594

Ephesus whutꞌenne Paul hadih ꞌubulhni

1 1 Si Paul Sizi Gri ꞌen gha whelꞌaꞌ-un usdli. ꞌEt Yakꞌusda stsꞌu hukwaꞌ ninzun.

Nohni Yakꞌusda oochꞌeꞌne keyoh Ephesus whutꞌine, nohni Sizi Gri ꞌaw oola doohtni aitꞌoh ndet la nohba ꞌalha ꞌuhoontꞌoh-un, nohni tsꞌiyawh hadih nohdusni.

2 Yakꞌusda neBá ꞌinkꞌez Sizi Gri neMoodihti, ꞌen tsꞌun ye unzoo-i ꞌinkꞌez nohdzi dizghel-un nohgha óoninꞌai, nohbulh óotꞌeꞌ.

Gri, ꞌen naneonket3 Yakꞌusda, Sizi Gri neMoodihti ooBá, ꞌen uzdílhtiꞌ. ꞌEn ꞌuntꞌoh Sizi

Gri be yakꞌut whudiztiꞌ-un, ꞌet whunilhchoh Ndoni gha ndi negha ntꞌai.4 NeBá ndi yun ꞌuitilelh whutso ꞌutahanéanla Sizi Gri ooyúzdutiltsꞌilh huba. ꞌEt whe lubeshi ooghu hoolohne tsꞌooleꞌ si, ꞌinkꞌez ꞌaw nekꞌe hootaltsꞌulh-un hooloh. Ndi be lhkꞌe tsꞌutsiꞌ-i, ꞌi be neBá oobut ꞌet tsꞌoozooꞌ ha.5 ꞌEt whe neBá ꞌudaꞌ neba lhaóodinla, wheni Sizi Gri ꞌen be dichꞌoh buzkehke ꞌuztileh ha. NeBá ꞌen ooba hoonzoo, didutchꞌoh hukwaꞌ ninzun, ꞌet whuz unꞌa ꞌuhoonla.6 ꞌI gha ye unzoo diztiꞌ-i, ꞌi uzdólhtiꞌ. ꞌEt whuz unꞌa duYeꞌ yukꞌe ntsiꞌ-un, ꞌen ooba sooꞌ tsꞌuldzooꞌ nesulhtsi.7 Yakꞌusda neBá Sizi Gri ꞌen be duduzkaiꞌ be naneonket. ꞌInkꞌez nintaꞌ tsꞌuntꞌen-un neba whunaꞌalhdeh. Ye unzoo-i dádiztiꞌ, ꞌet whuz unꞌa ꞌuniltsuk whe neba ꞌuhóonla.8 Ye unzoo-i, ꞌi be lhanꞌun te ye whunih-i ꞌinkꞌez be tꞌeoonudzun-i, tsꞌiyawh ꞌi be ꞌet whuz unꞌa neba ꞌuhóonla.9 Ndet la Yakꞌusda didutchꞌoh hukwaꞌ ninzun-i, neba wheꞌ hoontꞌoh hooyoh-un, ꞌet cha whunénilhtan. Dichꞌoh dudeni lhadínla, ꞌet whe hoontꞌiꞌ, ꞌet whuz unꞌa ꞌuhóoja.10 ꞌEt whe ntsꞌoya hoozulh whula whusahóoltsꞌut de, ꞌet de ndet la yakꞌuz dilhtsꞌine, ndi yun dilhtsꞌine cha, ꞌenne tsꞌiyawh Gri ꞌen be ꞌilho za ubutilhtselh.

Paul, Ephesus Whutꞌenne Butsꞌó Kꞌe Yanguz-i

11 Yakꞌusda dichꞌoh dudeni lhaídinla, ꞌet whuz unꞌa ꞌuwhutꞌen ꞌet huwa. ꞌEt ꞌudaꞌ neba lhaoodinla whe Sizi Gri ꞌen be netsꞌó tikulh-un nechꞌeꞌ whuzdliꞌ.12 ꞌEt wheni Lizwifne ꞌudechoo Gri, ꞌen ooka tse tsꞌuhooli. ꞌEt huwa wheni negha Yakꞌusda ye diztiꞌ-i dótiꞌ.13 ꞌEn be khuni ꞌalhaꞌ ꞌuntꞌoh-i dáhtsꞌo. ꞌEt Sizi Gri nohba ꞌalhaꞌ ꞌuja. Ndi khuni, ꞌi gha duhjih. Sizi Gri hukwꞌelhꞌaz nohba ꞌalhaꞌ ꞌuja, ꞌet Ndoni, netsꞌú yoozi-un, ꞌen be nohehóodatꞌen Yakꞌusda oochꞌeꞌ sahliꞌ.14 NeBá yutꞌi-i netsꞌu whutikulh-un, Yakꞌusda Ndoni negha ídinꞌai. ꞌI be ꞌet whuloh neba ꞌet neltsꞌut, mbene Yakꞌusda dichꞌoh duchꞌeꞌ ubulhtsine, ꞌenne nabootakulh ꞌet whutsꞌun. ꞌEt whe Yakꞌusda ye diztiꞌ-i, ꞌi dutátiꞌ.

Yakꞌusda ye whunih-i nohgha ídoꞌalh, ꞌet huba tenadahdli15 ꞌEt Sizi Gri neMoodihti nohba ꞌalhaꞌ ꞌuntꞌoh, ꞌinkꞌez Yakꞌusda

oochꞌeꞌne, ꞌenne tsꞌiyawh bukꞌehtsiꞌ, ꞌet nohbulh ꞌúdustsꞌo.16 ꞌEt huwa si cha nohba tenadusdli-un whe nohba musi dusni, ꞌaw ꞌetsul ꞌudósnih aitꞌoh. ꞌAhoolhyiz stenadudli toh nohghuni zástan.17 NeMoodihti Sizi Gri ooYakꞌusda, ꞌen ooBá ye diztiꞌ-i bulh ꞌuntꞌoh, ꞌen tsꞌun nohba tenadusdli whe Ndoni ꞌen be be whutnih-i ꞌinkꞌez noheni taoodutakulh-un, ꞌet nohtlꞌa hónꞌai. ꞌEt whe Yakꞌusda dantꞌoh-un unli, ꞌon nus tꞌentihzeh.18 ꞌEt noheni be whunulꞌen kꞌunꞌa ꞌon nus hoohꞌen whe soo tsꞌihꞌun unꞌa lhat-un whuntilhꞌelh. ꞌEt whuz unꞌa njan uzdoojih ha nekaꞌ daniꞌ-un negha óoninꞌai, ꞌet hukwa itohꞌen, ꞌet tꞌewhuntihzeh. ꞌInkꞌez Yakꞌusda oochꞌeꞌne bulh ndi yutꞌi-i netsꞌú whutikulh-un tsꞌuwhutꞌi, dáwhuldzooꞌ wheꞌ hoontꞌoh, ꞌet tꞌewhuntihzeh.19 Wheni mbe ooba ꞌalha ꞌuhoontꞌohne, Yakꞌusda ye ulhtus-i daltus whe netsꞌun ꞌuntꞌoh, ndi hooncha whe yé ulhtus-i, ꞌi be ꞌutꞌen. ꞌEt whuz unꞌa nohba tenadusdli.20 ꞌOh daꞌ Gri, ꞌen yaidlane toh dunadilhti. ꞌInkꞌez ndo yakꞌuz dughu nailhni tsꞌunkꞌus nátlꞌa idalhdaꞌ.21 ꞌEt whutsꞌun Gri tsꞌiyawh buba ndo ꞌuntꞌoh. Mbene ꞌudetso whudilhdzulhne, butso whudilhdzulh. Mbene dune ando ꞌuntꞌohne, buba ndo ꞌuntꞌoh. Mbene la ulhtusne, ꞌenne cha kꞌuneꞌ bulꞌen. ꞌInkꞌez mbene la moodih unline, ꞌenne bumoodihti ꞌuntꞌoh. ꞌAndit ꞌaho ꞌinkꞌez whuz de whudizulh-un, ꞌet hoontsꞌi mbene la booziꞌ nchane, ꞌenne tsꞌiyawh Gri buba ndo ꞌuntꞌoh.22 ꞌInkꞌez Yakꞌusda ꞌukꞌenus ye ulhtus-i, ꞌi be tsꞌiyaitsuk Gri duketlꞌah neíninla. ꞌInkꞌez Yakꞌusda ba ꞌilhunaoodulhne tsꞌiyai be ꞌenne tsꞌiyawh butso whudilhdzulh.

595 Ephesus Whutꞌenne 1

23 Yakꞌusda ba ꞌilhunaoosdilne, ꞌenne tsꞌiyawh Gri ooyustꞌe ꞌutsꞌintꞌoh. Ooyustꞌe lhadúlyane tsinli. ꞌEn tsꞌutꞌi de, ꞌaw ꞌutsꞌun unꞌa ꞌutsꞌootꞌeꞌ hukwa lheꞌtsꞌuntiszil.

Ye unzoo-i, ꞌi be dahjih

2 1 ꞌInkꞌez nohni nintaꞌ nahtꞌen ꞌinkꞌez nohlubeshi be dasáhtsai inleꞌ, ꞌet khahna nohulhtsi.

2 ꞌEt ꞌoh daꞌ ndi yun kꞌut whe ꞌutꞌen kꞌunꞌa yinka dúlhtsꞌi inleꞌ. Mbe tazai kꞌuz ye ulhtus-i whe moodih tileh-un, ꞌet yutlꞌa hónꞌai, ꞌen netsudule ꞌen kꞌuneꞌ nohulꞌen-un inleꞌ. Mbene ꞌawhuz Yakꞌusda yukꞌunulheꞌustꞌenne, ꞌenne buyudinda.3 ꞌOh daꞌ wheni cha whuz unꞌa za bukꞌunꞌa ꞌustsꞌintꞌoh inleꞌ. Neyustꞌe lubeshi tsꞌu nintꞌi, ꞌet whuz unꞌa za neyustꞌe ꞌutitꞌelh hukwaꞌ ninzun, ꞌinkꞌez ne-eni cha, ꞌet tsꞌiyawh ꞌutsꞌuholhꞌen inleꞌ. ꞌInkꞌez Yakꞌusda ndet whe bubulh hunilchꞌe-un, ꞌet cha neba whusaóotikulh ínleꞌ ꞌuyoonne kꞌunꞌa.4 ꞌEt hoontsꞌi Yakꞌusda dalcho-i be nekꞌentsiꞌ, ꞌet huwa tube cho negha teꞌninzun.5 ꞌOh daꞌ nintaꞌ tsꞌuntꞌen-un ꞌet whe yaidlane leꞌ tsꞌantꞌeꞌ. ꞌEt hoontsꞌi Gri ꞌen be Yakꞌusda tsꞌukhuna nesulhtsi. Ye unzoo-i, ꞌi be dahjih.6 ꞌInkꞌez yakꞌuz tsꞌe Gri Sizi ꞌen bulh Yakꞌusda dunanedinla. Lhelhdun ndo yakꞌuz tsꞌe ꞌen yuzih nenéninla.7 ꞌEt whe neBá dalcho ye unzoo-i nus de whudizulh-un whusaootiltsꞌulh, nduwhulyiz Gri Sizi ꞌen be neBá whunéuntilhtun. ꞌI be netsꞌun tizooꞌ wheꞌ hoontꞌoh.8 Ye unzoo-i, ꞌi be be neba ꞌalha ꞌuhoontꞌoh-i gha uzdujih ꞌet huwa. ꞌAw whenichꞌoh negha iloh whe uzdujih. Yakꞌusda ꞌen negha óoninꞌai.9 ꞌAw ꞌutꞌen unzoo-i, ꞌi gha iloh uzdujih. Doo ka la whulohne wheꞌ hududóltiꞌ.10 Wheni Yakꞌusda ꞌuyinlane ꞌutsꞌintꞌoh ꞌet huwa. Gri Sizi ꞌen ooyúzdultsꞌi whe ꞌen be ꞌandidi natsꞌusdliꞌ, ꞌutꞌen unzoo-i ꞌuztilhꞌelh ha. ꞌEt whe whutso Yakꞌusda neba lhaóodinla. ꞌEt ookꞌoh nutsꞌóodilh ha.

Gri duzkaiꞌ ꞌi be Yakꞌusda be nghoh nenóhninla11 ꞌEt huwa whunalhnih, nohyustꞌe be ꞌudun yun kꞌut whutꞌenne

ꞌahtꞌoh. Ndunne Lizwifne, mbe dune dula be hika dune unli-i kꞌut ustꞌúsne, ꞌenne ooka dune ꞌahli-i kꞌut ꞌaw lhítꞌus nohuhútni.12 ꞌEt ꞌoh daꞌ nohni Gri ooyit ꞌahtꞌoh inleꞌ. Israel ootsꞌu haíndene ꞌaw butoh lheꞌáhtꞌoh inleꞌ. Ndai Yakꞌusda duduneꞌne dughuni buba lhaídinla-i butsꞌú yoozi butsꞌun whusaootikulh-un, ꞌaw hoontsool-unyaz hoontsꞌi hoohꞌen aitꞌoh inleꞌ. ꞌAw hukwaꞌ itohꞌen-un hooloh ꞌinkꞌez Yakꞌusda ooyit ꞌahtꞌoh inleꞌ.

Ephesus Whutꞌenne 1 ,  2 596

13 ꞌEt ꞌandit Gri Sizi ꞌen bulh ꞌahtꞌoh. ꞌOh daꞌ Yakꞌusda ooghu nilhdzaꞌ ꞌahtꞌoh inleꞌ, ꞌet hoontsꞌi Gri, ꞌen duzkaiꞌ, ꞌi be ꞌandit be nghoh ꞌahtꞌoh.

Gri ꞌen gha nedzi dizghel14 Gri ꞌen gha nedzi dizghel. Ndi sih leꞌ ꞌuntꞌoh ꞌi ne-eguz, ꞌi be

lhelhdun uzdilhtsꞌi inleꞌ. Ndi sih ꞌi neba hooloh yulhtsi. ꞌEt whe ꞌilhoh didowhne natsꞌusdliꞌ ꞌet huwa.15 Moses be ꞌudustlꞌus ꞌukꞌu nusguz-i, ꞌi be Lizwifne ꞌinkꞌez ꞌudun yun kꞌut whutꞌenne lhchꞌaz uzditni inleꞌ, ꞌet neBá Sizi Gri duyustꞌe be neba gak whulhtsi. ꞌEt huwa wheni whutsodaꞌ nawh uzdidowh inleꞌ whe ꞌandit Sizi Gri bulh ꞌutsꞌintꞌoh. ꞌEt whuz unꞌa nawh didowhne ꞌilhoh uzdidowh za neulhtsi. ꞌEt huwa netoh whudizghel whulhtsi.16 ꞌInkꞌez dutulalhgus ꞌi be nawh didowhne ꞌilho za neulhtsi. ꞌEt whe lhkꞌeke nabulhtsi. ꞌEt whuz unꞌa Yakꞌusda tsꞌu neoozdla. Ndi lhchꞌaz uzditni-un, dutulalhgus be ꞌet tsꞌiyawh neba gak whulhtsi.17 ꞌInkꞌez nohni ꞌaw Yakꞌusda ghu nuní lhnuszutne, ꞌinkꞌez mbene Yakꞌusda ghu nuní nuzutne cha, Sizi Gri whusainya ꞌinkꞌez ꞌenne tsꞌiyawh khuni unzoo-i be tsꞌihꞌun unꞌa lhtsꞌun ꞌuhootꞌeꞌ ha, ꞌet ubudániꞌ.18 ꞌEt huwa Sizi Gri ꞌen be wheni nawh didowhne ꞌilho za tsꞌuzdliꞌ whe Ndoni, ꞌen be neBá netlꞌa hónꞌai whe tsꞌiyawh ootsꞌuztoodilh ha.

Gri ꞌen tse yoh ookꞌu whuzꞌai-i unli19 ꞌEt huwa ꞌutsꞌun whutꞌenne ꞌinkꞌez ꞌutsꞌun keyoh whutꞌenne ꞌahli

inleꞌ, ꞌet ꞌandit ꞌet ꞌaw ndúlhahtꞌoh. ꞌEt kꞌus Yakꞌusda oochꞌeꞌne bubulh ꞌahtꞌoh. Yakꞌusda ooyoh dilhtsꞌine butoh ꞌahtꞌoh sahliꞌ.20 Nohni Yakꞌusda ooyoh léꞌahtꞌoh. Whelꞌaꞌne ꞌinkꞌez Yakꞌusda be nus hooꞌenne, tsꞌiyawh yoh ookꞌu whuzꞌaine hinli. ꞌInkꞌez nohni whunohodalhꞌeꞌ, ꞌet huwa bubulh ꞌáhtꞌoh. Gri ꞌen dichꞌoh ꞌukꞌenus tse yoh ookꞌu whuzꞌai-un unli whe ꞌuntꞌoh.21 Sizi Gri ꞌen be yoh tsꞌiyawh whudutsꞌo whe ꞌuhóolya. ꞌEt ꞌi be neMoodihti ooyoh ꞌon nus whudiztiꞌ suliꞌ.22 Nohni cha ꞌen be za lhadúlyane ꞌahli. ꞌEt whe Yakꞌusda Ndoni be nohyudinda.

Wheꞌ hoontꞌoh hooyoh-un tsꞌet ha hóoltsꞌut

3 1 ꞌEt whula gha tsꞌe Si Paul nohni ꞌudun yun kꞌut whutꞌenne nohba Gri Sizi ꞌen ba ꞌustꞌen. ꞌEt huwa ꞌadinꞌai-un usdli.

2 ꞌEt Yakꞌusda dichꞌoh ye unzoo-i, ꞌi nohni nohba sghantꞌai, ꞌet whulh ꞌúdahtsꞌo de.

597 Ephesus Whutꞌenne 2 ,  3

3 ꞌInkꞌez sba whe hóodiltsai-un, ꞌet ꞌi be dahoontꞌoh-un huwa Yakꞌusda sutꞌeoonalhdzin, ndi buba wheꞌ hoontꞌoh hooyoh-un huwun. ꞌEt Whutsodaꞌ khuni ntsool-iyaz be nohtsꞌó kꞌe ꞌisguz.4 ꞌEt ookꞌu yalhduk de, Gri ꞌen gha buba wheꞌ ꞌuntꞌoh hooyoh-i tꞌeoonúszun, nohni cha whuz unꞌa tꞌewhuntihzeh.5 ꞌUdaꞌ niz yun kꞌut whutꞌenne ndet ꞌuwhúlhni-un, ꞌaw tꞌelhuhonízil inleꞌ. ꞌEt ꞌandit dzin tsꞌiyawh tꞌetsꞌonanzin. Ndoni be Yakꞌusda ba whelꞌaꞌne ꞌinkꞌez Yakꞌusda be nus hooꞌenne, tsꞌiyawh bubutꞌeoonalhzin.6 ꞌUdun yun kꞌut whutꞌenne ꞌinkꞌez Lizwifne, ꞌenne cha ꞌilho yustꞌe hooleꞌ hubaꞌ hoontꞌoh. ꞌInkꞌez Yakꞌusda, Gri ꞌen be ndi khuni unzoo-i, ꞌi be netsꞌu hooszi. Wheni tsꞌiyawh nebaꞌ hoontꞌoh wheꞌ hoontꞌoh.

7 Khuni unzoo-i be ꞌustle-un susdliꞌ. Dahoontꞌoh hukwꞌunꞌa Yakꞌusda ye ulhtus-i, ꞌi be ꞌuwhutꞌen, ꞌet whuz unꞌa ye unzoo-i, ꞌi be stlꞌa hóoltsꞌut.

Wheꞌ hoontꞌoh hooyoh-un tsꞌet ha hóoltsꞌut ꞌet huwun8 Si hoontsꞌi, Yakꞌusda oochꞌeꞌne buba nyo ꞌuntꞌohne, ꞌenne buba nyo

ꞌustꞌoh hukwꞌunꞌa ꞌududuzdzun. ꞌEt hoontsꞌi ndi Yakꞌusda ye unzoo-un, ꞌet sghá whultsꞌut. ꞌEt ꞌi be ꞌudun yun kꞌut whutꞌenne, khuni unzoo-i be ndúwhulcho budutásnelh. Gri Ye diztiꞌ-i hooncha kꞌet, ꞌaw whula toh hooloh, ꞌet huwun budutásnelh.9 ꞌEt whe la buba wheꞌ hoontꞌoh hooyoh-un, ꞌet ꞌi be tsꞌiyanne ꞌalhgoh ꞌilho didowhne tsꞌooleꞌ. Soo ꞌudechoo whutsꞌun, Yakꞌusda tsꞌiyanne buchꞌá whuntizꞌi. ꞌInkꞌez tsꞌiyanne dune honilhꞌen ubutiselh ha. ꞌEn ꞌuja Sizi Gri ꞌen be tsꞌiyaitsuk ꞌinla.10 ꞌEt whe yakꞌuz tsꞌe mbene la ꞌudetso whudilhdzulhne, ꞌinkꞌez mbene la moodihne, ꞌenne tsꞌiyawh Yakꞌusda ba ꞌilhunaoosdilne bugha ndo Yakꞌuz dilhtsꞌine, Yakꞌusda ye whunih-i tsꞌiyawh ndet ꞌuwhúlhni-un bubutꞌewhuntilhzeh.11 ꞌUdechoo whutsꞌun neBá ꞌuninzun-un, whuz unꞌa Gri Sizi neMoodihti, ꞌen gha ꞌuhóonla.12 ꞌEn be ꞌaw whélhtsꞌoojoh whe be ꞌalha ꞌuhoontꞌoh-i, ꞌi gha ꞌaw whelhtsꞌuniljut whe neBá oobut néztiyalh.13 ꞌEt huwa nohtsꞌu tedusdli, nohba dzoh nususzut-un huwa, nohdzi kꞌoh ooneh junih, ꞌet nohtsꞌu hukwaꞌ dusni. ꞌEt whe whunólhni.

Wheꞌ hoontꞌoh hooyoh-un tsꞌet ha hóoltsꞌut neba hooncha14 ꞌEt huwa Sizi Gri neMoodihti ooBá, ꞌen oobut sgwutsi be nenúsya.

15 Booziꞌ gha mbene yakꞌuz dilhtsꞌine ꞌinkꞌez ndi yun kꞌut khunane cha, ꞌenne tsꞌiyawh buzkehke hoodzi.

Ephesus Whutꞌenne 3 598

16 ꞌEn tsꞌun nohba tenadusdli, Ye diztiꞌ-i, ꞌi hooncha kꞌet ꞌaw ꞌuzdooniꞌ aitꞌoh, ꞌet ꞌuwhultsuk Ndoni gha ye ulhtus-i nohgha ítaꞌalh. ꞌEt whe nohyughi unli-i, ꞌi be ulhtus tíleh.17 Be nebe ꞌalha ꞌuhoontꞌoh-i, ꞌi be Gri nohdzi yo whutitꞌelh. ꞌInkꞌez be nekꞌetsꞌintsiꞌ-i, ꞌi be yoh ookꞌu whuzꞌai-i, ooghih hoonli kꞌunꞌa dutsꞌo.18 ꞌEt whe Yakꞌusda oochꞌeꞌne bubulh nohni cha Sizi Gri be nekꞌetsꞌintsiꞌ-i, soo cho be tꞌéwhuntihzeh, dádiltel ꞌinkꞌez dadilyiz, dádiltai cha ꞌinkꞌez ndo dawhuldzoh tsꞌe cha, ꞌet ꞌulcho-i be.19 Gri ye nékꞌensiꞌ-i, hooncha kꞌet, ꞌaw tꞌetsꞌonózin aitꞌoh, ꞌi be la tꞌeoonoohzeh. ꞌInkꞌez ndai Yakꞌusda yé dizbun-i, ꞌi be la doohbun.

20 ꞌEt neBá ndet la ootsꞌo hukwaꞌ tsꞌutni-un ꞌinkꞌez howu nuni uznuzut-un cha, ꞌet ꞌon nus ꞌultsuk-i negha tilelh whe ꞌuntꞌoh. Ndoni ye ulhtus-i neyoh ꞌuntꞌoh, ꞌet ꞌi beꞌ whutꞌen.21 ꞌInka ndi yun ꞌetsul ꞌutinelh whutsꞌun ꞌinkꞌez hukwꞌelhꞌaz ꞌilhiz wheni, ꞌet Gri Sizi ꞌen ba ꞌilhunaoodúlhne neBá uzdólhtiꞌ hubaꞌ hoontꞌoh. ꞌEt ndo honeh.

ꞌIlho oohleꞌ

4 1 Si, neMoodihti ooba ꞌadinꞌai-un ꞌustꞌoh. Njan Yakꞌusda dutihjih ha nohkaꞌ daniꞌ, ꞌet huba soo ꞌúlhdzooꞌ whe whuz toohdilh, ꞌet nohtsꞌu

hukwaꞌ dusni.2 ꞌAhoolhyiz yo ꞌúdudulhdzun, ꞌinkꞌez nanilhtsulyaz néꞌlhoolhꞌen. Dzoh nahdeh-un whutsꞌu doohtni junih. Lhkꞌehtsiꞌ whe ꞌilhoh dune oohleꞌ.3 Ndoni ꞌen be tsꞌiyawh lhulh dune oohleꞌ. Tsꞌihꞌun unꞌa lhtsꞌun ꞌahtꞌeꞌ, ꞌi be ꞌilho oohleꞌ. ꞌEt ꞌi be nohdzi ndulcho-i be whuz unꞌa za hukwaꞌ oohtꞌen.4 ꞌIlho yustꞌe tsꞌuzdliꞌ ꞌinkꞌez ꞌilho Ndoni neyudinda. Ntsꞌenꞌa Yakꞌusda dutihjih ha nohkaꞌ daniꞌ ꞌet hukwa tse hóhleꞌ.5 ꞌIlhoghun neMoodihti ꞌinkꞌez be néba ꞌalha ꞌuhoontꞌoh-i, ꞌi cha ꞌilho za. ꞌInkꞌez ꞌilho za be too beꞌ tsꞌulꞌih-i hoonli.6 ꞌEt ꞌilhoghun Yakꞌusda, ꞌen ooba ꞌalha ꞌuhoontꞌohne, tsꞌiyawh buBá unli. Tsꞌiyai ando ꞌuntꞌoh ꞌinkꞌez wheni tsꞌiyawh netoh ꞌutꞌen. ꞌInkꞌez nohni tsꞌiyawh, ꞌilhoghun ꞌahli whe nohyudinda.

Ndai la Gri negha íninla-i7 ꞌEt Gri, ꞌilhone tsinli whe ndi yun kꞌut lhelhdun huwa tsꞌana-un,

ye unzoo-i, ꞌi be negha óoninla.8 ꞌEt huwa Yakꞌusda ooghuni ndutni,ꞌoh daꞌ Gri yoo do whenya whe nyoonne nabilhchukne,

whuz whe nábanla.

599 Ephesus Whutꞌenne 3 ,  4

ꞌInkꞌez dunene butlꞌa hónꞌai.9 ꞌEt ndi “ndo whenya,” daja ni whe ꞌutni? Tulalhgus kꞌut dazsai whe

yaidlane toh tsꞌe whenya, ꞌet ꞌuwhúlhni.10 Ndun nyo whenya-un, ꞌen za ꞌudedo yakꞌuz whenája. Whuz tsꞌiyaitsuk lhadútileh ha.11 ꞌEn za ꞌutꞌen, whulohne cha whelꞌaꞌne butlꞌa hónꞌai. Whulohne cha nus hooꞌenne butlꞌa hónꞌai. ꞌEt whulohne cha khuni unzoo-i be yahutilhduk-un, ꞌet butlꞌa hónꞌai. ꞌInkꞌez whulohne cha Yakꞌusda ba ꞌilhunaoosdilne bughu tilehne ꞌinkꞌez dune hodutilhꞌehne, ꞌet cha butlꞌa hónꞌai wheꞌ hutꞌen.12 ꞌEt whe Yakꞌusda oochꞌeꞌne lhadúlyane ꞌubulhtsih. ꞌEt whuz unꞌa Sizi Gri be ꞌustléne ꞌutꞌen ꞌuhuyulhꞌen ꞌinkꞌez Gri ooyustꞌe nus za lheꞌiltus, ꞌet wheni ꞌuhutꞌen.13 ꞌEt whutsꞌun ndet be neba ꞌalha ꞌuhoontꞌoh-un cha, ꞌinkꞌez ndet tꞌetsꞌoninzun Yakꞌusda ooYeꞌ ghun, ꞌet whutsꞌun tsꞌiyawh ꞌilho ꞌuztileh. ꞌEt whuz unꞌa soo lhadúlyane ꞌuztileh. ꞌInkꞌez Gri ꞌet nduntꞌoh whe ꞌen ookꞌoh tsꞌe hukwꞌunꞌa ꞌuztinelh.

14 ꞌAw ꞌon ꞌun tsꞌoodunne kꞌunꞌa lheꞌtsꞌoostꞌeꞌ ꞌet huwa. Dune buka hóodilhtsꞌi nabontiꞌah ha. Lhentsꞌun unꞌa dune hubohodulhꞌeh, ꞌi be ꞌantsꞌi nilhtsꞌi kꞌunꞌa lhelh tsꞌu náhutukuk leꞌ hutꞌen.15 Kꞌus khuni ꞌalhaꞌ ꞌuntꞌoh-i, be lhkꞌe tsꞌutsiꞌ-i, ꞌi be yatsꞌulhduk, ꞌinkꞌez Gri netso whudilhdzulh-un, ꞌen tsꞌun soo cho uznooyeh hukwaꞌ tsꞌootꞌen.16 ꞌEn be ooyustꞌe ndulcho lhkayánla. Whuz unꞌa ye ulhtus-i be lhootun. ꞌEt tsꞌiyawh lhghu naoodilhghuz-un ꞌi beꞌ whutꞌen ꞌEt whuz unꞌa za ꞌuwhutꞌen de, ꞌet de ooyustꞌe be lhkꞌe tsꞌutsiꞌ-i, ꞌi be ꞌon nus ulhtus ꞌinkꞌez unzoo tileh.

ꞌAndidun-un dune17 ꞌEt huwa njan huwun nohdusni, neMoodihti nalh ꞌudusni,

ꞌudun yun kꞌut whutꞌenne ꞌaw lahootꞌoh hukwꞌunꞌa nuni hunudeh. ꞌEnne bukꞌunꞌa oohtꞌeꞌ junih.18 Bubeni tsalhgus yo ꞌuntꞌoh, ꞌet huwa Yakꞌusda ye khuna-i chꞌoh ꞌuhintꞌoh. ꞌAw hoonli tꞌehonuszun, budzi dutsꞌun suliꞌ ꞌet huwa.19 ꞌAw tsꞌiyantsuk hukwꞌu nuní lhonulhdzut. Tsꞌiyantsuk whula huditni. Buyustꞌe whutsꞌu nintꞌi-un, ꞌet za hukwaꞌ huninzun. Soo ꞌutꞌen dutsun-i ꞌuhutilhꞌelh, ꞌet za whutsꞌó nintꞌi.

20 ꞌEt hoontsꞌi nohni Gri ꞌaw ndoohoontꞌoh-un ooghun lhuhodúlhꞌel.21 ꞌAlhaꞌ tilah, ꞌen ghun whulh ꞌúdahtsꞌo ꞌinkꞌez ꞌen be hodilhꞌeꞌ inleꞌ de, ntsꞌenꞌa whula Sizi be ꞌalhaꞌ nudzun-i unli ꞌet huwa.

Ephesus Whutꞌenne 4 600

22 ꞌEt ꞌudaꞌ datsꞌintꞌoh la inleꞌ, ꞌet tsꞌiyawh ꞌetsul ꞌuwhahleh ꞌinkꞌez chꞌaz whúnulhtꞌi. ꞌEt nduhoontꞌoh-un, ꞌet tsꞌiyawh tube hoontsiꞌ wheꞌ hoontꞌoh. Ndet la whutsꞌu náhtꞌi-un, ꞌet whe nanihtꞌa.23 ꞌInkꞌez noheni be howu nuní nahzut-un, ꞌet ndúwhulcho ꞌandit-i nahoolhtselh.24 ꞌEt ꞌandit hukwꞌunꞌa yun kꞌe naihdilh, ꞌet whuz unꞌa whulhchoot. Yakꞌusda be ꞌutꞌen kꞌoh ꞌuhoolya. Ndiz unꞌa Yakꞌusda ꞌuhóonla, tsꞌihꞌun ꞌuhoontꞌoh-un, ꞌinkꞌez khuni ꞌalhaꞌ ꞌuntꞌoh-i ꞌet whe lubeshi ooghu hooloh, ꞌet whuz unꞌa neba ꞌuhóonla.

Yakꞌusda ooyughi khun oodachꞌe oohneh junih25 ꞌEt huwa ꞌilhone ꞌahli whahtsꞌit-un ꞌetsul ꞌudóhnih! ꞌInkꞌez ꞌandit

whutsꞌun ꞌilhone ꞌahli whe nohenghoh whutꞌine bulh, ꞌenne cha khuni ꞌalhaꞌ ꞌuntꞌoh-i, ꞌi be bubulh yaoolhduk, tsꞌiyawh ꞌilhoh didowhne tsinli, ꞌet huwa.26 Nohuhuske be lubeshi olhchoot junih. Khun te hunúlhchꞌe whe te sa yo tóoꞌalh junih.27 Khun te netsudule hukwaꞌ ninzun tuneꞌ nohoolhꞌen junih.28 Ndunne ꞌundunutꞌihne, ꞌenne tsꞌiyawh ꞌetsul ꞌuhooneh, ꞌantsꞌi ꞌuhootꞌen, ꞌet de la buba ꞌukꞌelha holeꞌ. Dula be hoonzoo-un huwaóonaꞌ. ꞌEt de la dune hoonli undunidzitne hoonli be bulaꞌ ooneh.

29 Khuni ntsiꞌ-i be yaoolhduk junih. ꞌEt khuni unzoo-i hiye yalhduk-i, ꞌi be ꞌon nus hilhtus hutileh, ꞌi be yalhduk. ꞌEt de la mbene la nohoozílhtsꞌaine, ꞌenne buba hootázooꞌ.30 Yakꞌusda ooyughi khun oodachꞌe oohneh junih. ꞌEn nohbe hóodatꞌen nohulhtsi ndet dzin nanohootakulh-un ꞌet wheni.31 Ndet nohba dzoh ꞌuhoontꞌoh-un, huske kꞌet ꞌantsꞌi nohdzi dízkꞌun leꞌ ꞌahtꞌoh, huske cha, ꞌinkꞌez ꞌi be ꞌahoolhyiz lhulhúzahke cha, ꞌinkꞌez ꞌahoolhyiz lhghú yalhduk, ꞌinkꞌez dune tsꞌu dahni-un cha, ꞌi tsꞌiyawh chꞌa nasulhye.32 ꞌInkꞌez tsꞌiyawh lhtsꞌu ꞌoóhzooꞌ, ꞌinkꞌez tsꞌiyantsuk whe nohdzi óolhdzooꞌ whe lhgha teꞌuntihdzin, ꞌinkꞌez ntsꞌenꞌa Gri, ꞌen be Yakꞌusda nohlubeshi nohba yunaꞌalhde, ꞌet nohni cha whuz unꞌa za ꞌilhone ꞌahli whe lhba ꞌun whutoolhdilh.

Be lhkꞌe tsꞌutsiꞌ-i, ꞌi be ndi yun kꞌut dúlhtsꞌi

5 1 ꞌEt nohni Yakꞌusda yukꞌentsiꞌne ꞌahtꞌoh, ꞌinkꞌez ꞌen buzkeh ꞌahtꞌoh. ꞌEt huwa ookꞌoh túneꞌ oohtꞌen.

2 Be lhkꞌe tsꞌutsiꞌ-i, ꞌi be ndi yun kꞌut dúlhtsꞌi. Ntsꞌenꞌa Gri nékꞌensiꞌ whe neba butlꞌaꞌ dudilti, nohni cha whuz unꞌa za ꞌet ndóhneh. Neba daja

601 Ephesus Whutꞌenne 4 ,  5

whe Sizi whe khuna-un, ꞌet Yakꞌusda ba ꞌet whula ditni wheni neba. Gri neba daja la Yakꞌusda ooba hoonzoo wheꞌ hóontꞌiꞌ.

3 ꞌEt hoontsꞌi ndet whe nintaꞌ ꞌahtꞌih-un, ꞌinkꞌez ꞌutꞌen dutsun-i cha, kꞌus ꞌuyoon dune chꞌeꞌ haꞌ nahzun cha, ꞌaw hoontsool-unyaz, hoontsꞌi nohni nohtoh nduntꞌi-i nohtoh hóleꞌ junih. Nohni Yakꞌusda oochꞌeꞌne ꞌahli ꞌet huwa whuz unꞌa ndi yun kꞌudólhtsꞌiꞌ hubaꞌ hoontꞌoh.4 ꞌEt ndai la dutsun-i ꞌinkꞌez la hootꞌoh-i be yatsꞌulhduk. Hoontsiꞌ whe dlo kꞌunezduniꞌ-un cha, ꞌet tsꞌiyawh ꞌaw whuz unꞌa nohba lheꞌhóotꞌoh. ꞌEt kꞌus tube cho Yakꞌusda tsꞌun musi dahni.5 Ndi tꞌeoonahzun, mbene nintaꞌ ꞌutꞌihne, kꞌus ꞌutꞌen dutsun-i ꞌulhꞌenne, kꞌus ꞌuyoon dune chꞌeꞌ haꞌ ninzunne, ꞌenne ꞌukꞌeltsi tsꞌun tenadudline bubúlh hulhgha ꞌuhintꞌoh, ꞌet ꞌenne tsꞌiyawh, Yakꞌusda ꞌinkꞌez Gri, lerwe unli-un ꞌaw hoontsool-unyaz hoontsꞌi ꞌaw bughá hokat aitꞌoh.6 Khun dune khuni laitꞌóh-i be nohnooꞌah junih. Nduntꞌohne Yakꞌusda yé huske-i, Yakꞌusda yukꞌunulheꞌustꞌenne bukꞌé dutaltsꞌulh wheꞌ hintꞌoh.7 ꞌEt huwa butsꞌú nedohdilh junih.

Hootꞌen-i niz nohdilh8 ꞌOh daꞌ tsálhgus yo dúlhtsꞌi inleꞌ ꞌet huwa. ꞌEt ꞌandit neMoodihti,

ꞌen be hootꞌen-i nohba suliꞌ. ꞌInka tsꞌoodunne be hootꞌen-i niz nuhúdilh ꞌet ndóhtꞌeꞌ hubaꞌ hoontꞌoh.9 Ndoni be ꞌutꞌen kꞌoh, tsꞌiyantsuk ndet hoonzoo-un, tsꞌihꞌun unꞌa ꞌuhoontꞌoh-un cha, ꞌinkꞌez khuni ꞌalhaꞌ ꞌuntꞌoh-i, ꞌi tsꞌiyawh Ndoni búlh ootsꞌun ha whúkat ꞌúhoontꞌoh wheꞌ hoontꞌoh ꞌet huwa.10 ꞌEt ndahtꞌen de, ꞌet whuz unꞌa neMoodihti hoontꞌiꞌ tilhtselh.11 Tsalhgus yo dilhtsꞌine bube ꞌutꞌen kꞌoh ꞌaw lheꞌhóozooꞌ. Khun butsꞌu nedohdilh junih, kꞌus ndutꞌenne hukwaꞌ budáhni.12 Neꞌhutꞌen-un, ꞌet hukwaya hoonli kꞌet, ꞌaw whulohkhun whunistꞌi be hoontsꞌi howu yatsꞌoolhduk aitꞌoh.13 ꞌEt hoontsꞌi tsꞌiyanne tꞌewhunilhdzin-un, ꞌet Yakꞌusda be hootꞌen-i, ꞌi be tꞌeoonudzih. ꞌEt tsꞌiyanne tꞌehonanzin, ndi Yakꞌusda be hootꞌen-i, ꞌi be ꞌuwhutꞌih.14 ꞌEt huwa njan ndutni,

“Mbe ꞌusti-un tsꞌenindzit!Yaidlane toh dunadindaih.ꞌEt de la Gri ootsꞌu ha yánduz-i,ꞌi nkꞌédodi.”

Ephesus Whutꞌenne 5 602

Whunih be yinka dúlhtsꞌi15 ꞌEt huwa soo cho khahdli. Whunih be yinka dúlhtsꞌi.

Whusnine kꞌunꞌa iloh. Kꞌus whunihne kꞌunꞌa oohtꞌeꞌ.16 ꞌAndit dzin whudizulh-un ꞌahoolhyiz dune tankꞌus ꞌuhitꞌelh za ꞌuhutꞌen. ꞌEt huwa dzin hoondukw-unyaz neba ꞌet whuzꞌai-un, ꞌet tsꞌihꞌun unꞌa ꞌutsꞌuhooleh hukwaꞌ tsꞌootꞌen.17 ꞌEt huwa khun ilóh tuneꞌ oohtꞌen junih. Kꞌus neMoodihti ꞌen nohtsꞌu hukwaꞌ ninzun-un, ꞌet za tꞌeoonahzeh hukwaꞌ ꞌahtꞌen.18 Khun te tanoohtnaiꞌ junih. ꞌI be be khahna-i nintaꞌ ꞌulhꞌih. ꞌAntsꞌi Ndoni be dahbun.19 Yakꞌusda ooghuni be ꞌahjun. Shun teniꞌ ꞌuznilhzun-i, be cha ꞌahjun, ꞌinkꞌez Ndoni shun be ꞌahjun. Nohdzi yo whe nohMoodihti shun be dúlhtiꞌ, ꞌet whuz unꞌa lhulh yalhduk.20 Sizi Gri neMoodihti, ꞌen booziꞌ be Yakꞌusda ꞌen ꞌuBá, ꞌen tsꞌun tsꞌiyantsuk huwun ꞌahoolhyiz musi dahni.

21 Yakꞌusda be nulhjut whe ꞌalhgoh lhudúlhtiꞌ whe ꞌilhoh dune oolhleꞌ.

Ndi yun kꞌut lhghuzdilhtsꞌine, Gri ꞌinkꞌez oolugliz nduwhultꞌoh22 Nohni ookike hoonline, nohnichꞌoh nohkike bukꞌuneꞌ ꞌahtꞌen.

ꞌEt neMoodihti ooghuni ulhchoot, ꞌet whuz unꞌa oohtꞌeꞌ.23 Nohkike nohtso hudilhdzulh ꞌet huwa. Gri, Yakꞌusda ba ꞌilhunaoodulhne butso-un unli, ꞌet whúz unꞌa ꞌet ndúhoontꞌoh. ꞌInkꞌez Gri, wheni ooyustꞌe ꞌutsꞌintꞌoh, ꞌen neulhyis-un ꞌuntꞌoh.24 ꞌEt huwa wheni Yakꞌusda ba ꞌilhunaoodulhne, ntsꞌenꞌa Gri neando ꞌuntꞌoh ookꞌuneꞌ tsꞌutꞌen, ꞌet whuz unꞌa tsꞌekoo cha dukike tsꞌiyantsuk whe bukꞌúneꞌ hootꞌen.

25 Nohkike, nohꞌatke bukꞌeoohtsiꞌ. Ntsꞌenꞌa Gri wheni Yakꞌusda ba ꞌilhunaoodulhne nekꞌentsiꞌ ꞌinkꞌez neba huwáꞌ dudulti.26 ꞌEt Gri neba daja la, wheni Yakꞌusda ba ꞌilhunaoodulhne Yakꞌusda ba ꞌudun nenéninla. Too za-i kꞌunꞌa dughuni be ootsun hoolohne naneulhtsi.27 ꞌEt whe wheni Yakꞌusda ba ꞌilhunaoodulhne soo ꞌukꞌenus lhadintꞌohne tsꞌinle whe Gri dichꞌoh dubut nenétalelh. ꞌAw tsunyaz hoontsꞌi nekꞌut be lhuhóodastꞌen. ꞌInkꞌez ꞌutsꞌun unꞌayaz hoontsꞌi lheꞌtsꞌítꞌoh. ꞌInkꞌez lubeshi ooyit ꞌuztitꞌelh, ꞌaw whuz unꞌa nekꞌe hóotaꞌalh-un hootaloh.28 ꞌEt whuz unꞌa dunene duꞌatke bukꞌe hootsiꞌ. ꞌEt dahintꞌoh la dichꞌoh kꞌe nahutsiꞌ, whuz unꞌa za duꞌatke bukꞌe hootsiꞌ hubaꞌ hoontꞌoh.

603 Ephesus Whutꞌenne 5

29 ꞌEt ꞌaw ꞌilhoghun dune dichꞌoh duyustꞌe tsꞌu dutnine hooloh kꞌus dichꞌoh duyustꞌe soo néꞌyulhꞌen. ꞌEt whuz unꞌa za neMoodihti Yakꞌusda ba ꞌilhunaoodulhne tsꞌiyawh bughunli.30 Gri ooyustꞌe ndulcho whe wheni tsꞌiyawh ooloh tsinli ꞌet huwa.31 Njan ꞌet huwa, dune dubá ꞌinkꞌez duloo cha buchꞌa ooyaꞌ ꞌinkꞌez duꞌat za yulh ootꞌeꞌ ꞌinkꞌez nahúltꞌo ꞌilho za hooleꞌ.32 Ndi buba wheꞌ hoontꞌoh hooyoh-un, ꞌet hooncha wheꞌ hoontꞌoh. ꞌEt daja dusni wheꞌ dusni, mbe la Gri tsꞌutni-un ꞌinkꞌez Yakꞌusda ba ꞌilhunaoodulhne, ꞌenne ꞌudúsni.33 Njan ꞌet doo cha za nohdutasnelh, dáhoontꞌoh whe tsꞌiyawh nohnichꞌoh kꞌe nahtsiꞌ, ꞌet whuz unꞌa za nohꞌatke bukꞌeoohtsiꞌ hubaꞌ hoontꞌoh. ꞌInkꞌez nohni tsꞌekoo nohkike soo cho ubudólhtiꞌ.

Tsꞌoodunne uznulhyeh-un

6 1 Tsꞌoodunneyaz nohni cha neMoodihti ꞌen gha nohdusneke bukꞌuneꞌ oohten. ꞌEt tsꞌihꞌun unꞌa ꞌuhoontꞌoh.

2 Nohbá nohloo bulh budólhtiꞌ. ꞌI khuni ꞌi ꞌudechoo netlꞌá idanꞌai-i ꞌinkꞌez netsꞌu hoozi-un whulh ꞌuntꞌoh.3 ꞌEt huwa ꞌi be saꞌ ndi yun kꞌut khutihnalh ꞌinkꞌez tsꞌiyantsuk whe sóoꞌ tihtꞌelh, ꞌet nohtsꞌú hoozi.

4 ꞌInkꞌez nohni dune buzkeh hoonline, nohuzkeh khun hubunólhchꞌeh junih. ꞌEt hoontsꞌi neMoodihti Whuneoodulhꞌeh-un, ꞌet ꞌi be soo cho bugha dahni, ꞌet whuz unꞌa dubun dunólhyeh.

ꞌUlhnane ꞌinkꞌez moodihne cha soo cho neꞌlhulhꞌen5 ꞌUlhnane nohni cha, Gri nohdzi ndulcho-i be ookꞌuneꞌ ꞌahtꞌen, ꞌet ndunne ndi yun kꞌut nohmoodih unline, ꞌenne cha whuz unꞌa za nujut be dahtlut whe bukꞌuneꞌ oohten.6 Nohmoodih nohnilhꞌen whe ꞌahcha naꞌdudulhꞌi de, ꞌet whuz unꞌa ndahtꞌen iloh, kꞌus Gri be ꞌulhnane sahliꞌ whe ndet Yakꞌusda nohtsꞌu hukwaꞌ ninzun-un, ꞌet hukwꞌunꞌa oohtꞌen.7 Noheni hoonáhtꞌiꞌ whe neMoodihti ba ꞌulhnane ꞌahli, ꞌaw dune ba ꞌulhnane lháhloh.8 ꞌEt tsꞌiyawh tꞌeoonáhzun, dune ꞌulhnane kꞌus ꞌulhnane bula nahuditnine hoontsꞌi, ꞌutꞌen unzoo-i ꞌahla, ꞌet whuz unꞌa neMoodihti tsꞌun nohba ꞌukꞌelha whutilhtselh.

9 ꞌInkꞌez mbe la moodih unline, nohni cha nohdutasnelh, nohbe ꞌulhnane bubeꞌ ꞌoonulhjoot-un whula dahtnih. Tꞌeoonuhzun nohnichꞌoh nohMoodihti, ꞌen ndo yakꞌuz usda ꞌinkꞌez ꞌen oonalh tsꞌiyanne lhulh hulhgha ꞌutsꞌintꞌoh wheꞌ tsꞌintꞌoh.

Ephesus Whutꞌenne 5 ,  6 604

Ntsꞌenꞌa netsudule oochꞌa ꞌuznilhde10 Sulhutsinke, ndi khuni ꞌudekꞌez-i ꞌuntꞌoh ꞌi be nohbulh yatisduk.

NeMoodihti, ꞌen bé tsꞌilhtus. Yé ulhtus-i, ꞌi be tsꞌílhtus. 11 Lhtsꞌutigan wheni be sóo nazdutitneh-i huba, Yakꞌusda negha ininla-i be soo nadahtneh. ꞌEt de netsudule ye ꞌuyoo unli-i, ꞌaw nohchꞌaꞌ oolhdeh aitꞌoh.12 ꞌEt ndi yun kꞌut yinka duneꞌne iloh bubulh Lheꞌtsꞌúdulh. ꞌEt hoontsꞌi ntsiꞌ-i nududehne, ndus de haíndilne cha, ꞌinkꞌez ꞌudetso

605 Ephesus Whutꞌenne 6

(6:10)

whudilhdzulhne cha, ntsiꞌne yat whumoodihne cha, ꞌinkꞌez ndi yun kꞌut tsálhgus yo whumoodihne, ꞌenne tsꞌiyawh ꞌet bubulh Lheꞌtsꞌúdulh wheꞌ tsꞌutꞌen.13 ꞌEt huwa lhtsꞌutigan wheni be sóo nazdutitneh ha negha íninla-i, ꞌi tsꞌiyawh be soo nadoohtneh hubaꞌ hoontꞌoh. ꞌEt whe ꞌoh de hoontsiꞌ-un whusahónzut de, ꞌaw nohchꞌa oodeh aitꞌoh. Tsꞌiyawh lhadáhja de, ꞌet de nudútalhyalh!14 ꞌEt huwa dudahdilh ꞌinkꞌez nohtsꞌi toh ndai la khuni ꞌalhaꞌ ꞌuntꞌoh-i, ꞌi be soo cho tsunadulhꞌooh. Nohyustꞌe be tsꞌihꞌun unꞌa ꞌuhoontꞌoh-i, ꞌi cha be náhdilh.15 ꞌInkꞌez khuni unzoo-i whe nedzi ba be sooꞌ hoontꞌoh-i, ꞌi be óohꞌes leꞌ oohneh.16 ꞌEt ndi neba be ꞌalha ꞌuhoontꞌoh-i, ꞌi ꞌantsꞌi neꞌi súbal leꞌ ꞌuntꞌoh ólhchoot. ꞌI be kꞌaza kwun leꞌ ꞌuntꞌoh, ꞌi ntsiꞌ-un netsꞌítutsoh. Be ꞌalha ꞌuhoontꞌoh-i, ꞌi be la nanoolhnoh.17 ꞌInkꞌez be uzdujis-i, ꞌi be úznilhꞌai leꞌ tsꞌintꞌoh. ꞌInkꞌez Ndoni oosaluzti, ꞌohwhi ulhchoot. ꞌI Yakꞌusda ooghuni ꞌuntꞌoh.18 Tenadudli ꞌinkꞌez Yakꞌusda tsꞌun teniꞌ uznilhdzun-i cha, ꞌet whuz unꞌa tenadahdli. Ndoni ꞌen be ꞌahoolhyiz ꞌetsul lheꞌduzíhni whe tenadahdli. ꞌInkꞌez ntsꞌoh dawhutꞌen ꞌet hoontsꞌi, huwahli whe Yakꞌusda oochꞌeꞌne, ꞌenne tsꞌiyawh buba tenadahdli.

19 ꞌInkꞌez si cha sba tenadahdli. ꞌI be khuni unzoo-i sgha tíkulh ꞌinkꞌez ꞌaw whelhusaz whe yatisduk. ꞌEt whe la be wheꞌ hoontꞌoh hooyoh-i, ꞌi ghun ꞌonghohne daja ni-un, ꞌet tsꞌiyawh whubuntistun.20 ꞌEt whe Yakꞌusda ba usyin-un ꞌustꞌoh, ꞌadusꞌai hoontsꞌi. ꞌInka soo cho sba tenadahdli. ꞌEt whe ꞌaw whelhusaz whe ꞌuyoonne cha bubulh yatisduk ꞌinkꞌez si tsꞌihꞌun unꞌa ꞌuwhutisdlelh.

Ye unzoo-i nohbulh óotꞌeꞌ21 Si ntsꞌenꞌa la dastꞌen ꞌinkꞌez si stsꞌun sulh dahooja la, ꞌet Tychicus

ꞌen tsꞌiyantsuk nohdutánelh. ꞌEn ꞌuntꞌoh neulhutsin ookꞌetsꞌintsiꞌ, neMoodihti tsꞌihꞌun unꞌa ba ꞌustle-un, ꞌen ꞌuntꞌoh.22 ꞌEt huwa ndun nohtsꞌú tisꞌaꞌ. ꞌEt de datsꞌútꞌen-un tꞌeoonoohzeh. ꞌInkꞌez soo cho nohdzi hoontꞌiꞌ yoolhtselh.

23 Nohni sulhutsinke tsꞌiyawh be nédzi dizghel-i nohgha tíkulh. Yakꞌusda neBá ꞌinkꞌez Gri neMoodihti be nékꞌetsꞌinsiꞌ-i, ꞌinkꞌez be ꞌalha ꞌuhoontꞌoh-i, ꞌi bulh nohgha títꞌalh.24 Mbene la Gri neMoodihti soo ꞌalhaꞌ ꞌi be yukꞌentsiꞌne, ꞌenne ye unzoo-i bubulh ꞌutitꞌelh. ꞌEt ndo honeh.

Ephesus Whutꞌenne 6 606