en vertrou Hom om namens jou

te werk.


2017/05/03

Matteus 5:24-25 NLV

Doen jou bes om die kwessie op te los

Word jou talente nie erken nie? Het jy ‘n spesifieke talent en tog voel dit asof God jou

nie met sukses seën nie? Hierdie mag dalk die sleutel tot die probleem wees: ‘As jy dus

jou offer na die altaar toe bring en dit val jou daar by dat jou medemens ‘n grief teen

jou koester, los jou offer net daar en gaan maak eers vrede met daardie persoon. Kom

dan terug en bring jou offer. Sorg dat jy baie gou op goeie voet met jou teenstander

kom...’ (verse 23-25 NLV). Jy sê, ‘Die persoon waarmee ek ‘n probleem gehad het, is nie

meer beskikbaar nie en tog pla dit my nog steeds.’ Lees hierdie twee Skrifgedeeltes:

1) ‘Daarom moet julle julle sondes teenoor mekaar bely en vir mekaar bid sodat julle

gesond kan word. Die gebed van iemand wie se saak met God reg is, het ‘n kragtige

uitwerking’ (Jakobus 5:16 NLV). 2) ‘Wie se sondes julle ook al vergewe, dit word hulle

vergewe; wie s’n julle ook al handhaaf, word gehandhaaf’ (Johannes 20:23 NLV). Deel jou

gevoelens met iemand wat jy vertrou. Bid saam met hulle, bely jou skuld en verkeerde

dade openlik. Gebed en die teenwoordigheid van ‘n bevestigende vriend sal jou van

die vrede wat jy soek, voorsien. Nadat Dawid vir Urija, Batseba se man, doodgemaak

het, was sy skuldgevoelens oorweldigend en het hy God se vergifnis gesoek. Urija was

egter al amper vir ‘n jaar dood. Natan het na Dawid toe gekom en hom beskuldig en

hom vertel wat alles met hom gaan gebeur. Dawid het toe gesê: ‘Ek het teen die Here

gesondig...’ Natan het geduldig geluister en geantwoord, ‘...Die Here het jou sonde

vergewe...’ (2 Samuel 12:13 NLV). Volg Dawid se voorbeeld – en sit dan die saak agter jou

en beweeg vorentoe.


2017/05/04

Spreuke 13:24 NLV

Jy is dit aan jou kind verskuldig (1)

As ‘n ouer, is daar drie dinge wat jy aan jou kind verskuldig is. Die eerste is:

Goedgesindheid. Die Bybel sê dat as jy lief is vir jou kind, sal jy hom dissiplineer. Jy

sal dit egter in liefde doen, nie in woede nie. Moenie by die idee inkoop dat goeie

ouers nie hulle kinders dissiplineer nie, omdat hulle ‘te lief vir hulle kinders is’ nie. Die

waarheid is, as jy nie jou kind dissiplineer nie, is dit nie omdat jy té lief vir hom is nie, dit

is omdat jy te lief is vir jouself. ‘n Peiling het bewys dat meer as 90 persent matrikulante

het gewens dat hulle ouers en onderwysers hulle lief genoeg gehad het om hulle te

dissiplineer en meer van hulle te verwag. Soos water, volg ons die pad van minste

teenstand. Dit is baie makliker om dinge oor die hoof te sien, konfrontasie te vermy,

jou kop in die sand te steek en te hoop dinge word beter, as wat dit is om die pyn wat

daarmee gepaard gaan om ‘n kind wat jy liefhet te dissiplineer, te ervaar. Die Bybel sê,

‘Die Here bestraf hulle wat Hy liefhet net soos ‘n pa sy seun ‘n pak slae gee’ (Spreuke

3:12 NLV). Dink daaroor! Die grootste en wysste vader van almal is God. Hy het nie net

lief nie, Hy is liefde. Tog lees ons hier dat ons liefdevolle God ons dissiplineer. Enige

ouer wat weier om hulle kind te dissiplineer, sê inderwaarheid dat hulle ‘n beter ouer

as God is. Liefde doen altyd wat die beste vir die ander persoon is. Daar is tye wat liefde

dissipline en opleiding vereis.


2017/05/05

Spreuke 22:15 NLV


Die tweede ding wat jy aan jou kind verskuldig is, is: Rigting. Die Bybel sê, ‘Astrantheid

is eie aan ‘n seun; ‘n pak slae haal dit uit hom uit.’ Die Bybel praat nie hier van wanneer

jou kind pret het, of selfs foute maak nie; dit is ‘n normale deel van jou kind se

leerskool. Die Bybel praat van ‘astrantheid.’ Die woord het verskeie betekenisse, soos

‘n gebrek aan volwassenheid of wysheid, of ‘n neiging om teen die reëls te rebelleer.

As jy lief is vir jou kind, sal jy hom of haar leer dat die lewe op reëls gebou is – as jy dit

gehoorsaam, sal jy sukses behaal, andersins sal jy swaarkry. Byvoorbeeld, wanneer jou

kind die spoedgrens verbreek, sal die polisie hom of haar nie daarmee laat wegkom

nie. Wanneer hy of sy nie die huispaaiement betaal nie, gaan die bank hulle nie in die

huis laat aanbly nie. Die Bybel sê dat jy hierdie wanbegrip by jou kind moet korrigeer.

Jy moet jou kind wysheid en volwassenheid leer, om hom of haar sodoende ‘n

suksesvolle lid van die samelewing te laat word. Salomo sê, ‘...’n Kind wat aan homself

oorgelaat is, steek sy ma in die skande’ (Spreuke 29:15 NLV). Hoekom is dit so? Omdat

‘n kind wat aan homself oorgelaat word, in dieselfde toestand bly as waarin hy gebore

is. Hy of sy is gebore met ‘n toestand genaamd ‘astrantheid.’ Dus moet kinders geleer

word om gesag te respekteer en reëls na te kom; hulle moet leer dat daar vir elke aksie

‘n gelyke en teenoorgestelde reaksie is. Jy is dit aan jou kind verskuldig om dit aan

hom of haar te verduidelik.


2017/05/06

Spreuke 29:17 NLV


Die derde ding wat jy aan jou kind verskuldig is: Korreksie. Baie ouers maak die fout om

altyd vir ‘n kind te sê wanneer hy of sy verkeerd doen, in plaas daarvan om ook die tyd

te neem om aan hulle te verduidelik hoe om dit reg te stel en dan aan te hou om dit

reg te doen. Bybelse korrigering behels beide. Die nommer een Bybelse Saligspreking

is: ‘Geseënd is die gebalanseerde.’ Wanneer jy jou kind polisieer, maar nooit met hom

of haar speel nie, is jy ongebalanseerd. Let op wat Salomo geskryf het: ‘Leer jou seun

wat dissipline is en jy sal gerus wees oor hom. Hy sal jou vreugde verskaf.’ Onthou dat

dissipline altyd ‘n tweesydige swaard is: dis nie net om jou kind te korrigeer wanneer

hy of sy verkeerd is nie, maar ook om hulle in die regte rigting te lei. Jy sal beter

resultate kry wanneer jy positiewe, eerder as negatiewe versterking, gebruik. Verstaan

mooi: Dis nie jou werk om jou kind gelukkig te maak nie; dis jou werk om hulle tot

volwassenheid te versorg. Wanneer jy dit doen, is hulle geluk gewaarborg! Jy kan dus

maar ophou om te probeer om ‘n populariteitskompetisie by jou kind te wen. Hulle

mag dalk altyd vir jou lief wees, maar daar sal tye wees wat hulle definitief nie van jou

gaan hou nie! Moenie moedeloos raak nie. Dit sal ook verbygaan. Hou net aan om die

regte mengsel van versorging en dissipline toe te pas en hulle sal later weer van jou

begin hou. Nog belangriker, wanneer hulle groot is, trou en kinders kry, sal hulle ‘n

rolmodel en ‘n plan vir sukses hê.


2017/05/07


Gemak in ongemaklike plekke

God kan jou gemak in sommige van die lewe se ongemaklikste plekke gee. Hy kan

jou deur situasies bring wat jy gedink het jy nie gaan oorleef nie, of waarin jy gevoel

het jy gaan vir ewig vasgevang wees. Hy kan jou vrede gee wanneer jy onder druk

verkeer. Voordat jou lewe verby is, gaan jy verlies ervaar. Sommige verliese sal jou

inderwaarheid help om die dinge wat jy het, te waardeer. Dit is mislukking wat sukses

so soet maak. Jou toekoms is nie in die hande van jou baas, jou bank, of jou eggenoot

nie. Dit is ook nie in jou beheer nie. Jou toekoms is in God se hande. Net omdat jy nie

die pad verstaan waarop jy is nie, beteken nie dat Hy jou nie lei nie. Hy belowe: ‘Ek

lei blindes op ‘n pad wat vir hulle onbekend is. Ek maak die donkerte vir hulle helder

lig en die ongelyk paaie maak Ek gelyk. Ek gaan dit alles doen en hulle nie alleen los

nie!’ (Jesaja 42:16 NLV). Leer God dus ken, want jy gaan Hom nodig kry. Hy sal daar vir

jou wees wanneer almal anders jou gefaal het. Hy sal daar vir jou wees in die donker

plekke. Die Psalmdigter skryf, ‘...In die nag vloei die trane, maar in die oggend is daar

vreugde’ (Psalm 30:6 NLV). Hoe lank die nag ook al mag wees, die oggend sal kom

– en daarmee saam sy vreugde. Wanneer jy terugkyk, sal jy besef dat Sy genade jou

beskerm het, vir jou voorsien het, jou kalmeer het, jou vertroos het en jou daar deur

gebring het. Tyd en seisoene verander, maar die Here verander nie. Hy is ‘...dieselfde –

gister, vandag en vir altyd!’ (Hebreërs 13:8 NLV).

Sielskos: 2 Kon 4:42-44; Mark 6:30-44

2017/05/08

Romeine 12:2 NLV

Verander jou denke, verander jou lewe

Soms probeer ons ons negatiwiteit verskoon deur te sê, ‘Dit was net ‘n gedagte, dit

beteken nie iets nie.’ Dit beteken egter iets! ‘n Verkeerde gedagte wat gelos word om

in jou denke te broei, kan wortel skiet en groei. Dis dan wanneer daardie gedagte

begin om jou siening, jou houding en jou aksies te beheer. Dit is hoekom die Bybel

sê, ‘Moenie julle leefstyl aanpas by die gedragspatrone van hierdie wêreld nie, maar

laat God julle omvorm deurdat Hy julle denkpatrone vernuwe...’ Onthou, waar jou

gedagtes gaan, gaan jy! Ons staar almal uitdagings en probleme in die gesig. Jy mag

jouself dalk toelaat om gedagtes te dink soos ‘Ek kan dit nie meer vat nie,’ of ‘As nog

een ding gebeur gaan ek dit verloor!’ of ‘As dinge nie gou verander nie – gee ek op!’

Dit is hierdie tipe denke wat jou laat misluk nog voor jy die probleem teëkom. Daar

is niks kragtig, sterk, of oorwinnend daarin om te besluit om op te gee nie. Dit is ‘n

houding van mislukking, nie oorwinning nie. Jy moet eerder dink, ‘As die aanval so

groot is, moet die seën wat daarna op my wag, baie groot wees.’ Of, ‘As Satan my so erg

aanval, beplan God iets goeds vir my!’ Word ‘n persoon wat geestelik en emosioneel

voorbereid is op enige uitdaging wat jou pad mag kruis en moenie jouself toelaat om

te maklik moedeloos en oorwonne te word nie. Jy doen dit deur jou denkpatrone met

God se Woord te vernuwe.


2017/05/09

Daniël 4:34 NLV

Verootmoedig jouself

God reageer altyd op ‘n nederige hart en Hy verwerp altyd ‘n trotse hart. Een oomblik het

koning Nebukadnesar nog gespog dat hy die wêreld se mees gevorderde samelewing

gebou het. Die volgende oomblik het hy sy verstand verloor, handeviervoet rondgekruip

en soos ‘n dier gras geëet. Toe hy egter berou gekry het, het God sy koningskap aan

hom teruggegee. Hy het gesê, ‘Ná hierdie tyd verby was, het ek, Nebukadnesar, opgekyk

boontoe. Ek het weer tot my sinne gekom... As gevolg hiervan loof en verheerlik ek,

Nebukadnesar, die Koning van die hemel. Alles wat Hy doen, is waar. Wat Hy doen is

reg. Almal wat hoogmoedig is kan Hy verneder’ (verse 34, 37 NLV). Om te val is al erg

genoeg; maar om te val en nie vir hulp te vra nie, of om te weier om berou oor jou

sondes te hê, is erger as die val self. Miskien kry jy skaam om enigiemand te laat weet

dat jy geval het. Is jou openbare beeld egter so belangrik dat jy sal voortgaan om in

jou ellendige toestand te lewe? Is jy so mislei dat jy weier om jou behoefte aan God te

erken? Hou op om so trots te wees! Is dit nie wat jou val in die eerste plek veroorsaak het

nie? Hoogmoed is gevaarlik, omdat dit jou dwing om hulpeloos vir dae – en selfs jare

– te lê. Die waarheid is egter dat as jy vroeër vir hulp gevra het, kon jy lankal opgestaan

en met jou lewe aangegaan het. Die goeie nuus is egter dat dit nooit te laat is om berou

te hê en jou behoefte aan God te erken nie. Toe Nebukadnesar dit gedoen het, het sy

rede en verstand teruggekeer en het hy sy koningskap teruggekry. Dieselfde kan met

jou gebeur.


2017/05/10

Psalm 130:3 NLV

Bêre die maatstok!

Ons lewe in ‘n samelewing wat resultaat-georiënteerd is, waar ons erkenning kry vir ons

prestasie op skool, in sport en in ons werk. God dink egter nie so nie. Sy gedagtes en weë

is ver bokant ons s’n (sien Jesaja 55:8-9). Hy word nie beïndruk deur leë offers nie. ‘Wat

verkies die Here: brandoffers of gehoorsaamheid? Gehoorsaamheid is beter as offers...’

(1 Samuel 15:22 NLV). Gevoelens en emosies is kragtig, maar selde objektief. Wanneer jy

jou waarde as Christen op jou optrede as swak mens baseer, juig die Vyand. Satan word

die ‘...aanklaer van ons medegelowiges...’ (Openbaring 12:10 NLV) genoem; hy wil hê dat

jy al jou foute en mislukkings moet raaksien. Dan kan hy jou treiter deur jou aan al die

kere te herinner wat jy jou humeur verloor het, gekritiseer het, of nie opgestaan het vir

dit wat reg is nie. Dawid het gesê, ‘Here, as U ons sondes sou opteken, wie, Here, sou ooit

kon bestaan?’ Selfs die mees gedissiplineerde gelowige het areas waarin hy of sy sukkel

of misluk. Dit is hoekom ons elke uur van die dag God se genade en vergifnis nodig het.

‘Hy weet waarvan ons gemaak is; Hy weet dat ons net stof is’ (Psalm 103:14 NLV) en Hy

is nooit verras wanneer ons, ten spyte van ons beste bedoelings, tekort skiet nie. Reimar

Schultze sê: ‘God meet ons nie aan ons optrede nie, maar aan ons liefde vir Jesus. In die

Koninkryk van God is ons liefde vir Jesus ons prestasie. Alles anders is sekondêr daar

toe. Ons Meester begeer dat ons by Hom, in Hom, in gemeenskap met Hom wil wees

en Hom gelukkig wil maak.’ Bêre dus jou maatstok en wees bly dat God jou nie aan jou

optrede meet nie, maar aan Christus se optrede.

Sielskos: Deut 28-29; Matt 8:1-17; Ps 57; Spr 12:15-17

2017/05/11

Johannes 8:32 NLV

Die waarheid oor die huwelik (1)

Die idee van ‘die perfekte huwelik’ mislei en ontnugter ons en berei ons voor om op te gee

wanneer fantasie met realiteit bots – wat altyd gebeur! Eers wanneer jy die waarheid oor

swak, weifelende, frustrerende mense aanvaar – en dat jy ook een is – sal jy blywende

geluk in die huwelik vind. Kom ons kyk vir die volgende paar dae na sommige van die

algemeenste wanbegrippe oor die huwelik. Die liefdesgogga: Ons dink as ons op die

regte plek, op die regte tyd, saam met die regte persoon is, sal die liefdesgogga ons ‘byt’

en sal ons ‘n leeftyd van saligheid smaak. Die probleem is egter wanneer ons doodmoeg

is van kinders grootmaak en die huispaaiement moet betaal, verdwyn die liefdesgogga

soos mis voor die son. In die daaglikse sleurgang van skottelgoed, doeke en swoeg, moet

iets meegee. Dis dan wanneer romanse by die venster uitvlieg en realiteit sy verskyning

maak. Omdat ons romanse met ware liefde verwar, dink ons foutiewelik dat liefde verby

is. Die waarheid is, die liefde sterf nie omdat romanse die knie voor realiteit moet buig

nie. As twee mense wat verlief raak gewillig is om in liefde deur die uitdagings van die

lewe saam te staan, kan romanse weer sterker en veerkragtiger as ooit bloei. Romanse

mag ons dalk bymekaar uitbring, maar onselfsugtige liefde hou ons bymekaar. Die Bybel

sê, ‘Die liefde is geduldig en vriendelik, die liefde is nie jaloers nie, die liefde blaas nie sy

eie beuel nie, is nie vol van homself nie. Dit... stel nie sy eie belange voorop nie, is nie

kort van draad nie, hou nie boek van die kwaad wat jou aangedoen word nie... Die liefde

bly... steeds vertrou, dit hou aan met hoop, dit verduur alles’ (1 Korintiërs 13:4-7 NLV).

Sielskos: Deut 30:1-32:28; Matt 8:18-34; Ps 62; Spr 12:18-19

2017/05/12

Hooglied 8:7 DB


Die waarheid oor mnr en mev Reg: Baie mense wat sukses in hulle loopbane behaal,

sukkel om mense in ‘n sosiale omgewing te ontmoet. Dit het tot die fenomeen gelei waar

mense ‘n maat deur die internet vind. Vandag, in die westerse wêreld, begin twee uit

vyf huwelike op hierdie manier. Afspraakwebwerwe stel ‘n profiel van hulle gebruikers

saam wat op hulle ouderdom, voorkoms, waardes, voorkeure en ambisies gebaseer is

en help hulle dan om ‘n maat vir ‘n afspraak te kry. Die egskeidingsyfer tussen mense

wat mekaar op die internet ontmoet het, is egter net so hoog as tussen mense wat

mekaar op die tradisionele manier ontmoet het. Hoekom is dit so? Omdat ‘...Elkeen wat

liefde met geld en besittings wil koop, word verwerp.’ Wanneer die borrel bars, gebeur

drie dinge: 1) Ons huil, manipuleer en oefen druk op ons maat uit. Wanneer dit nie werk

nie, blameer ons hulle omdat hulle ons verander het en ongelukkig maak. ‘Hy is nie

die man wat ek gedink het hy is nie.’ Miskien nie, maar hy is die een met wie jy getrou

het – en met sekere uitsonderings, is hy nie die enigste een wat die probleem is nie. 2)

Ons kom tot die gevolgtrekking dat mnr en mev Reg toe eintlik mnr en mev Verkeerd

is. Dus begin ons vir die regte een soek, of besluit dat die teenoorgestelde geslag vals,

ontrou en wispelturig is. 3) Ons besef dat blywende geluk net by een Persoon gevind

kan word – God. In plaas daarvan om die regte persoon te probeer vind, probeer ons

om die regte persoon te word; die een wat God ons geskep het om te wees. Die mens

wat vrygewig is, ander toelaat om hulleself te wees en wat na God vir ons vreugde en

geluk kyk.

Sielskos: Deut 32:29-34:12; Matt 9:1-13; Ps 49; Spr 12:20-22

2017/05/13

Lukas 6:38 NLV


Die waarheid oor die houer: Toe die bord vir tiendes in die kerk omgestuur is, het ‘n

vrou nie iets ingesit nie. Toe sy die heelpad huis toe kla oor hoe sleg die diens was,

het haar seuntjie gesê, ‘Ma, dit bewys dat as jy nie iets insit nie, kan jy nie iets uitkry

nie.’ Die huwelik is soos ‘n leë houer – jy kry daaruit wat jy daarin sit. Hierdie waarheid

bevry jou om jou verhouding ryk en belonend te maak, deur eerder ‘n gewer as ‘n

ontvanger te word. Sommige mense dink die houer kom reeds gevul met romanse en

seksuele vervulling. Hulle dink hulle kan vat wat hulle van hierdie nimmereindigende

voorraad wil hê – onmiddellike bevrediging gewaarborg! Een dag kyk hulle egter in die

houer en vind dit leeg. Geskok, teleurgesteld, woedend en hopeloos kom hulle tot die

gevolgtrekking dat hulle eggenoot misluk het, hulle mislei en in die steek gelaat het.

Hoekom anders sal die houer leeg wees? Hulle begin dan vir ‘n nuwe houer soek. Die

waarheid is, dis jou verantwoordelikheid om elke dag genoeg deposito’s te maak om

‘n ryk verhouding te waarborg. Jesus het gesê, ‘...Met watter maat julle ook al meet –

klein of groot – dit sal gebruik word om te meet wat julle sal terugontvang.’ Vra jouself

af wat jy graag in die houer wil hê en hoeveel daarvan jy wil hê. Deponeer dan genoeg

om daardie hoeveelheid te genereer. J Allan Petersen het gesê: ‘Daar is nie liefde in die

huwelik nie; liefde is in mense en mense sit dit in hulle huwelik. Daar is nie romanse in

die huwelik nie; mense moet dit in hulle huwelik ingiet. ‘n Paartjie moet ‘n gewoonte

van gee, liefhê en bediening vorm om die houer vol te hou.’

Sielskos: 1 Pet 1-5; Matt 9:14-26; Ps 18:1-29; Spr 12:23-24

2017/05/14

Rigters 16:22 NLV

Byt vas – hulp is oppad

Wanneer ons aan Simson dink, dink ons gewoonlik aan sy mislukkings – die stomende

verhaal van hom en Delila. Dis waar dat Simson alles verloor het: sy hare, sy krag, sy

sig, sy posisie, sy familie en sy reputasie. Die magtigste man wat Israel nog ooit gesien

het was nou in ‘n Filistynse tronk opgesluit: blind, verneder, besig om meel te maal

en ‘n voorwerp van bespotting. Dis egter nie verby tot God sê dis verby nie! Op sy

laagste punt het Simson tot God vir genade uitgeroep en dit ontvang. ‘Maar daar het

sy afgeskeerde hare weer begin groei.’ Sy hare, wat die geheim van sy krag was, is

herstel. Gevolglik was sy grootste oomblikke in die bediening sy laastes! Vandag word

hy met erevermelding in Hebreërs hoofstuk elf genoem, tesame met ander helde van

die geloof (sien Hebreërs 11:32). God se belofte is: ‘Maar dié wat hulle hoop op die

Here stel, sal hulle krag terugkry...’ (Jesaja 40:31 NLV). Jy mag dalk nou seer hê, maar

wees geduldig, hulp is oppad. Jy bid, ‘Here, ek het geval en ek kan nie opstaan nie.’ Hou

vas, die Here kom om jou te help, jou te bevry en jou te herstel. In die Ou Testament,

toe Job, die patriarg met sere, met bankrotskap en verlies gesukkel het, het hy gesê,

‘...deur my worsteling sal ek gretig wag op die vrylating’ (Job 14:14 NLV). God het Job

herstel en vir hom twee keer soveel gegee as wat hy verloor het. Hy wil dieselfde vir

jou doen. Byt dus vas – hulp is oppad!

Sielskos: Jona 1:10-2:10; Matt 12:38-42

2017/05/15

Johannes 4:7 NLV

Deel vandag jou geloof met iemand

Eendag het Jesus ‘n vrou ontmoet wat water by ‘n put kom skep het. Na vyf mislukte

huwelike, het sy geen vertroue in mans gehad nie en was haar selfvertroue op ‘n

laagtepunt. Na haar ontmoeting met Christus, het sy egter die put radikaal veranderd

verlaat. Wanneer jy jou geloof met iemand wil deel, is daar drie belangrike lesse uit

haar verhaal te leer: 1) Jesus sien die beste in almal. ‘Fariseërs en wetskenners het

beswaar gemaak dat Hy met veragtelike mense geassosieer het...’ (Lukas 15:2 NLV).

Hulle was reg ten opsigte van die vrou by die put. Sy is deur vyf egskeidings en die

hele dorp het oor haar geskinder. Tog was sy die eerste persoon aan wie Jesus Homself

as die Messias voorgestel het. Jesus meet jou nie aan jou verlede of jou stamboom

nie, maar aan jou potensiaal. 2) Jesus verander jou en gebruik jou dan om ander te

verander. Hierdie vrou was die eerste persoon wat die evangelie in Samaria verkondig

het, en ‘Uit daardie dorp het baie van die Samaritane in Jesus begin glo op grond van

die woorde van die vrou...’ (Johannes 4:39 NLV). God kan jou gebrokenheid gebruik

om ander mense heel te maak. 3) Jesus het nie nodig dat jy Hom verduidelik nie, net

dat jy Hom voorstel. Die Bybel sê, ‘Baie meer van hulle eie mense het op grond van Sy

woorde begin glo. Hulle het vir die vrou gesê: ‘Ons glo nie net meer op grond van jou

gepraat nie; ons het nou self gehoor wat Hy sê, en ons weet dat Hy regtig die Verlosser

van die wêreld is’’ (Johannes 4:41-42 NLV). Deel vandag jou geloof met iemand.

Sielskos: Obad; Mal 1-4; Matt 9:27-38; Ps 18:30-50; Spr 12:25-28

2017/05/16

Psalm 34:15 NLV

Hoe om vrede te handhaaf

Jy kan ‘n vredevolle gemoed handhaaf waar jy ook al gaan en wat jy ook al doen. ‘Hoe

is dit moontlik?’ vra jy. Die Bybel sê, ‘...Soek vrede en streef dit na.’ Om ‘n lewe vol vrede

te geniet, moet jy eers dit wat jou vrede steel, herken. Satan gebruik baie dieselfde

taktiek op almal, maar ons het elkeen een spesifieke kwessie. Een persoon mag

byvoorbeeld sukkel om twee of drie dinge op ‘n slag te doen, terwyl iemand anders

energiek voel deur aan verskeie projekte terselfdertyd te werk. Ons is almal anders en

ons moet onsself leer ken. Satan bestudeer jou versigtig en weet watter knoppies om

te druk. ‘n Bybelonderwyser skryf: ‘Ek kan dinge beter hanteer wanneer ek nie moeg

is nie, dus wag Satan tot ek moeg is voor hy my aanval. Ek het dit wat Satan reeds van

my weet, geleer deur vrede na te streef en nou probeer ek om nie te moeg te word

nie, aangesien ek dan vir hom ‘n deur oopmaak. Dit sal feitlik onmoontlik wees om

‘n vredevolle lewe te handhaaf wanneer jy nie jouself bestudeer nie en weet watter

dinge jou vrede steel nie. Maak ‘n lysie elke keer wanneer jy ontsteld raak. Vra jouself

wat die probleem veroorsaak het en skryf dit neer. Wees eerlik met jouself, anders sal

jy nooit vry wees nie.’ In die middel van die lewe se storms, kan jy deur God se vrede

geanker word. Hy sal dit egter nie net in jou skoot laat val nie; jy moet ook jou deel

doen deur dit na te streef. As jy vandag jou vrede verloor – gaan soek dit en kry dit

terug.

Sielskos: Rut 1-4; Matt 10:1-10; Ps 88:1-9a; Spr 13:1-3

2017/05/17

1 Konings 17:7 NLV

God is jou onfeilbare bron

Die Psalmdigter skryf, ‘Gelukkig is hy... wat sy hoop vestig op die Here sy God’ (Psalm

146:5 NLV). Een skrywer merk op: ‘Soms wanneer daar nie genoeg geld is om al die

gate toe te stop nie, sê mense vir ons om ‘n begroting op te stel en daarby te hou.

Ons kyk na die situasie en dink dat daar nie ‘n manier is wat dit sal werk nie. Dis dan

tyd om op God te vertrou. Jou moontlikhede word nie deur jou huidige of die verlede

se omstandighede beperk nie. As daar nie genoeg is om jou uitgawes te betaal nie,

doen jou bes en laat dit gaan. Vertrou op God om aan jou behoefte te voorsien en kyk

dan verder as jou beursie. Kyk na jou bron. Maak aanspraak op goddelike, onbeperkte

voorsiening. Doen jou deel. Strewe na finansiële verantwoordelikheid in jou aksies

en gedagtes. Vra vir wysheid en luister na God se leiding. Ons almal weet dat geld

‘n noodsaaklike deel van die lewe is – en God weet dit ook.’ F B Meyer het gesê: ‘Ons

geloofsopvoeding is nie volledig tot ons geleer het dat God se voorsiening deur verlies

werk nie. Elia se droë spruit is ‘n weerspieëling van ons lewens! Ons moet die verskil

leer tussen om op die gawe te vertrou en om op die gewer te vertrou. Die gawe mag

dalk ‘n seisoen hou, maar die gewer is vir ewig. As die Here Elia direk na die weduwee

in Sarfat gelei het, kon hy dalk iets gemis het wat van hom ‘n beter man gemaak het

– om deur geloof te lewe. Wanneer ons aardse bronne opdroog, gebeur dit sodat ons

kan leer dat ons hoop en hulpbronne in God is.’

Sielskos: Rig 1-3; Matt 10:11-20; Ps 88:9b-18; Spr 13:4-6

2017/05/18

1 Timoteus 5:17 DB

Die kwaliteite van ‘n geestelike leier

Om ‘n geestelike leier te wees wat waardig is om gevolg te word: 1) Moet jy deur iemand

aanspreeklik gehou word. Iemand wat jou goed genoeg ken om saam met jou te bid,

jou in jou swak areas te versterk en wat jou raad op belangrike besluite kan gee. Gesag

sonder aanspreeklikheid lei altyd tot ‘n ramp. 2) Jou persoonlike prioriteite moet in

orde wees. Te veel van ons word suksesvol ten koste van ‘n gebroke huis en verswakte

gesondheid, omdat ons prioriteite nie in die regte orde is nie. 3) Jou pad met die Here

moet konsekwent wees. Dawid het gesê, ‘Ek het u woord in my hart gebêre sodat ek

nie teen U sou sondig nie’ (Psalm 119:11 NLV). ‘n Gedissiplineerde daaglikse pad met

God is die beste beskerming teen sonde. As jy eerder jou tyd op dinge wat belangriker

as God geword het spandeer, moet jy versigtig wees. Neem tyd om elke dag te bid en

jou Bybel te lees – en pas daardie tyd met jou lewe op. As jy ‘n pastoor is, is jou eerste

roeping nie die bouprojek, die kerkraad of die begroting nie, dit is ‘...Wees ‘n herder vir

my skape’ (Johannes 21:16 NLV). As jy op ‘n Saterdag jouself vind waar jy op die internet

na ‘n raamwerk vir jou preek vir die volgende dag soek, is dit tyd om veranderinge te

maak. Delegeer sekondêre take en stel die eerste dinge weer eerste. ‘...kyk uit vir sewe

mans onder julle wat daarvoor bekend is dat hulle vol van die Heilige Gees is en wysheid

het. Ons sal hulle dan vir hierdie bediening aanstel. Óns sal dan al ons tyd bestee aan

gebed en die bediening van die woord’ (Handelinge 6:3-4 NLV).

Sielskos: Rig 4-6; Matt 10:21-31; Ps 93; Spr 13:7-8

2017/05/19


Hoe verandering plaasvind (1)

Verandering vind deur ‘n krisis plaas. God het Jakob se naam, wat ‘bedrieër’ beteken,

na Israel verander wat ‘’n prins by God’ beteken. Hy het dit deur ‘n krisis gedoen. Jakob

het desperaat geword nadat hy besef het dat hy huis toe moet gaan en sy broer Esau in

die gesig moet staar. Daardie nag in sy tent het hy met die engel van die Here gestoei.

Die verandering in sy lewe het nie vinnig of maklik gebeur nie. Jakob het skielik besef

dat hy besig was om met God te stoei en dat dit ‘n geveg was wat hy nie kon wen nie.

Net so sal God jou met ‘n kwessie wat jy nie kan oplos nie laat stoei, om jou aandag

te kry. Hy sal jou tot op ‘n plek bring waar jy moet toegee, ‘Ek kan nie hierdie situasie

hanteer nie. Dis te groot vir my. Ek het God nodig!’ As dit is waar jy vandag is, staan jy

op die rand van ‘n deurbraak. ‘Soos ‘n arend haar kuikens grootmaak... so sprei Hy sy

vlerke en vang en dra hulle op sy vlerke. Net die Here bewaar hulle...’ (Deuteronomium

32:11-12 NLV). ‘n Arend sal haar kuikens by die nes uitskop om hulle te leer vlieg. Kan

jy dink wat deur hulle koppe gaan? ‘Dis my ma wat dit aan my doen!’ God sal dieselfde

aan jou doen. Hy sal ‘n krisis toelaat om jou aandag te trek. Hy weet dat jy nie sal

verander totdat jou vrees vir verandering deur die pyn wat jy ervaar, oorskadu word

nie. Die punt is: ‘Ons almal weerspieël die heerlikheid van die Here... Ons word al hoe

meer verander om soos die Here te lyk...’

Sielskos: Rig 7:1-9:33; Matt 10:32-42; Ps 97; Spr 13:9-10

2017/05/20

Genesis 32:26 NLV


Verandering gebeur deur toewyding. Toe Jakob besef dat hy met die engel van die

Here stoei, het hy gesê, ‘...Ek sal jou nie laat gaan nie tensy jy my seën.’ Dis wat dit vat

– toewyding. Jakob was toegewyd en het volhard; hy het aangehou tot hy daardeur

gewerk het. Dit was frustrerend en het hom afgerem. Hy was egter toegewyd om

daarin te volhard totdat God dit ten goede vir hom verander het. Wanneer God ons

aandag deur ‘n krisis verkry, los Hy nie altyd die probleem onmiddellik op nie; partykeer

wag Hy om te sien of ons toegewyd is. Ons is so gewoond daaraan om onmiddellike

bevrediging te kry – kitskos, onmiddellike toegang tot die internet, onmiddellike

sukses – dat wanneer ons nie ‘n onmiddellike antwoord op ons gebede of verandering

in ons situasie sien nie, sê ons, ‘Vergeet daarvan, Here.’ Die feit is dat jy nie oornag in

hierdie gemors beland het nie, dus sal jy ook nie oornag daar uitkom nie. Soms moet

God ons swakhede laag vir laag verwyder. Kundiges vertel ons dat dit ses weke neem

wanneer ons dieselfde ding elke dag doen, om ‘n gewoonte te word. Dink daaroor in

terme van om die gewoonte te ontwikkel om elke dag te bid en jou Bybel te lees, of

om te leer om weer jou eggenoot lief te hê. Dis ses weke... twee-en-veertig dae... meer

as ‘n duisend ure... en Satan sal jou om elke hoek en draai aanval. Wat moet jy dus

doen? Spandeer tyd saam met God. ‘Maar dié wat hulle hoop op die Here stel, sal hulle

krag terugkry. Hulle sal vlieg soos arende. Hulle sal hardloop en nie moeg word nie.

Hulle sal loop en nooit vermoeid word nie’ (Jesaja 40:31 NLV).

Sielskos: Rig 9:34-11:40; Matt 11:1-19; Ps 129; Spr 20:25; Pred 5:4-6

2017/05/21

Genesis 32:27 NLV


Verandering vind deur belydenis plaas. Toe hy homself as ‘Jakob’, wat ‘bedrieër’ beteken,

geïdentifiseer het, het Jakob sy karakterfoute erken. Dit is ‘n belangrike deel in God se

proses om ons te verander, omdat ons nooit verander tot ons ons foute, sondes en

swakhede eerlik in die gesig staar nie. Ons moet sê, ‘Here, ek het ‘n probleem, ek is

in ‘n gemors en ek het foute gemaak.’ Dan kan God aan jou begin werk. Het jy al ooit

agtergekom hoe maklik dit is om verskonings te maak? Ons word meesters daarin om

ander te blameer en sê dinge soos, ‘Dis nie my skuld nie. Dis die omgewing waarin

ek grootgemaak is se skuld – my ouers dra die blaam.’ Of, ‘Die slegte situasie by die

werk is my baas se skuld.’ Hoekom praat ons so en tree so op? Omdat dit moeilik is om

ons persoonlike foute en mislukkings te erken en omdat dit moeilik is om hulp te vra.

Hoekom moet ons ons foute aan God erken? Sodat Hy kan weet wat aangaan? Nee,

Hy weet dit al klaar! Wanneer ons aan God erken dat ons gesondig het, verras dit Hom

nie; Hy weet van al ons probleme. Ons bely ons sondes aan Hom omdat Hy wil hê dat

ons moet sê, ‘U is reg, Here, ek het ‘n probleem. Ek het ‘n gemors daarvan gemaak.’ Dis

verootmoedigend om ons foute te erken, maar wanneer ons dit begin doen, gee God

ons toegang tot Sy krag wat ons positief verander. Op daardie punt begin ons om die

mens te wees wat ons nog altyd wou wees . Die waarheid is: God is lief vir jou net soos

jy is – maar Hy is te lief vir jou om jou net so te laat staan.

Sielskos: Gen 2:7-25; 1 Kor 15:39-55

2017/05/22

Genesis 32:30 NLV


Verandering vind deur samewerking plaas. God het Jakob begin verander die oomblik

toe hy erken het wie hy was en met God se plan begin saamwerk het. Jakob het die plek

waar hy met die engel gestoei het, ‘Pniël’ genoem, wat ‘die aangesig van God’ beteken.

Elkeen van ons moet uiteindelik tot aangesig met God kom en wanneer ons dit doen,

kan Hy ons begin verander. God het inderwaarheid vir Jakob gesê, ‘Nou kan ons aan die

werk spring. Werk saam en vertrou my. Ek sal die veranderinge wat jy wil hê maak en jou

seën.’ Let op: God het nie gesê, ‘Probeer hard en gebruik jou wilskrag om te verander

nie.’ Wilskrag alleenlik bring nie blywende verandering in ons lewens mee nie. Interne

motivering bring blywende verandering mee en dis waaraan God werk. Hy het vir Jakob

gesê, ‘Jou naam sal nie meer Jakob wees nie... Van nou af is dit Israel...’ (vers 28 NLV). Jakob

was nooit weer dieselfde nie. Wanneer jy ‘n persoonlike ontmoeting met die lewende

God gehad het, verander Hy jou. Hy het Jakob van ‘n ‘bedrieër’ na ‘n ‘prins’ verander. God

het sy potensiaal raakgesien. Hy het verby die harde uiterlike van ‘n man wat homself as

genadeloos en wêreldwys uitgebeeld het, gekyk. God het al Jakob se swakhede gesien,

maar Hy het ook onder die oppervlak gekyk. Dieselfde geld vir elkeen van ons: ‘En as ons

God se kinders is, maak Hy ons ook sy erfgename. Saam met Christus deel ons in God se

rykdom... ons [sal] sekerlik ook deel in sy heerlikheid’ (Romeine 8:17 NLV). In die woorde

van Paulus: ‘Ek is oortuig dat God die goeie werk wat Hy in julle begin het, sal voortsit

totdat Hy dit voltooi op die dag wanneer Jesus Christus terugkom’ (Filippense 1:6 NLV).

Sielskos: Rig 12-15; Matt 11:20-30; Ps 47; Spr 13:11-12

2017/05/23

Genesis 32:31 NLV


Die Bybel sê, ‘Die son het opgekom net toe hy van Pniël af weggaan. Van toe af was

hy mank aan sy heup.’ Dit is betekenisvol, omdat die bobeenspier een van die sterkste

spiere in die menslike liggaam is. Om Jakob se aandag te kry, het God hom op ‘n punt

van krag aangeraak. Sodra ons begin dink, ‘Hierdie is waarmee ek regtig goed is; hierdie

is waarin ek sterk is,’ mag God dalk daardie presiese ding aanraak om ons aandag te

trek. Jakob se mankheid het as ‘n lewenslange herinnering gedien dat hy nie op sy

eie krag nie, maar op God se krag, moes staatmaak. Sodoende het hy ‘n baie sterker

persoon geword. Dink daaroor: Elke keer wat Jakob in die moeilikheid geraak het, was

sy eerste reaksie om om te draai en weg te hardloop. Klink dit soos ‘n bekende patroon?

Doen jy dit? God het toe uiteindelik gesê, ‘Ek weet wat is die oplossing daarvoor – Ek

sal sy been mank maak!’ Vir die res van sy lewe moes Jakob stilstaan en sy probleme

reguit in die gesig staar, nie in sy eie krag nie, maar met God se krag. Wat van jou? Wat

is die een ding in jou lewe wat jy die graagste sal wil verander? Wil jy hê dat God jou

moet help? Hy sal – op Sy manier. Hy sal die proses van krisis, toewyding, belydenis

en samewerking gebruik. Wanneer God jou verander, is die verandering permanent.

Jy hoef jou nie oor jou wilskrag en of jy dit gaan deurvoer te bekommer nie, omdat jy

saam met God sal werk en net op Hom sal vertrou.


2017/05/24

Psalm 43:10 NLV

Spandeer tyd alleen saam met God

God kan enige tyd, enige plek, deur enigiemand, deur ‘n gedagte te laat posvat, met

jou praat (sien 1 Korintiërs 2:16). Omdat daardie gedagte egter deur jou besige lewe

oorweldig kan word, sê Hy, ‘Wees stil en weet Ek is God!..’ Wanneer jy stil is, hoor jy God

se stem duideliker. ‘Jesus het baie sulke voorbeelde gebruik om die woord aan die

mense, volgens wat hulle kon verstaan, te bedien... maar wanneer Hy agterna alleen

was met sy dissipels, het Hy alles vir hulle verder verduidelik’ (Markus 4:33-34 NLV).

Gail MacDonald skryf in High Call, High Privilege, die volgende: ‘Die antieke vaders

van die woestyn het hulself aan die volgende geloof verbind: stilte, afsondering en

innerlike vrede. Eers nadat hulle ‘n geruime tyd geluister het, het hulle hulself gereed

geag om te praat. Vandag is daar ‘n vreemde siening dat geestelike vernuwing gevind

word deur aanhoudend nuwe stemme op te soek, meer vergaderings by te woon

en om half-gevormde opinies te deel. Ons val in die strik om te glo dat God tevrede

is wanneer ons ons informasie, skedules en verhoudings maksimaal gebruik. Ons

benodig egter stilte voor God, ‘n tyd van hemelse bespreking waar ons meer luister

as wat ons praat. Hierdie stilte benodig afsondering.’ Wanneer jy stil voor God wag,

word jou geestelike oor opgelei om sy stem te hoor. Sylvia Gunter skryf: ‘Ek verstaan

hoekom Dawid sy siel beveel het om stil te wees. Dis moeilik om stil te word; amper

onmoontlik vir sommige van ons. Ek het egter agtergekom dat my siel en gees al ‘n

geruime tyd vir stilte uitgehonger was en noudat ek my siel weer die smaak van stilte

gegee het, is dit nie tevrede totdat dit ‘n gereelde deel van my dag is nie.’


2017/05/25

Psalm 107:2 NLV

Skree dit van die dakke af!

Maak nie saak hoe erg jy misluk nie, God sal jou nog ‘n kans gee. Nadat Jona

ongehoorsaam aan God was, drie dae in die vis se maag deurgebring het en op die

oewer by Nineve uitgespoeg is, sê die Bybel, ‘Die Here het ‘n tweede keer met Jona

gepraat...’ (Jona 3:1 NLV). Koning Dawid se sondes was voorbladmateriaal. Tog het God

hom herstel, en het hy geskryf: ‘...Hy het... my opgetel uit die afgrond van die dood, uit

die modder en die slym. Hy het my voete op ‘n rots laat staan en my op vaste grond

laat loop. Hy het my ‘n nuwe lied gegee, ‘n lofsang om ons God te prys. Baie sal met

eerbied toekyk. Hulle sal op die Here vertrou’ (Psalm 40:2-4 NLV). Wanneer God jou

herstel, maak dit nie saak wie teen jou veg nie. Wanneer Hy jou oplig, kan niemand jou

afbring nie. As God jou gered het, ‘sê dit dan.’ Niemand anders kan jou verhaal vertel

nie. Niemand anders weet wat God vir jou gedoen het nie. Niemand anders weet hoe

ver jy gekom het nie. Niemand anders weet waardeur jy is nie. Jý doen egter – jy weet

dit is net aan God se genade te danke dat jy oorleef het. Moenie toelaat dat die duiwel

jou getuienis steel nie. Dit mag jou dalk langer as ander mense geneem het, maar God

het aan jou die oorwinning gegee. Die duiwel wil jou stilmaak, omdat wanneer jy aan

mense vertel wat God vir jou gedoen het, iemand anders vrygemaak sal word. Die

Bybel sê, ‘Het die Here jou gered? Sê dit dan, jy wat Hy verlos het van die vyand.’ Die

woord vir jou vandag is dus: Skree dit van die dakke af!

Sielskos: Luk 24:50-53; Hand 1:1-11; Ef 4:7-10

2017/05/26

Psalm 16:5 NLV

Moenie afguns vastrapplek gee nie

Het jy toegelaat dat afguns vastrapplek in jou lewe kry? Vind jy jouself waar jy sekere

mense vermy of gebelgd voel oor hulle suksesse? Die Bybel sê, ‘...Jaloesie vreet mens

op’ (Spreuke 41:30 NLV). As jy jouself bevind waar jy die heeltyd iemand kritiseer of

dit wat hulle het, begeer, lees hierdie woorde en dink versigtig en in gebed daaroor

na: ‘‘Ek weet wat Ek vir julle beplan het,’ sê die Here. ‘Ek beplan voorspoed vir julle, nie

teëspoed nie. Ek wil hê dat julle hoop vir die toekoms moet hê. Julle sal na My roep

en kom bid. Ek sal na julle luister’’ (Jeremia 29:11-12 NLV). Afguns sê inderwaarheid vir

God, ‘U het ‘n fout gemaak toe U my gemaak het wat ek is. Ek wil soos daardie ander

persoon wees en hê wat hulle het!’ Nee, God het ‘n unieke roeping en doelwit vir jou.

In plaas daarvan om vir afguns ‘n vastrapplek te gee, laat dit jou motiveer om die beste

moontlike ‘jy’ te wees – die persoon wat God jou geskep het om te wees. As jy ‘n stryd

met afguns voer, is hierdie medisyne uit God se Woord wat jy elke dag moet inneem:

‘Here, U alleen is my erfenis, my beker van seën. U waarborg my lotsbestemming. ’n

Pragtige plek is vir my afgemeet. Wat ek geërf het, is vir my mooi! Ek prys die Here wat

my insig gee; ook in die nag is ek daarvan bewus. Die Here is altyd by my. Ja, Hy is aan

my regterhand; daarom sal ek nie struikel nie. Hieroor is my hart vol vreugde. Ek besing

sy lof, en woon in veiligheid’ (Psalm 16:5-9 NLV).

Sielskos: Gal 1-3; Matt 12:22-37; Ps 101; Spr 13:20-23

2017/05/27

Hebreërs 4:2 NLV

Kry die mengsel reg!

Vir sement om beton te word, moet dit met sand en water gemeng word. As jy nie die

mengsel regkry nie, sal die sement nooit beton word nie. Net soos jou liggaam elke

dag gesonde kos moet kry, moet jou siel deur God se Woord gevoed word. Jy kan egter

nie daar stop nie. Jy moet volgens dit wat jy hoor en lees, optree. As jy nie die daad

by God se Woord voeg nie, gaan dit jou niks baat nie. ‘Want hierdie blye boodskap...

het ons ook ontvang, net soos hulle. Dit het hulle egter niks gebaat nie omdat hulle

die boodskap wat hulle gehoor het, nie geglo het nie.’ Hulle het nie by die boodskap

baat gevind nie, omdat dit nie met geloof gemeng was nie. Om resultate op God se

beloftes te kry, moet jy vertroue in sy krag, wysheid en goedheid saammeng. Hoekom

gaan jy kerk toe en gaan sit op die kerkbanke? Omdat jy volle vertroue het dat die

kerkbanke nie onder jou gaan ingee nie. Die teenoorgestelde is ook waar. Jy mag dalk

sê dat jy glo dat die kerkbank jou gewig sal kan dra, maar as jy nooit daarop gaan sit

nie, oefen jy nie geloof uit nie – omdat jy nie optree volgens dit wat jy glo nie. Wat

beteken dit om in geloof op te tree? 1) Om met God se Woord saam te stem en te weier

om enigiets te sê wat dit weerspreek. 2) Om geduldig te wag op God om sy Woord op

sy eie manier en sy eie skedule te vervul. ‘Wat is geloof dan? Dit is ‘n vaste versekering

dat die dinge waarna ons uitsien, inderdaad sal gebeur...’ (Hebreërs 11:1 NLV). Hierdie

versekering is die onwrikbare waarheid van God se Woord.

Sielskos: Gal 4-6; Matt 12:38-50; Ps 108; Spr 13:24-25

2017/05/28

Filippense 3:13 NLV

Skryf dit neer – skeur dit dan op!

Daar sal altyd mense wees wat slegte dinge van jou sê. ‘Sy sal nooit sukses behaal nie...

Sy ouers was nie belangrik nie en hy gaan ook nie belangrik wees nie!’ Die vraag is:

Wie gaan jy glo, God of jou kritici? Volgens die Skrif: ‘...iemand wat één is met Christus,

is ‘n nuwe skepping. Die ou dinge is verby, kyk, die nuwe is hier!’ (2 Korintiërs 5:17

NLV). God sê dat jy deur sy genade al jou kritici verkeerd gaan bewys, so hou op om

na hulle negatiewe voorspellings te luister. Hou op om na familielede, onderwysers,

base en sogenaamde ‘vriende’ te luister wat jou probeer afkraak. Draai ‘n dowe oor na

rassisme en seksisme. Jesus het gesê, ‘...julle sal begryp wat die waarheid beteken, en

die waarheid sal julle vrymaak’ (Johannes 8:32 NLV). Hernuwe jou gedagtes daagliks

met die waarheid van God se Woord (sien Romeine 12:1-2). Jy mag dalk mishandel,

misbruik, verwerp of afgeskeep gewees het, maar dit is tyd om daardie dinge wat

agter jou is te vergeet en te reik na wat voor jou is. Wanneer God ‘n woord oor jou lewe

gespreek het, is dit wat Hom betref, reeds voltooi. Dit is nou jou werk om dit te glo,

dit te spreek en elke dag in die realiteit daarvan te stap. Wanneer iemand iets sê wat

‘n letsel op jou hart en gedagtes los, doen die volgende: 1) Skryf dit neer op ‘n stuk

papier. 2) Vra God om jou te help om hulle te vergewe en om die letsel uit te wis. 3)

Skeur die papier op, gooi dit in die asblik, en ‘...jaag wenpaal toe, na die hemelse prys

wat God aan [jou] wil gee omdat Christus Jesus dit vir [jou] verdien het’ (Filippense

3:14 NLV).

Sielskos: Gen 24:1-51; 2 Kor 6:14-7:1

2017/05/29

Habakuk 2:2 NLV

Stel doelwitte vir jou lewe

Wanneer jy jou persoonlike doelwitte duidelik gemaak het, kan jy jou persoonlike groei

meet. Hier is agt beginsels wat jou sal help om die regte doelwitte vir jou lewe saam

te stel: 1) Begin met gebed; anders kan die leer wat jy uitklim dalk teen die verkeerde

muur rus. ‘’n Mens kan hoeveel planne maak, maar op die ou einde gebeur wat die Here

besluit het’ (Spreuke 19:21 NLV). 2) Dink op papier. God het vir Habakuk gesê, ‘...Skryf my

antwoord, die visioen, in groot, duidelike letters...’ Dit gee ‘n gevoel van permanensie

wanneer jy jou doelwitte neerskryf. 3) Stel spertye. ‘...Stadig maar seker breek die tyd

aan wanneer die visioen waar sal word...’ (Habakuk 2:3 NLV). Sonder ‘n definitiewe begin

en einde, is dit maklik om uit te stel en nêrens te kom nie. 4) Maak ‘n lys van die stappe

wat jy moet neem. Hou dan die lys ten alle tye by jou; dit sal die pad aandui wat jy

moet neem. 5) Prioritiseer die stappe volgens belangrikheid. Wat moet jy eerste doen?

Wat kan jy later doen? ‘n Georganiseerde plan is altyd beter as om alles in jou kop te

probeer uitpluis. 6) Voeg nou daad by die woord. ‘Wees dus versigtig hoe julle lewe.

Moenie soos ‘n dwaas leef nie, leef wys! Benut elke geleentheid...’ (Efesiërs 5:15-16 NLV).

‘n Gemiddelde plan wat geïmplementeer word is altyd beter as ‘n briljante plan wat net

‘n plan bly. 7) Doen iets elke dag wat jou vorentoe laat beweeg. Byvoorbeeld, lees die

Bybel sistematies binne ‘n jaar deur. Bel ‘n spesifieke aantal kliënte elke week. Oefen elke

dag. 8) Kry doelwitte waaraan jy bereid is om jou lewe te wy. Die Psalmdigter het gesê,

‘Leer ons ons dae só gebruik dat ons wysheid kan bekom’ (Psalm 90:12 NLV).

Sielskos: Klaagl 1:1-3:39; Matt 13:1-9; Ps 113; Spr 14:1-4

2017/05/30

Jesaja 43:1 NLV

Jy behoort aan God

Wanneer God jou verlos, besit Hy jou en Hy beskerm sy besittings! Dit word deur die

verhaal van Belsasar geïllustreer. Die Bybel sê: ‘Koning Belsasar het vir 1 000 van sy

vooraanstaande amptenare ‘n groot fees gehou... Terwyl Belsasar so aan die drink was,

het hy beveel dat die goue en silwer voorwerpe wat sy voorganger Nebukadnesar uit

die tempel van Jerusalem verwyder het, daarnatoe gebring word. Die koning wou saam

met sy vooraanstaande amptenare, sy vroue en sy byvroue daaruit drink’ (Daniël 5:1-2

NLV). As hulle net ‘n waardelose koppie so misbruik het, sou dit nie saak gemaak het nie,

maar God het hierdie heilige voorwerpe te veel waardeer om hulle so te laat misbruik.

Dus het die vinger van God in die nag die noodlot van Belsasar op die paleismure

geskryf. ‘Daardie selfde nag nog is Belsasar die koning van die Babiloniërs doodgemaak’

(vers 30 NLV). As ‘n verloste kind van God, is daar ‘n onveranderde beginsel waarop jy

kan staan: ‘Hy het nie toegelaat dat iemand hulle verdruk nie. Hy het konings oor hulle

gewaarsku: ‘Moenie vat aan my gesalfdes nie’...’ (1 Kronieke 16:21-22 NLV). Jy mag dalk

by die huis aan ‘n moeilike situasie moet werk, of teenspoed oor jou geloof ervaar. Jy kan

egter van een ding seker wees – God het te veel in jou belê om toe te laat dat jy vernietig

word. Wanneer Satan dit probeer, sal God hom onderbreek en sê, ‘Hierdie mense mag

nie aan geraak word nie – dit het My te lank gevat om hierdie vrou te leer om te bid... Ek

het te veel jare spandeer om hierdie man op te lei om sy probleme te oorkom... Hulle

het te veel vir my naam verduur. Haal jou hande van hulle af; hulle is Myne!’

Sielskos: Klaagl 3:40-5:22; Matt 13:10-23; Ps 82; Spr 14:5-8

2017/05/31

Lukas 12:15 NLV

Fokus op dit wat waarlik saak maak

Eendag het ‘n man met ‘n engel gepraat. Die engel het gevra, ‘Wat kan ek vir jou doen?’

Die man het geantwoord, ‘Wys my die Wall Street Journal ‘n jaar van nou af. Dan sal

ek weet hoe om my geld te belê en ‘n multimiljoenêr word.’ Die engel het sy vingers

geklap en vir die man ‘n Wall Street Journal van een jaar in die toekoms gegee. Die

man het deur die koerant geblaai en noukeurig bestudeer watter aandele gaan styg

en watter gaan val. Te midde van sy vreugde, het trane egter oor sy wange begin rol.

Hoekom? Omdat hy sy eie gesig in die kolom van die doodsberigte raakgesien het.

God is nie daarteen gekant dat jy besittings het en sukses in die lewe behaal nie. Hy wil

egter hê dat jy moet weet dat hierdie lewe jou net soveel kan bied en tensy jy nie elke

dag in die lig van die ewigheid lewe nie, sal jy jou tyd op die verkeerde goed mors. Jy

mag die tydelike dinge geniet, solank as wat jou fokus op die ewige dinge bly. Paulus

het gesê, ‘Al is my lewe kosbaar, ag ek dit van geen waarde as ek nie my lewenstaak en

my bediening wat ek van die Here Jesus gekry het, kan klaarmaak nie: om die Goeie

Nuus te verkondig dat God mense liefhet sonder dat hulle iets hoef te doen om dit

te verdien’ (Handelinge 20:24 NLV). As jy in Brittanje ‘n honderd jaar oud word, mag

jy dalk ‘n telegram van gelukwensing van die koningin af kry. Dit beteken egter niks

teenoor die ‘Welgedaan’ wat jy van God sal ontvang wanneer jy sy opdrag vir jou, hier

op aarde vervul het nie.

Sielskos: Amos 1:1-5:17; Matt 13:24-35; Ps 117; Spr 14:9-12

2017/06/01

Efesiërs 4:26 NLV

Woedebeheer (1)

Hier is ‘n Bybelse plan vir groei wat woedebeheer insluit: ‘Julle moet op ’n nuwe,

geestelike manier leer dink. Ja, trek die nuwe mens soos skoon klere aan, die mens

wat na God se beeld geskape is: iemand wat werklik reg lewe voor God en werklik aan

Hom toegewy is. Daarom moet julle die leuen aflê en die waarheid teenoor mekaar

praat. Ons is tog lede van dieselfde liggaam. Moenie sondig as jy kwaad word nie.

Moenie tot die aand toe kwaad bly en die duiwel so ’n houvas gee nie...Moenie enige

vuil taal gebruik nie. Gebruik eerder die regte, opbouende woorde wat nodig is om

dié wat luister, te bevoordeel... Raak saam met alle ander slegte dinge ontslae van

alle bitterheid, woede, wraak, geskel en gevloek. Wees eerder vriendelik met mekaar.

Gee vir mekaar om. Vergewe mekaar soos God julle vergewe het op grond van wat

Christus gedoen het.’ (verse 23-32 NLV). God het aan jou elke emosie wat jy ervaar,

gegee, insluitend woede. Hy wil egter hê dat jy dit op die regte manier sal hanteer.

Wanneer jy kwaad is, moet dit nie ontken nie, maar gebruik dit om ‘n positiewe

verandering mee te bring. Sê, ‘Ek voel kwaad omdat ons verhouding vir my kosbaar

is en ek wil graag daaroor praat.’ Dit bring herstel en oplossings mee. Om voor te

gee dat jy nie kwaad is nie, is basies oneerlik. Dis ook oneerlik wanneer jy oordryf. ‘Jy

luister nooit na my nie... Jy ignoreer altyd my voorkeure... Niemand help my in die huis

nie.’ Sulke veralgemenings is onwaar en irriteer en polariseer ander mense, sodat die

probleem nie opgelos word nie. God se wil vir jou is om jou woede te bestuur, eerder

as wat jou woede jou beheer.

Sielskos: Amos 5:18-9:15; Matt 13:36-46; Ps 121; Spr 14:13-16

2017/06/02

Spreuke 23:16 NLV

Woedebeheer (2)

Wanneer ons woedebeheer uitoefen, is daar twee belangrike Bybelse beginsels:

1) Moenie mense en dinge blameer nie. Blaam is ‘n manier om verantwoordelikheid

te vermy, terwyl jy die vinger na iets anders wys. ‘As jy net betyds is, sal dit nie nodig

wees vir my om aan jou te karring nie,’ of ‘As jy ophou om aan my te karring, sal ek dalk

betyds wees.’ Sulke woorde help nie en jaag net die ander persoon die harnas in, stook

jou woede en gee jou nie die resultate wat jy wil hê nie. 2) Moenie woorde as wapens

of ‘n vorm van beheer gebruik nie. In plaas van om jou emosies te onderdruk, druk

hulle op ‘n gesonde manier uit. Onthou, die doel is om die probleem op te los en die

verhouding te versterk, nie om wonde te veroorsaak nie. Is dit maklik om te doen? Nee,

dis hoekom jy God se hulp nodig het. Die Bybel sê dat jou woorde iemand anders se

gees skade kan aandoen (sien Spreuke 18:14), hulle harte kan breek (sien Spreuke 15:4)

en die verhouding kan vernietig (sien Spreuke 18:21). Salomo het gesê dat woorde

maklik deel word van jou lewe (sien Spreuke 26:22). Wat jy sê, kan lewenslank in die

gedagtes van iemand anders bly. Is dit wat jy wil hê? Sekerlik nie! Aan die ander kant,

is dit nooit nodig om berou te hê oor woede wat reg bestuur word nie. Leer om tussen

die woede wat jy voel en die woorde wat jy spreek, te onderskei. Woede kan dit wat in ‘n

verhouding verander moet word, openbaar. Vra dus vir God om jou te wys wat verander

moet word – eers in jouself en dan in die ander persoon.

Sielskos: Eseg 1-4; Matt 13:47-58; Ps 4; Spr 14:17-20

2017/06/03

Lukas 6:45 NLV

Woedebeheer (3)

Wat jy op die hardeskyf van jou rekenaar stoor, kan met die druk van ‘n knoppie

herroep word. Jesus het gesê: ‘‘n Goeie mens bring goeie dade voort uit ‘n goeie

hart en ‘n slegte mens bring slegte dade voort uit ‘n bose hart. Wat ook al in jou

hart leef, bepaal wat jy sê.’ Wanneer jy ou wrokke op jou “hardeskyf” aflaai, word jy

bitter. Wanneer jy kwaad is, hanteer dit vinnig. Moet ook nie rondsit en hoop dat

die ander persoon die lig sal sien en sal jammer sê nie. Wat as hulle dit nooit doen

nie? Jesus het gesê, ‘As een van jou medegelowiges iets verkeerds teen jou gedoen

het, gaan wys hom daarop...’ (Matteus 18:15 NLV). Wat is vir jou meer kosbaar – jou

sienswyse of die verhouding? Wanneer jy weier om ‘n kwessie te hanteer, voeg jy

nog ‘n geraamte in jou emosionele kas by. Dink wat dit aan jou doen. Dokters sê dat

wrokke en griewe jou maagwand vreet, jou immuunstelsel aanval en jou vatbaar

vir hartprobleme, kanker en ander fisiese, sosiale en emosionele afwykings maak.

Dis nie al nie! Dit neem jou gedagtes in beslag, dreineer jou energie en beperk jou

kreatiwiteit. Dit plaas druk op jou verhouding met God, jou familie en vriende en

neem die geleentheid van jou oortreder af weg om dinge met God en met jou reg

te maak. Totdat jy nie die kwessie hanteer het nie, sal jy dit soos ‘n gewig aan jou

enkel rondsleep. Weier om so te lewe! Vra God vir die nederigheid en moed om die

kwessie vandag nog te hanteer.


2017/06/04

Efesiërs 4:29 NLV

Woedebeheer (4)

Die Bybel sê: ‘Moenie enige vuil taal gebruik nie. Gebruik eerder die regte, opbouende

woorde wat nodig is om dié wat luister, te bevoordeel. Ja, moenie God se Heilige Gees

hartseer maak nie...’ (verse 29-30 NLV). Wanneer jy woedend reageer, maak jy nie net

die ander persoon seer nie, jy maak ook die Heilige Gees hartseer. Het jy al ooit daaraan

gedink? As volgelinge van Christus is ons geroepe om te probeer verstaan wat die

ander persoon nodig het. Dit beteken dat ons nie vorige oortredings of ander mense

bysleep nie en nie opmerkings oor iemand se gewig, kleur, IK of fisiese, verstandelike

en emosionele beperkings maak nie. Moenie dinge ophaal wat die kwessie vertroebel

en jou daarvan weerhou om ‘n oplossing te vind nie. God het jou met die kapasiteit

vir woede gemaak, omdat wanneer dit reg hanteer word, dit die krag kan wees om

positiewe verandering mee te bring. Dus: 1) Soek ‘n oplossing, nie ‘n oorwinning nie.

Om ander mense name te noem of sleg te sê, maak dinge net erger. Jou fokus moet

nie wees op dit wat hulle gedoen het nie, maar op dit wat julle saam kan doen om

die kwessie op te los. 2) Erken jou foute en vra vergifnis. Dit maak dit makliker vir

die ander persoon om sy of haar foute te erken, wanneer jy dit ook doen. 3) Vir elke

moeilikheid wat jy aanspreek, gee ook ‘n opregte kompliment. In plaas van om te

kritiseer, probeer om te sê, ‘Ek is seker dit was nie maklik vir jou om hierdie te hoor

nie. Dankie dat jy met soveel grasie na my geluister het.’ Deur op oplossings, eerder as

blaam te fokus, ontvang mense die geleentheid om goeie verhoudings na te streef.

Sielskos: Lev 23:15-22; Hand 2:1-18

2017/06/05

Spreuke 11:13 NLV

Woedebeheer (5)

As jy ernstig daaroor is om jou woede te beheer, is daar twee dinge wat jy in

gedagte moet hou: 1) Moenie jou vuil wasgoed in die openbaar was nie. Wanneer

jy seergemaak en kwaad is, is dit natuurlik om oor jou oortreder te wil skinder.

Moet dit nie doen nie. Die Bybel sê, ‘’n Geskinder lap geheime uit; betroubare

mense bewaar geheime.’ Vuil wasgoed word gewoonlik op twee maniere gewas: a)

Vernedering: Jy sê dinge wanneer jy weet dat ander mense dit sal hoor. b) Subtiel:

Jy maak grappe oor hulle voorkoms, hulle familie en vriende, hulle persoonlike

gewoontes en kwessies, om hulle sodoende te verneder. Dit vergroot die gaping

tussen julle, wat versoening bykans onmoontlik maak. Die Bybel sê, ‘...Liefde bedek

wat verkeerd gedoen is’ (Spreuke 10:12 NLV). 2) Moenie op ‘n onchristelike manier

optree nie. Moet byvoorbeeld nie sê, ‘Hy het dit oor homself gebring, dus moet hy

maar self daaroor kom nie.’ Dit mag dalk waar wees, maar as ‘n volgeling van Christus

kan jy nie wegstap en wonde los om te sweer nie. ‘Vergewe mekaar soos God julle

vergewe het...’ (Efesiërs 4:32 NLV). Hoe het Christus jou vergewe? Was dit nadat jy

jou foute erken, bely, berou en genade verdien het? Nee. Paulus sê, ‘God laat blyk sý

liefde vir ons egter daarin dat Christus vir ons kom sterf het ten spyte daarvan dat

ons nog sondaars was’ (Romeine 5:8 NLV). Net soos God die inisiatief geneem het,

word jy geroep om genade te bewys aan mense, voordat hulle vergifnis vra. Selfs as

hulle kies om jou vyand te bly, moet jy hulle steeds vergewe. Slegs dan sal jy vrede

hê, sal jou wonde gesond word en sal jy in staat wees om dit agter jou te sit.


2017/06/06

Jesaja 43:18-19 NLV

Laat jou verlede gaan

Die komediant, Jerry Lewis, het gegrap dat sy beste trougeskenk ‘n video van die

seremonie was. Wanneer dinge in sy huwelik sleg gegaan het, kon hy die video

agteruit kyk en ‘n vry man by die kerk uitstap! Ons glimlag, maar jy kan nie teruggaan

en jou verlede herskryf nie. Wanneer jy by die verlede stilstaan, is dit altyd ten koste

van jou toekoms, maar wanneer jy uit jou verlede leer, het dit die potensiaal om

jou toekoms beter te maak. Wanneer jy jouself vind waar jy sê, ‘As ek maar net toe

geweet het wat ek nou weet,’ herinner jouself daaraan dat jy dieselfde ding oor

tien of twintig jaar gaan sê, mits jy aanhou groei. Jy sê, ‘As ek maar net gewillig was

om my eggenoot te vergewe in plaas van om hom of haar te straf, kon ek dalk my

huwelik gered het en ‘n wonderlike verhouding gebou het.’ Miskien stoei jy met

die herinnering van ‘n aborsie en wonder wie die kind vandag sou wees en aan die

vreugde wat hy of sy sou bring. Miskien is jy ‘n goeie persoon wat ‘n slegte ding

gedoen het en nou ‘n misdaadrekord het. God sê: 1) ‘...Julle sondes is vergewe op

grond van wat Jesus vir ons gedoen het’ (1 Johannes 2:12 NLV). 2) ‘Ek... is die Een

wat julle sondes uitwis. Ek doen dit ter wille van Myself en dink nie weer daaraan nie’

(Jesaja 43:25 NLV). 3) ‘Vergeet al die dinge wat in die verlede gebeur het. Dis niks in

vergelyking met wat Ek nog gaan doen nie. Ek gaan iets nuuts doen. Dit het alreeds

begin gebeur!.. Ek gaan ‘n pad maak...’ Laat jou verlede vandag gaan.

Sielskos: Eseg 14:1-16:52; Matt 14:22-36; Ps 1; Spr 14:29-32

2017/06/07

Spreuke 21:6 NLV

Wees getrou aan jouself

Dis makliker om jou integriteit te behou as om dit te herwin. Dit mag jou dalk benadeel

om die regte ding te doen, maar dit sal jou meer benadeel om jou beginsels te laat vaar.

‘Mense wat op ‘n oneerlike manier ryk word, is net soos ‘n voël wat eiers uitbroei wat

sy nie gelê het nie. Hulle sal al hulle rykdom verloor. Aan die einde van hulle lewens sal

hulle niks anders as dwase wees nie!’ (Jeremia 17:11 NLV). In 1994 het die gholfspeler,

Davis Love, ‘n een-hou boete op homself in die tweede rondte van die Westerse Ope

gelê. Hy het sy merker uit ‘n ander speler se pad verwyder en kon toe nie onthou of hy

sy bal weer op die oorspronklike plek neergesit het nie. Omdat hy nie seker was nie,

het hy homself met ‘n ekstra hou beboet. Daardie een hou het veroorsaak dat hy uit die

toernooi geëlimineer is. Teen die einde van die jaar was Love $590 kort om outomaties

vir die Meesters te kwalifiseer en moes hy ‘n toernooi wen om daarvoor te kwalifiseer.

Gelukkig het die storie goed geëindig. Die week voor die Meesters geleentheid het

hy ‘n toernooi gewen en op die ou einde $237,600 gewen deur tweede in die 1995

Meesters te eindig. Later, toe hy gevra is hoe hy sou voel as hy die Meesters misgeloop

het as gevolg van die boete wat hy homself opgelê het, het Love geantwoord, ‘Die

vraag is hoe ek sou gevoel het as ek gewen het en die res van my lewe moes wonder

of ek gekul het.’ In die woorde van Shakespeare: ‘To thine own self be true, and it must

follow, as the night the day, thou canst not then be false to any man.’


2017/06/08

Spreuke 10:32 NLV

Gebruik woorde wat by ‘n Christen pas

Toe George H W Bush in 1988 homself as president van Amerika verkiesbaar gestel het,

het hy erken dat hy ‘n onvanpaste opmerking oor die Amerikaanse joernalis Dan Rather

en die Withuis korrespondent Lesley Stahl tydens ‘n konfrontasie op die lug gemaak het.

Bush het na Rather as iets verwys wat mens nie in goeie geselskap sal oorvertel nie en

ook God se naam ydellik gebruik. Toe hy daaroor gekonfronteer word, het hy gesê, ‘As

ek geweet het dat die mikrofoon aan was, sou ek nie die Here se naam ydellik gebruik

het nie. Ek vra om verskoning daarvoor.’ Die waarheid is, hy moes dit nooit gesê het nie,

of die mikrofoon aan was of nie! Die Bybel sê, ‘Die Here sien alles wat ‘n mens doen. Hy

weet van elke tree wat jy gee’ (Spreuke 5:21 NLV). Eeue gelede het Jesus verklaar: ‘Die

tyd kom dat alles openbaar sal word; alles wat geheim gehou word, sal onthul word. Wat

julle ook al in die donker gesê het, sal in die lig gehoor word, en wat julle agter geslote

deure gefluister het, sal van die dakke af geskree word vir almal om te hoor!’ (Lukas 12:2-

3 NLV). Neem ‘n oomblik en dink na oor hierdie twee Skrifgedeeltes: ‘’n Regverdige mens

dink eers voor hy antwoord. By goddelose mense se monde borrel daar slegte dinge uit’

(Spreuke 15:28 NLV). ‘Die regverdige weet wat die gepaste dinge is om te sê. Wat die

goddelose sê, bring moeilikheid’ (Spreuke 10:32 NLV). Die eerste Skrifgedeelte sê dat ‘n

wyse persoon dink voor hy of sy praat, omdat hulle besef dat elke woord gevolge het. Die

tweede Skrifgedeelte sê dat ‘n regverdige persoon outomaties weet wat aanvaarbaar is

en weet dat God elke woord hoor.

Sielskos: Eseg 20-21; Matt 15:15-28; Ps 132:1-10; Spr 15:1-4

2017/06/09

Eksodus 39:14 NLV

Die wonder van die borssak (1)

As jy na die borssak kyk wat deur Israel se hoëpriester gedra is, sal jy sien hoe kosbaar

jy as verloste kind in God se oë is. Die Bybel gee ons gedetailleerde inligting oor dit

wat die hoëpriester gedra het en daar is nie onbelangrike detail in God se Woord nie.

As ons die borssak ondersoek, sien ons iets wonderliks in die manier hoe die Here na

ons kyk. Daar was twaalf stene in die borssak en op elke steen was die naam van die

twaalf stamme van Israel gegraveer. Omdat Jesus ons Hoëpriester is, kan ons na die

borssak kyk en daaruit leer. Dit was kosbare stene. God het nie gewone klippies en

stene gebruik wat algemeen in Israel beskikbaar was nie; Hy het die duurste, raarste

en kosbaarste juwele soos karneool, smarag, topaas, saffier, turkoois en oniks gekies

om ons te verteenwoordig. Let op die woord ‘kosbaar’. Die Bybel sê dat jy kosbaar in

God se oë is (sien Jesaja 43:4). Die Bybel sê ook dat ons deur die kosbare bloed van

Jesus gered is (sien 1 Petrus 1:19). Hoe bepaal jy die waarde van iets? Deur die prys

wat iemand gewillig is om daarvoor te betaal. Daar is dus ‘n waarheid wat jy in gedagte

moet hou wanneer jy verkeerd doen en Satan jou aan al jou foute en tekortkominge

herinner. Met kennis van al jou sondes – in die verlede, hede en toekoms – het God jou

so liefgehad dat Hy sy Seun gestuur het om jou deur sy kosbare bloed te verlos. Solank

as wat jy op Christus vertrou, verminder jou waarde in God se oë nooit nie. Hoekom

dink God jy is kosbaar? Omdat Hy jou te alle tye ‘in Christus’ sien.


2017/06/10

Hebreërs 4:14 NLV


Let nog twee dinge oor die borssak op wat deur Israel se hoëpriester gedra is: 1) Dit

was naby aan sy hart. Die hoëpriester het een maal ‘n jaar na die binneste heiligdom

gegaan waar God se teenwoordigheid was, om vergifnis vir die volk se sondes te

kry. Hy het verskillende goed gedra wat elk verskillende waarhede verteenwoordig

het. Van al hierdie klere wat hy aangetrek het, was die borssak egter die naaste aan

sy hart. Dit spreek van God se liefde en waardering en sy begeerte om naby aan jou

te wees. Vandag sê Hy vir jou: ‘...Ek sal jou nie los nie. Ek sal jou nie in die steek laat

nie’ (Hebreërs 13:5 NLV). Wat ‘n wonderlike belofte! 2) Die name van die stamme

was nie net op die borssak geskryf nie, maar gegraveer (sien Eksodus 39:14 NLV).

Wanneer iets geskryf is, kan dit per ongeluk uitgevee word, maar nie wanneer dit

gegraveer is nie. Daar is twee maniere wat jy kan sondig. Eerstens deur opsetlik te

kies om te sondig en tweedens wanneer jy as gevolg van swakheid struikel. God sal

jou teregwys en jou korrigeer om jou weer op die regte pad te kry, maar Hy sal nooit

sy rug op jou draai of jou weggooi nie. Nee, jy is te kosbaar vir Hom. Hy onthou die

prys wat Hy vir jou betaal het en Hy sê, ‘En Ek sal hulle name nooit uit die Boekrol van

die Lewe vee nie...’ (Openbaring 3:5 NLV). Solank as wat jy jou vertroue in Christus

stel, kan jy seker van God se liefde en aanvaarding wees.


2017/06/11

1 Petrus 2:7 ABA


Ons leer die volgende deur na die borssak te kyk wat deur die hoëpriester van Israel

gedra is: a) ons is kosbaar vir God; b) ons is naby aan sy hart; c) Hy sal nooit sy rug op

ons draai nie. Jy sê, ‘As God nooit sy rug op ons sal draai nie, beteken dit ons kan lewe

soos ons wil?’ Nee. As ‘n verloste kind van God, is jy nie net kosbaar in sy oë nie, Hy is

ook kosbaar in jou oë. Dus sal jy jou verhouding met Hom bo alles anders eer en dit ten

alle koste beskerm teen enigiets wat dit bedreig. As jy besef hoe kosbaar en waardevol

jy in God se oë is, sal jy dan nog wil uitgaan en sondig of aanhou om in sonde te lewe?

Natuurlik nie! Inteendeel, jou gedagtes sal meer in lyn wees met: ‘Hierdie is nie hoe ‘n

gelowige wat kosbaar vir die Here is, optree nie.’ ‘n Kosbare diamant behoort nie in die

modder, vuilheid en gemors van sonde nie. Sy regte plek is naby aan die hart van God

waar dit kan sprankel en glinster. Jy word deur die besef van jou ware, regverdige en

kosbare identiteit in Christus bo die begeerte om te sondig, verhef. Dit veroorsaak dat

jy as kind van die Koning wil optree en lewe. ‘n Heilige lewe is inderdaad die resultaat

wanneer jy jouself sien soos God jou sien – ‘in Christus.’ In plaas daarvan om aan die

versoeking toe te gee, sal jy jouself afvra, ‘Wat sou Jesus in hierdie situasie doen?’ Dan

sal jy op sy krag staatmaak om die regte ding te doen. ‘n Opregte besef van God se

genade verhoed nie heiligheid nie, dit produseer dit.

Sielskos: Gen 1:1-2:3; Joh 1:1-18

2017/06/12

1 Petrus 1:19 NLV

Kosbare bloed – kosbare jy!

Die Bybel sê, ‘...En dié losprys was nie dinge wat vergaan soos goud of silwer nie.

Inteendeel, dit was die kosbare bloed van Christus...’ (verse 18-19 NLV). Jy moet op ‘n

plek in jou lewe kom waar jy gemaklik is met wie jy ‘in Christus’ is; waar jy nie toelaat

dat jou selfwaarde op die opinies of aksies van ander gebaseer word nie. Hou op

om jou waarde in jou voorkoms, jou beroep, of hoe ander mense jou behandel, te

bepaal. Jou waarde in God se oë is onskatbaar, omdat Jesus se bloed vir jou gevloei

het. Kosbare bloed – kosbare jy! Ja, jy het foute. Ja, daar is dinge aan jou wat moet

verander, maar God is besig om aan jou te werk, net soos Hy aan almal anders werk.

Moenie iemand anders toelaat om jou minderwaardig te laat voel nie. Jy is ‘n kind

van God, deur bloed gekoop! Moenie dat hulle jou waardeloos laat voel omdat hulle

nie weet hoe om jou reg te behandel nie, of jou nie liefhet soos jy verdien om liefgehê

te word nie. Moenie jou lewe spandeer om hulle aanvaarding en goedkeuring te

probeer kry nie. Jy is reeds deur God aanvaar en goedgekeur, maak dus seker dat

jou selfwaarde van Hom af kom. Jy is deur Christus se bloed verlos, jy word deur

Christus se bloed bedek en jy word deur Christus se bloed aanvaar. Omdat sy bloed

‘kosbaar’ is, beteken dit dat jy ook kosbaar is. Satan sal graag wil hê dat jy dit moet

vergeet en jouself net in die lig van jou foute en swakhede sien. Staan eerder elke

oggend op, kyk in die spieël en verklaar, ‘Ek is kosbaar, omdat ek deur die kosbare

bloed van Jesus verlos is!’

Sielskos: Eseg 27:25-30:26; Matt 16:13-28; Ps 80:1-11; Spr 15:11-14

2017/06/13

Lukas 24:16 NLV

God is vandag by jou

Wanneer jy voor ‘n krisis te staan kom, is dit maklik om perspektief te verloor. Dit het

met twee van Christus se dissipels op die pad na Emmaus gebeur. Ontmoedig deur

sy dood, was hulle... ‘druk in gesprek met mekaar oor al hierdie dinge wat gebeur

het. Terwyl hulle nog so loop en gesels en dinge probeer ontrafel, het Jesus self

nadergekom en saam met hulle verder geloop. Hulle oë is egter verhinder om Jesus

te herken’ (verse 14-16 NLV). Wanneer jy jou oë van Jesus afhaal, begin jy hulpeloos

oor jou situasie voel. Dr Michael Youssef sê: ‘Wanneer ek voor ‘n krisis te staan kom, is

ek die tipe persoon wie se visie vervaag. My persepsies is verkeerd. My oordenkinge

is eensydig. Ek sluit dikwels mense wat my kan help, uit, soos die twee dissipels. Hulle

visie was vaag oor die persoon wat saam met hulle gestap en met hulle gesels het.

Die een oor wie se dood hulle gerou het was lewendig, maar hulle het dit nie besef

nie omdat hulle fokus verkeerd was.’ Alles het egter verander die oomblik toe hulle

Jesus herken het. ‘Hulle het daar en dan opgestaan en na Jerusalem teruggegaan... Toe

vertel hulle wat op pad gebeur het en hoe Hy aan hulle bekend geword het deur die

breking van die brood’ (verse 33-35 NLV). Hulle het daar en dan verander, van vrees na

moed, pyn na vreugde en moedeloosheid na hoop. Paulus het geskryf, ‘Ek bid verder

dat God julle geestelike oë sal oopmaak...’ (Efesiërs 1:18 DB). Wanneer jy ophou om op

die probleem te fokus en jou oë op Jesus rig, kry jy 20/20 visie en word jy met hoop

gevul.


2017/06/14

Efesiërs 4:32 NLV

Vergewe – en stel jouself vry

Jare na haar marteling en ervaring in ‘n Nazi konsentrasie kamp, was Corrie ten Boom

besig om in ‘n kerk te praat toe sy van aangesig tot aangesig kom met een van die

wreedste wagte wat sy in die kamp teëgekom het. Hierdie man het haar en haar suster

verneder en mishandel. Hy het opmerkings gemaak en hulle visueel ‘verkrag’ toe hulle

in die stort gestaan het om van luise ontslae te raak. Nou het hy hier voor haar met

‘n uitgestrekte hand gestaan en gevra, ‘Sal jy my vergewe?’ Corrie het gesê, ‘Ek het

daar gestaan met ‘n koudheid wat my hart binnegedring het, maar ek het geweet dat

my wil die temperatuur van my hart kan oorwin. Ek het gebid, ‘Jesus, help my!’ Ek het

stokkerig my hand in syne geplaas en toe ‘n wonderbaarlike ding ervaar. Dit het in my

skouer begin en by my arm afgejaag, tot by ons hande. Toe het die warm versoening

my hele wese deurspoel en trane na my oë toe gebring. ‘Ek vergewe jou, broer,’ het ek

met my hele hart uitgeroep. Vir ‘n lang oomblik het ons mekaar se hande vasgehou,

die voormalige wag en die voormalige gevangene. Ek het nog nooit die liefde van God

so intens ervaar soos op daardie oomblik nie.’ Die Bybel sê, ‘Wees eerder vriendelik met

mekaar. Gee vir mekaar om. Vergewe mekaar soos God julle vergewe het op grond van

wat Christus gedoen het.’ Wie sukkel jy om vandag te vergewe? Styg bo jou gevoelens

uit en doen dit! Wanneer jy dit doen, stel jy jouself vry en kan jy in die vrede en vreugde

van die Here stap.


2017/06/15

Nahum 1:7 NLV

Vertrou op God se goedheid

Die Bybel sê, ‘Toe die volk sien dat Moses lank wegbly en nie van die berg af kom nie,

het hulle na Aäron toe gegaan. Hulle het vir hom gesê: ‘Maak vir ons ‘n god wat ons

kan lei...’’ (Eksodus 32:1 NLV). Hoekom het Israel ‘n goue kalf gemaak? Omdat hulle ‘n

god wou hê wat ‘n mens kan sien. Dit is moeiliker om ‘n verwantskap met ‘n onsigbare

God te hê en Moses, sy verteenwoordiger, het so lank op die Sinaiberg gebly dat hulle

hulpeloos en vergete gevoel het. Hulle het toe gedoen wat ons doen wanneer ons bang

is – ons keer weer terug na die bekende toe. Mark D Roberts skryf: ‘Hoe dikwels bevind

ons onsself in ‘n situasie soos die Israeliete s’n? Ons hoor dat God ons tot iets nuuts

roep en tree moedig in geloof vorentoe. Wanneer ons egter nie sy teenwoordigheid

aanvoel nie en dit voel of ons gebede teen die plafon vassit, voel ons vergete, bang

en hulpeloos. Dan keer ons terug na die bekende en voel gerusgestel.’ Nancy Ortberg

sê, ‘Die moeilike deel van verandering is dikwels om te gaan waar God is. Baie van ons

skree en skop in plaas daarvan om met vertroue na die ander kant te beweeg, waar

God is en waar ons nuwe fasette van Hom kan ontdek wat ons nie vroeër verstaan het

nie. Of dit nou die afsterwe van ‘n geliefde is, jy jou werk verloor het, na ‘n ander plek

toe moet trek of wanneer jou kinders uit die huis is – wanneer ons deur die moeilike

tye beweeg, sal ons ontdek dat ons wonderlike, goeie God daar is.’ Wanneer God ‘n

deur toemaak, maak Hy ‘n ander een oop – maar jy moet egter gewillig wees om deur

die deur te stap.


2017/06/16

Eksodus 33:14 NLV

Shalom

Die Hebreeuse woord vir vrede is shalom. Wanneer jy apart van God lewe, sal dit altyd

net ‘n filosofiese fantasie wees, ‘n vis wat net buite bereik van jou hoek bly. Huwelike

stort ineen omdat ons na ‘n volmaakte maat soek wat ons die perfekte vrede ,waarna

ons streef, kan gee en ons dan ontdek dat hulle dit nie kan doen nie. Daar is ‘n storie

van ‘n vrou by ‘n skemerkelkgeleentheid wat haar bes gedoen het om gelukkig te

lyk. ‘n Gas wat die enorme steen aan haar vinger opgemerk het, het gesê, ‘Wow! Wat

‘n pragtige steen!’ Sy het geantwoord, ‘Dankie. Dit is die Callahan diamant.’ Die gas

het gesê, ‘Ek wens ek het een gehad.’ ‘Nee jy doen nie, saam met die steen kom die

Callahan vloek,’ het sy geantwoord. ‘Die Callahan vloek – wat is dit?’ het die gas gevra.

Die vrou het gesug en gesê, ‘Meneer Callahan!’ Perfekte vrede kan net van God kom.

Vrede is nie die afwesigheid van probleme nie, maar die teenwoordigheid van God te

midde van ons probleme. Niemand vind ooit vrede deur daarna te soek nie. Jy kan nie

vrede vind nie; dit vind jou wanneer jy jou lewe aan die Een wat gesê het dat Hy sal

saamgaan sodat jou hart kan rus, oorgee. Net God se teenwoordigheid bring vrede

mee. Die waarborg van God se liefde, God se hulp en God se teenwoordigheid neem

die stres van die lewe weg. Wens jy vandag vir vrede? Wanneer jy jou lewe aan Christus

oorgee, sal jy ‘...God se vrede beleef. Hierdie vrede is wonderliker as wat mens ooit kan

dink...’ (Filippense 4:7 NLV).


2017/06/17

Hebreërs 12:1 NLV

Wat vertraag jou spoed?

Die Bybel sê, ‘...kom ons stroop alles af wat ons spoed kan vertraag, veral die sonde wat

so maklik ‘n houvas op ‘n mens kry. Kom ons hardloop met volharding op die baan wat

voor ons uitgestrek lê.’ Wat vertraag jou spoed, of pootjie jou? In die lewe kry jy net

een geleentheid om te hardloop, hardloop dus om te wen. Moenie terugkyk nie, sodat

jy nie struikel of jou plek in die wedren verloor nie. Moenie angstig oor die volgende

rondte wees nie, fokus net op die volgende tree. As jy hom mis, mag jy dalk val en nie

weer opstaan nie. Hou aan en voor jy dit agterkom sal jy meer rondtes agter jou, as

voor jou hê. Laat elkeen tel. Baie van ons dra die gewig van ons bekommernisse rond.

Ouer en wyser mense het egter agtergekom dat hulle bekommernisse van geen ware

belang is nie. Ons mors ons krag om vure dood te slaan wat op hulle eie sou uitbrand.

Tyd is jou kosbaarste hulpbron. Wanneer jy tyd spaar, vermeerder jy jou bates en

verminder jou laste. Reis lig. Gooi die bagasie wat jou saboteer en jou sinlose vrese

weg. Daar is genoeg pynlike beproewings in die lewe; hoekom nie die onbenulliges

weggooi nie? Toe die blinde Bartimeus hoor dat Jesus binne bereik was, het hy sy

kleed uitgetrek sodat hy nie daaroor moes struikel nie en na Jesus toe gehardloop.

Sy geloof het vrugte afgewerp: ‘...Dadelik kon hy sien en het hy op die pad agter Jesus

aangegaan’ (Markus 10:52 NLV). Jy sal nooit weet hoe suksesvol jy kan wees, totdat jy

ontslae raak van die dinge wat jou spoed vertraag en jou pootjie nie.


2017/06/18

Lukas 5:5 NLV

Verstaan hoe God werk

Die Bybel sê: ‘Toe Hy [Jesus] klaar gepraat het, het Hy vir Simon gesê: ‘Vaar nou dieper

in en gooi jou nette uit, en jy sal baie vis vang.’ ‘Meneer,’ het Simon geantwoord, ‘ons

het die hele nag hard gewerk en het niks gevang nie. Maar as u so sê, sal ons weer

probeer.’ En hierdie keer was hulle nette so vol dat dit begin skeur het!.. Toe Simon

Petrus besef wat gebeur het... was [hy] verbyster deur die groot visvangs... Jesus het

vir Simon geantwoord: ‘Moenie bang wees nie! Van nou af sal jy mense vang!’ En toe...

het hulle alles net so laat lê en Jesus gevolg’ (verse 4-11 NLV). Die ware toets van jou

geloof kom wanneer niks wat jy probeer het, gewerk het nie en God dan jou geloof

toets. Dan kan jy dat jou vertwyfelinge die oorhand kry, of saam met Petrus sê, ‘Maar as

u so sê, sal [ek] weer probeer.’ God werk op drie maniere: 1) Hy gebruik die alledaagse

om die wonderlike te doen. Jesus het by hulle werkplek opgedaag waar niks spesiaals

ooit gebeur nie en hulle lewens verander. Soek God in jou daaglikse roetine en moenie

verras wees as Hy jou verras nie. 2) Hy beweeg jou uit die sekuriteit van die vlak waters

na die risiko van die diep waters. Die groot vangste en die groot storms word in

dieselfde see aangetref. As jy die een wil hê, moet jy bereid wees om die ander een te

hanteer. 3) Hy betrek jou by een ding om jou iets anders te leer. Christus het hulle by

‘n groter wonderwerk betrek: om die siele van mense te vang. Dis ook sy plan met jou

vandag. Dit begin wanneer jy sê, ‘Maar as u so sê, sal [ek] weer probeer.’

Sielskos: Eseg 37:1-14; Matt 27:50-53; 1 Tess 4:13-18; Rom 8:11

2017/06/19

Filippense 2:5 NLV

Jy moet die regte gesindheid hê

Hoeveel werksgeleenthede word daagliks verloor, omdat mense die verkeerde

gesindheid het? Hoeveel mense word nie bevorder as gevolg van die manier waarop

hulle hul werk en die mense rondom hulle benader nie? Hoeveel huwelike val uiteen?

Dit is ontelbaar. Geeneen moet egter ooit ‘n werk verloor, ‘n bevordering misloop of

‘n huwelik vernietig as gevolg van ‘n verkeerde gesindheid nie. Hoekom nie? Omdat

jou gesindheid ‘n keuse is. Chuck Swindoll skryf: ‘’n Mens se gesindheid is vir my

belangriker as opvoeding, geld, omstandighede, mislukkings, suksesse en wat ander

mense dink, sê of doen. Dis belangriker as voorkoms, talente of vermoë. Dit kan ‘n

maatskappy, ‘n kerk of ‘n huis maak of breek. Die merkwaardige waarheid is dat ons

elke dag ‘n keuse oor ons gesindheid vir daardie dag het. Ons kan nie ons verlede

verander nie, ons kan nie die feit verander dat mense op ‘n sekere manier optree

nie. Ons kan nie die onvermydelike verander nie. Ons kan net ons gesindheid kies

of verander. Ek is oortuig daarvan dat die lewe uit 10 persent omstandighede en 90

persent hoe ek daarop reageer, bestaan. Ons is in beheer van ons gesindhede.’ Paulus

skryf, ‘Julle gesindheid moet soos Jesus Christus s’n wees.’ Hy het mense altyd met

liefde, genade, aanvaarding en ‘n dienende hart benader. As jou gesindheid nie so

goed is soos wat dit kan wees nie, begin vandag nuut. Bid: ‘Vader, gee my ‘n Christelike

gesindheid teenoor almal wat ek ontmoet.


2017/06/20

Eksodus 4:2 NLV

Ken jou roeping (1)

Toe God vir Moses geroep het, was een van die eerste vrae wat Hy hom gevra het: ‘...

Wat het jy daar in jou hand?..’ Moses het ‘n herderstok vasgehou – een wat hy elke dag

gebruik het om sy skape te lei en te beskerm. God het egter ‘n ander plan daarvoor

gehad – ‘n groter een! Hy het dit gebruik om die Rooi See te skei en om Israel na die

Beloofde Land te lei. Wanneer God vir jou vra, ‘Wat het jy daar n jou hand?’ wil Hy hê

dat jy oor jou talente, ervarings, verhoudings, opvoeding, hulpbronne, gedagtes en

persoonlikheid moet nadink. Dr Martin Seligman verwys daarna as die sterkpunte uniek

aan elke persoon. Hulle word in ses kategorieë verdeel: 1) Wysheid en kennis. Dit sluit

dinge soos nuuskierigheid, leergierigheid, goeie oordeelsvermoë en sosiale intelligensie

in. 2) Moed. Dit sluit volharding en integriteit in. 3) Medemenslikheid. Die kapasiteit vir

mededeelsaamheid en die vermoë om genade te bewys. 4) Geregtigheid. Die vermoë

om regverdig te wees en ander te lei. 5) Matigheid. Kwaliteite soos selfbeheersing,

verstandigheid en nederigheid. 6) Voortreflikheid. ‘n Waardering vir skoonheid,

dankbaarheid, die vermoë om te hoop en die kapasiteit vir vreugde. Ons almal het die

kapasiteit vir een van hierdie sterkpunte, maar die van hulle wat die meeste binne in

jou resoneer, is jou kenmerkende sterkpunte. Sodra jy dit identifiseer, sal jy begin om

jou roeping te verstaan. Wees egter versigtig, die Vyand wil jou oortuig dat God jou nie

as gevolg van jou swakhede kan gebruik nie, terwyl die teenoorgestelde waar is. Chuck

Colson was die Withuis se hoofprokureur tot die Watergate skandaal plaasgevind het.

Eers toe hy in die tronk opgesluit is, was hy toegerus om sy bediening, Prison Fellowship,

te begin. Ken dus jou roeping.

Sielskos: 2 Kor 1-4; Matt 19:15-30; Ps 144:1-8; Spr 16:1-3

2017/06/21

Johannes 14:12 NLV

Ken jou roeping (2)

Jou roeping sal altyd aan ‘n behoefte of geleentheid om goed te doen gekoppel wees.

Dit was deur die krete van sy volk in slawerny, wat Moses sy roeping ontdek het. So ook

William Wilberforce. Hy het sy lewe daaraan gewy om slawerny in Engeland uit te roei.

Nelson Mandela was ‘n prokureur met die potensiaal om goed geld te maak. Hy het

egter ‘n ander pad gekies – een wat jare se gevangenisskap tot gevolg gehad het. Toe hy

uiteindelik vrygelaat is, het hy nie weerwraak gesoek nie, maar geregtigheid en gelyke

regte vir sy mense wat sy land verander het. Esegiël skryf: ‘Ek het by die Judese ballinge

gekom... Ontsteld en verstom het ek sewe dae lank tussen hulle gesit. Toe die sewe

dae verby is, het die Here vir my ‘n boodskap gegee...’ (Esegiël 3:15-16 NLV). As jy jou

roeping wil ontdek, begin om vir situasies wat jou ontstel te bid. Ons probeer dikwels

ongemak vermy, maar as jy aanvoel dat jou roeping behels om met die armes te werk,

spandeer tyd tussen mense wat armoedig is. Laat jou hart toe om sag te word; dra binne

in jou die oortuiging dat dinge moet verander en hou aan om te bid, ‘Here, maak my ‘n

agent van verandering.’ Toe Jesus sy dissipels geroep het, het Hy mense uit verskillende

agtergronde gekies: ‘n dokter, ‘n regeringsamptenaar, ‘n groep vissermanne. Hy het

inderwaarheid vir hulle gesê, ‘Ek glo in jou. Ek sal jou dit wat Ek weet, leer,’ en hulle

belowe dat ‘...wie aanhou om in My te glo, sal ook die werke doen wat Ek doen...’ Jesus

bemagtig sy volgelinge om uit te gaan en soos Hy te lewe. Dit is wat Hy jou vandag roep

om te doen.

Sielskos: 2 Kor 5-8; Matt 20:1-16; Ps 144:9-15; Spr 16:4-7

2017/06/22

Jesaja 40:29 NLV

Skud jou boks

‘n Klein seuntjie was verlam en die dokters het gesê dat daar niks was wat hulle vir

hom kon doen nie. Sy ma het toe ‘n lemoenkissie gevat, hom daarin gesit, ‘n tou

daaraan vasgemaak wat sy om haar middel gebind het en hom saam met haar

gesleep. Na ‘n ruk het die seuntjie ‘n gewoonte ontwikkel waarvan sy ma nie gehou

het nie: Hy het begin om sy boks te skud. Soms het hy die boks so geskud dat hy

uitgeval het. Maak nie saak hoeveel keer sy ma hom teruggesit het nie, hy het dit

aanhoudend gedoen. Hy het later die kuns vervolmaak om die boks so te skud dat

hy binne sekondes uit sou wees. Tot almal se verwondering, het hy leer loop en ‘n vol

lewe gelei. Die seuntjie het iets gedoen wat die dokters en selfs sy ma nie geglo het

kon gebeur nie. Hy het geweier om ‘n lewe binne in die boks waarin ander mense

hom gesit het, te aanvaar. Het iemand jou vandag in ‘n boks gesit? Indien so, hou

aan om die boks te skud tot jy vry is! Ander mense is selfaangestelde kundiges wat

ons vertel wat ons kan en nie kan doen nie. Hulle waardeer nie altyd iets wat ‘buite

die boks’ is, iets wat ongewoon is nie. Een van die grootste beloftes in die Bybel is:

‘...Hy maak die magteloses sterk.’ Begin om Skrifgedeeltes te lees wat jou jou boks

gaan laat skud. Een van hulle is: ‘Wat my betref, ek is vol van die Geesteskrag van die

Here...’ (Miga 3:8 NLV). Nog een: ‘...Menslik gesproke is dit onmoontlik. Maar by God

is alles moontlik!’ (Matteus 19:26 NLV). Verklaar vandag: ‘Here, U het dit beloof, ek

glo dit en so is dit!’

Sielskos: 2 Kor 9:1-11:15; Matt 20:17-28; Ps 8; Spr 16:8-11

2017/06/23

Numeri 14:8 NLV

Breek uit die boks uit!

Toe die volk die reuse in die Beloofde Land sien en na Egipte wou terugkeer, het Kaleb

gesê, ‘...die Here... sal... ons in die land laat kom en dit vir ons gee...’ Op daardie punt het

twee dinge gebeur: ‘Die gemeenskap het egter gedreig om hulle met klippe dood te

gooi. Die Israeliete het toe bewus geword van die Here se magtige teenwoordigheid

by die tabernakel’ (vers 10 NLV). Toe die mense rondom Kaleb nee gesê het, het God

ja gesê – en jy het net sý goedkeuring nodig! Wanneer jy dit het, kan jy die negatiewe

mense rondom jou ignoreer en vorentoe beweeg. Daar was ‘n tyd wat mense gedink

het die aarde is plat en dat ‘n man nooit op die maan sou loop nie. In 1899 het die

Amerikaanse departement wat patente toeken amper toegemaak, omdat die hoof van

die departement, Charles H Duell, gesê het, ‘Alles wat ontdek kan word, is reeds ontdek.’

In retrospek is hierdie stelling belaglik, maar sommige van ons het dieselfde sienswyse.

Ons hou op om te leer omdat ons dink dat ons te oud is. Ons is bang om van beroep te

verander omdat ons dalk ons pensioen in gedrang kan bring. Ons jaag nie ons drome

na nie omdat ons bang is dat ons sal simpel lyk of misluk. Ons raak gewoond aan die

beperkinge wat ons op onsself plaas en sê, ‘Ek kan dit nie doen nie.’ Ons het ‘n boks

gebou, daarin geklim en nou soek ons iets of iemand wat ons vir ons gebrek aan geloof

kan blameer. God het jou nie in die boks geplaas nie – jy het – en jy moet die eerste stap

neem om uit die boks te breek. Besluit vandag om dit te doen en God sal jou pogings

seën.

Sielskos: 2 Kor 11:16-13:14; Matt 20:29-34; Ps 17; Spr 16:12-15

2017/06/24

1 Tessalonisense 5:18 NLV

Dit help nie om te kla nie

Die Bybel sê basies een ding oor kla – moet dit nie doen nie. Jy sê, ‘As jy my probleme

gehad het, sou jy ook gekla het.’ As jy so voel, lees die volgende: ‘Doen alles sonder kla

of teëpraat’ (Filippense 2:14 NLV). Hier is hoekom jy so moet lewe: 1) Om te kla maak

dinge gewoonlik net erger. Dis ‘n nare siklus – jy het ‘n probleem waaroor jy kla. Jy voel

sleg, dus hou jy aan met kla en eindig met stres, nie ‘n oplossing nie, op. 2) Om te kla

gaan jou nie kry waar jy nodig het om te gaan nie. In plaas daarvan om die situasie

aan God oor te gee, twyfel jy aan sy wysheid en voorsiening. Duisende Israeliete het in

die woestyn omgekom omdat hulle dit gedoen het. Paulus skryf: ‘En moenie mor soos

sommige van hulle nie, want dit is die rede waarom God die doodsengel gestuur het

om hulle dood te maak. Al hierdie dinge het met hulle gebeur as ‘n voorbeeld vir ons...’

(1 Korintiërs 10:10-11 NLV). Wanneer jy jou seëninge miskyk en op jou probleme fokus,

verloor jy jou vreugde. 3) Om te kla kan na siektes wat deur stres veroorsaak word, lei.

‘Innerlike kalmte bevorder die gesondheid...’ (Spreuke 14:30 NLV). Hoeveel mense wat

kla het werklik innerlike vrede? Begin eerder jou seëninge tel as om te kla. Die skrywer

Barbara Johnson gee vir ons hierdie tong-in-die-kies voorbeeld: ‘’n Handgeskrewe

plakkaat was aan ‘n telefoonpaal vasgemaak en het gelees: VERLORE. Drie-been hond,

blind in die linkeroog, regteroor wat af is en is onlangs reggemaak. Sy naam is Lucky.’’

Die woord vir jou vandag is: ‘Wees in alle omstandighede dankbaar, want dit is wat

God van julle as Christene verwag.’

Sielskos: Hoogl 1-4; Matt 21:1-17; Ps 21; Spr 16:16-19

2017/06/25

Daniël 12:3 NLV

Waarvoor sal jy onthou word?

Dr James Kennedy het geskryf: ‘Dink aan die groot piramide van Giza, een van die wêreld

se grootste strukture. Iemand het dit as ‘n gedenkteken aan homself gebou – koning

Khufu, wat nie ‘n naam is wat die meeste van ons ken nie! Die Sjah van Indië het die

Taj Mahal as ‘n huldeblyk aan sy vrou gebou, maar wie onthou haar naam, Arjumand?

Wat van die Groot Muur van China? Ruimtereisigers kan dit uit die ruimte sien en tog

onthou niemand vir Qin Shihaung, wat oorspronklik vir die grootste mensgemaakte

struktuur in die wêreld verantwoordelik was, nie. Terwyl hierdie mense vergete is, kan

jy ‘n permanente impak op die wêreld maak. Hoe? Deur ander mense na Christus te lei!’

Die Bybel sê, ‘Hulle wat ander mense leer, sal skitter soos die naghemel...’ Louis Pasteur,

die pionier van die immuniteitsleer, het in ‘n tyd geleef waar duisende mense elke jaar

aan hondsdolheid gesterf het. Hy het vir jare aan ‘n teenmiddel daarvoor gewerk en

net toe hy op die punt was om dit op homself te toets, is ‘n negejarige seun genaamd

Joseph Meister deur ‘n hondsdol hond gebyt. Die seun se ma het by hom gepleit om

die teenmiddel op haar seun te toets. Pasteur het hom vir tien dae daarmee ingespuit

en die seun het gelewe. Dekades later, uit al die huldeblyke wat Pasteur kon kies, het hy

gevra dat die volgende woorde op sy grafsteen gegraveer word: JOSEPH MEISTER HET

GELEWE! Jou grootste erflating kan diegene wees wat vir ewig lewe omdat jy Christus

met hulle gedeel het. Jesus het gesê, ‘...Die woorde wat Ek aan julle gerig het, is Gees en

lewe’ (Johannes 6:63 NLV). Wat verander harte en lewens? Die woorde van Jesus!

Sielskos: Ester 4:9-5:3; Heb 4:7-16

2017/06/26

Lukas 5:16 NLV

Wanneer Jesus gebid het (1)

As jy oor gebed wil leer, kyk na die lewe van Jesus: 1) Hy het gebid wanneer die

druk verhoog het. ‘Tog, ten spyte van Jesus se bevele, het die berig oor sy mag selfs

vinniger versprei en groot skares het gekom om Hom te hoor preek en van hulle

siektes genees te word. Maar Jesus het Hom gereeld in ‘n verlate plek afgesonder

om te bid’ (verse 15-16 NLV). Dis wanneer jy dink dat jy nie tyd het om te bid nie,

wat jy gebed die nodigste het. Om tyd saam met God te spandeer, is die geheim

om in sy krag te deel. 2) Hy het gebid wanneer Hy belangrike besluite moes neem.

Toe Jesus sy naaste vriende moes kies, het Hy sy Vader se leiding gevra. ‘Eendag

kort hierna het Jesus na ‘n berg gegaan om te bid, en Hy het die hele nag in gebed

deurgebring. Teen dagbreek het Hy al sy dissipels saamgeroep en twaalf van hulle

gekies om apostels te wees...’ (Lukas 6:12-13 NLV). Ons kan ‘n jaar en ‘n klein fortuin

spandeer om ‘n troue te beplan en tog vra ons nie vir God se leiding wanneer ons ‘n

lewensmaat kies nie. God is nie net die skepper van die heelal nie, Hy is die direkteur

Later het Simon en sy makkers agter hom aangegaan en toe hulle Hom kry, sê hulle vir

Hom: ‘Almal vra na U.’ Jesus het egter geantwoord: ‘Ons moet ook nog verder gaan na

die omliggende dorpe sodat Ek ook daar kan preek. Dit is immers waarvoor Ek gekom

het.’ So het Hy dan deur die hele Galilea in hulle sinagoges gepreek en bose geeste

uitgedryf’ (Markus 1: 35-39 NLV). Tensy jy God se plan kry en daarby hou, sal ander

mense jou lewe vir jou probeer beplan. Gegewe die sukses wat Jesus in elke dorp wat

Hy besoek behaal het, sou baie predikers op ‘n dorp gebly het en ‘n kerk daar gevestig

het waar hulle die beloning van hulle bediening sou kon geniet. Nie Jesus nie; Hy het

op sy eie manier dinge gedoen. Wanneer jy op sommige van jou foute terugkyk, sal jy

sien dat besluite gemaak is in antwoord op druk en nie in antwoord op gebed nie. God

het ‘n plan en ‘n skedule vir jou lewe. Om daarby te hou, moet jy gereeld bid. Jesus het

besef dat Hy net genoeg tyd gehad het om dit te doen wat sy Vader wou hê hy moes

doen en dit het Hom die vermoë gegee om vir ander dinge nee te sê. Jy is geroep om

ander mense lief te hê – maar om God te behaag. Jou vertroue in gebed kom van die

wete dat jy binne God se wil optree (sien 1 Johannes 3:21-22).

Sielskos: 1 Sam 4-7; Matt 22:1-14; Ps 64; Spr 16:26-30

2017/06/29

Lukas 22:31-32 NLV


Wanneer Jesus gebid het, was Hy bekommerd oor die mense wat Hy liefgehad het. Hy

het vir Petrus gesê: ‘...Satan het ernstig geëis om julle soos koring te kan sif, maar Ek het

vir jou gebid dat jou geloof jou nie moet begewe nie. As jy weer tot inkeer gekom het,

moet jy jou medegelowiges gaan ondersteun.’ Petrus het weer tot inkeer gekom. Die

dissipel wat sy Here in ‘n oomblik van swakheid verloën het, het uiteindelik voor skares

van duisende mense gestaan en die evangelie aan hulle verkondig; en drieduisend van

hulle is vir Christus gewen. Jesus het nie net sy dissipels geleer nie, Hy het hulle ook oor

gevaar gewaarsku. Hy het egter besef dat die grootste geskenk wat Hy vir hulle kon gee,

was om vir hulle te bid. Dit is ongelukkig ‘n waarheid wat ons gewoonlik later, eerder as

vroeër, besef. Ons belowe, ons red, ons dreig en wanneer al ons ander pogings misluk

het, bid ons. Gebed moet nie jou laaste uitweg wees nie, dit moet jou eerste reaksie

wees. Gebed neem die situasie uit jou hande en plaas dit in God s’n. Onthou jy die vier

mans wat hulle siek vriend gedra het en hom voor Jesus se voete neergelê het? (sien

Markus 2:3-5). Dit is wat jy doen wanneer jy vir iemand bid. Dit is nie maklik om die

gewig van iemand anders op te tel en hulle elke dag in gebed na God toe te dra nie. Dit

is egter die effektiefste guns wat jy vir hulle kan doen. Wanneer ‘n geliefde jou teleurstel

of seermaak, lig hulle in gebed op eerder as wat jy hulle terug kwets. Nooi God in die

situasie in en staan dan terug en laat Hom toe om te werk.


2017/06/30

Lukas 22:41-42 NLV


Jesus het gebid voor Hy voor die grootste krisis in sy lewe te staan gekom het. Die Bybel

sê: ‘Jesus het uit die stad gegaan na die Olyfberg, soos Hy gewoond was om te doen.

En die dissipels het Hom gevolg... Jesus het Hom toe van hulle afgesonder... Daar het

Hy gekniel en gebid: ‘Vader, as U wil, neem hierdie beker van My af weg. Laat nogtans

nie my wil nie, maar u wil geld!’ Daar het ‘n engel uit die hemel aan Jesus verskyn en

Hom versterk’ (verse 39-43 NLV). Jesus het nie gewag tot die uur van sy grootste krisis

aanbreek, voor Hy gebid het nie. Vir drie-en-‘n-half jaar gedurende sy aardse bediening,

het Hy ‘n lewe van gebed gebou. Voor Hy Lasarus uit die dood opgewek het, lees ons,

‘...Jesus het sy oë hemelwaarts gerig en gesê: ‘Vader, Ek is dankbaar teenoor U dat U na

My geluister het. Ek weet dat U altyd na My luister...’ (Johannes 11:41-42 NLV). Jesus het

so ‘n intieme verhouding met sy Vader gehad dat Hy in tye van druk en pyn na God toe

kon gaan, met die vertroue dat Hy sy ondersteunende genade sou ontvang. Totdat jy

dieselfde kan doen, sal jy weerloos teenoor ander mense en situasies buite jou beheer

wees. Dink jy Jesus het so baie gebid omdat Hy wou, of omdat Hy gedink het dat Hy

veronderstel is om dit te doen? Hy wou! Mense wat baie bid weet: Hoe minder jy bid,

hoe minder wil jy bid en hoe meer jy bid, hoe meer wil jy bid. Die krag agter Christus se

wonderbaarlike sukses was die krag van gebed. Begin vandag en wy jouself daaraan

toe om elke dag te bid.


spreuke 12:10 nlv - the word for...

Documents